Qazaqstannyń Eńbek sińirgen qaıratkeri, aıtys janashyry, Qazaqstan Jazýshylar odaǵynyń basqarma múshesi, «Ana tili» halyqaralyq qoǵamynyń qurmetti múshesi,  Qazaqstan aıtys aqyndary men jyrshy-termeshilerdiń halyqaralyq odaǵynyń tóraǵasy Júrsin Erman búgin 66 jasqa toldy.

Júrsin Moldashuly 1951 jyly 12 aqpanda Qaraǵandy oblysynyń burynǵy Qarsaqpaı aýdanyndaǵy Stalın ujymsharynda týǵan.

Eńbek jolyn 15 jasynda Jezdi aýdandyq  «Oktábr týy» gazetinde ádebı qyzmetker bolyp bastaǵan. Ál-Farabı atyndaǵy Qazaq UÝ, Almaty joǵarǵy partıa mektebin bitirgen.

1978-1980 jyldary Jezqazǵan oblystyq teledıdarynda bas redaktor, 1983-1992 jyldary Qazaq respýblıkalyq teledıdarynda bas redaktor qyzmetin atqardy. «Qazaq ádebıeti» gazetiniń, «Juldyz» jýrnalynyń poezıa bólimderin basqardy. 2006-2010 jyldary Qazaq radıosynyń jáne «Qazaqstan» ulttyq telearnasynyń Bas dırektory qyzmetterin atqarǵan. 2013-2016 jyldary Respýblıkalyq Kitap murajaıynyń dırektory bolyp qyzmet  istedi.

Jezqazǵan teledıdarynda qyzmet istegen jyldary (1972-1980) aqyndar aıtysynyń telenusqasyn jasaý arqyly asyl murany jańǵyrtý jolyn bastady. 1984 jyldyń naýryz aıynan bergi otyz jyl boıy aıtystyń respýblıkalyq telearnalardan nasıhattalý  isine bas ıe bolyp keledi.

Qazaqstan Jazýshylar odaǵynyń basqarma múshesi. «Janartaý», «Araıly kún, armysyń!», «Ulytaýǵa bardyń ba...», «Qudiretke júginý», «Eki tizgin, bir shylbyr», «Qustyń kóleńkesi», «Yrǵaı», «Arnadym sizge», «Kóktóbedegi kezdesýler», «Alystan jáne jaqynnan», t.b. kitaptary jaryq kórgen.

M. Maqataev atyndaǵy syılyqtyń eki márte ıegeri. Qazaqstannyń Eńbek sińirgen qaıratkeri. «Qurmet» ordenimen marapattalǵan.