Mýzykanyń aǵzaǵa áseri kóptegen psıhologtar dáleldegen shyndyq. Bul áserdiń sapasy yrǵaqqa, sazyna, aınalasyna, kerek deseńiz, pleerin qosqan tyńdarmannyń kóńil-kúıine de baılanysty! Qandaı sazdy áýender jınaqtalýǵa kómektesedi, al, qandaıy, kerisinshe, jumystan bura tartqyzyp, boıdy bosańsytýǵa jaǵdaı jasaıdy?
Mýzyka jumys jasaý qabiletine qalaı áser etedi?
Mýzyka jumysqa kóńildi aýdarýǵa kómektesedi. Siz mynadaı nárseni baıqap kórdińiz be: tańǵysyn, alda mańyzdy kún, jumysqa shyǵar aldynda yrǵaqty ándi tyńdap, ózinen ózi kóńil-kúı kóterile túsedi. Sózsiz, mundaı jaǵdaı kópshiliginde kezdesse kerek. Kúnińizdi mýzyka tyńdaýdan bastańyz: birneshe kóńildi áýenderdi jumysqa barýǵa daıyndalyp júrip tyńdańyz nemese pleerdi jolǵa ózińizben birge ala shyǵyńyz!
Ǵalymdar sózdiń mátinin jatqa biletin eń jaqsy kóretin óleńderińizdi jumys ústinde tyńdaýǵa keńes etpeıdi. Áıtpese, tyńdap otyryp, qosylyp aıtamyn dep, alańdaısyz. Sózi joq, yrǵaǵyn qalaǵan mýzykaǵa den qoıyńyz.
Sportpen shuǵyldanǵan ýaqytta qandaı mýzykany tyńdaý kerek?
Barlyq sportshylar sporttyń qandaı túrine qaramastan, mýzyka yrǵaǵymen jattyǵý jasaǵandy qalaıdy. Olaı etpegende she: jyldam qarqyn alý kezinde qulaqqa jaǵymdy yrǵaqty tyńdaý sportshynyń nátıjeliligin 20%-ǵa kóbeıtýge kómektesedi! Sonda mýzyka — bul uzaq ta tıimdi jattyǵýǵa múmkindik beretin tyıym salynbaǵan dopıng. Kerek deseńiz, siz sportshy bolmaǵandyqtan, aldyńyzǵa úlken maqsattar qoımasańyz — júgiretin jolda nemese sport zalynda janyńyz qalaǵan ándi tyńdap júrip-aq, mindetti túrde ózdiginen júgiristi tezdetip nemese qulaqqaptaǵy shapshań yrǵaqqa úndese trenajerdaǵy tásilderdiń sanyn arttyrǵanyńyzdy baıqamaı qalasyz! Psıhologtar sportpen shuǵyldanatyn adamdarǵa baıaý men shapshań mýzykany kezektestirip, yrǵaqty áýenderdi — jattyǵýlarǵa, al, baıaýlaryn demalý kezinde tyńdaýǵa keńes beredi.
Mýzyka psıhologıalyq jaǵdaıǵa qalaı áser etedi?
Áýender qajetti ahýaldy qalyptastyrýǵa, kóńil kúıdi kóterýge qabiletti. Baıaý shyǵarmalar bosańsýǵa kómektesip, óziniń emosıonaldy jaǵdaıyn keltirýge atsalyssa, yrǵaqty ánder — búkil kún boıyna qýat beredi! Tańǵy oıatqysh saǵatqa qarabaıyr qońyraýdyń nemese qustyń saıraýynyń ornyna jaqsy kóretin ánińizdiń birin qoıyp qoıyńyz. Al, keshkisin jumystan kelgen soń, birqalypty tyńdaýǵa arnalǵan boıdy bosańsytatyn baıaý sazdy qosyńyz. Tańǵy jáne keshki pleıparaqshańyzdy jasap, oǵan únemi jańa shyǵarmalardy qosa, jalyqtyrǵandaryn óshire otyryp, olardyń qataryn ózgertýdi ádetke aınaldyryńyz.
Mýzykanyń adam densaýlyǵyna áseri
Mýzyka ishki organdardyń jumysyn sınhrondaıtynyn sonaý Ejelgi Gresıa kezinde bilgen. Pıfagor sazdy áýendi kóptegen psıhologıalyq jáne fızıkalyq aýrýlardy emdeýge qoldanǵan, al, ózi árbir tańdy ánmen bastaǵan. Qazirgi ýaqytta psıhologtar men fızıologtar bizdiń qulaǵymyzǵa jaǵymdy shyǵarmany tyńdaý kezinde aǵzamyzdaǵy árbir kishkentaı qurylymdy birlikter rahat alatyn jasýshalyq massajdy beretinin dáleldegen. Qısynsyzdaý bolǵanymen, aqıqaty osy. Mýzyka adamnyń tula boıyna jaqsy áser etip, eshqandaı keri kórsetkishin tıgizbeıdi.
Tańsholpan Ǵazızqyzy
