Belgili jýrnalıs Serik Abas-shah óziniń Facebook paraqshasynda qoǵamdaǵy biraz qordalanǵan máseleni aıtyp ótti. 

""Syn sátterde azamattyq aryma qyldaı bolsa da daq túsirmedim, qıyn-qystaý kezde jigittik qasıetime shań tıgizbedim” deıtin málimdemelerge sene qoımaımyn. Ómir emes pe? Al ómirde bári bolady. “Osyndaı” zaman týdy, “osyndaı” halyqqa aınaldyq.”

“Joq, biz ondaı emespiz” dep aıǵaılaı berý - bos kókirektik bolsa, “sondaı sorlymyz ǵoı” dep bas salbyratý - bısharalyq belgisi. Shalbar kıgen azamattyń bári “aıbaltanyń astyna basyn tóseýge” daıyn emes. “Erýli atqa er sala almaıtyn” erkek kóp, “egeýli naıza qolǵa ala almaıtyn” jigit te az emes. Solar tym qurysa “qalǵan-qutqan” jigittik qasıetin joǵaltpaýǵa tyryssa eken dep tileımin. Tyryspaıtyndar kóbeıip ketti. Tek sóıleı beremiz. Sol jaǵy qatty qynjyltady.

Naryq zańy ústemdik qurǵan myna zamanda “qara qyldy qaq jaryp” ǵumyr keshetin adamdar bar, biraq kınoda ǵana... Jabaıy kapıtalızm “jaǵadan alǵanda” “qara bastyń qamyn jemegen” adam óte sırek. Qazyna bólisý ádildikpen sheshilgen emes, ony qashan da pendeshilik jeńip otyrdy. "Aram aqsha jaýar kezde" ádildigiń “ádirem” qalady. Álemdi eshqashan da ádildik bılegen emes, álemdi aqsha men aqyl bılegen, bıleı beredi. Biraq, ádildikti tý qylyp kótermesek te, ony joǵaltyp almaýǵa tyrysý kerek. Tyryspaıtyn da boldyq. Tek aıta beremiz. Aıta beremiz. Sol jaǵy oılandyrady.

"Altyn kórse perishte joldan taıady”. Aqsha men bıliktiń “ysqyryǵy jer jarǵan shaqta”, adaldyq týraly sóz, bos dybysqa aınalady. Satqyndyq pen ashkózdik adamnyń qasireti emes, qasıeti bolǵan kezde adaldyq jaıly áńgime kúlki shaqyratyn bolady. Biraq, basynda qaýashaǵy, keýdesinde júregi bar adam adaldyqqa ǵana umtylsa kerek-ti. Umtylmaıtynymyz ókinishti. Umtylǵymyz da kelmeıdi. Tek kópire beremiz. "Baıaǵy jartas...""  dep jazdy Serik Abas-shah.