4 naýryz kúni Almaty qalasy Medeý aýdany ákimdigi «8 naýryz halyqaralyq áıelder» merekesine baılanysty quttyqtaý keshin ótkizdi.
Jambyl atyndaǵy Qazaq memlekettik fılarmonıasynda ótken merekelik sharada Prezıdent jarlyǵyna saı «Altyn alqa» jáne «Kúmis alqamen» Ýıkasova Svetlana Dıkanbaeva jáne Abdıganıeva Zýlfıa Jýmabaeva marapattaldy. Marapattaý rásimine Medeý aýdany ákimi Jylqybaev Erjan Jumatuly qatysyp, analarǵa tósbelgiler taqty. Sondaı-aq barsha áıelder qaýymyna jyly lebizin aıtyp, quttyqtaýyn jetkizdi. İs-shara «Áıeldiń júregi – Álemniń tiregi» konserttik baǵdarlamasymen jalǵasty.
«Qamshy» portaly oqyrmandary nazaryna Erjan Jumatulynyń quttyqtaýyn usynady.
«Armysyzdar aıaýly arýlar!
Qymbatty da qadirli analar!
Sizderdi kóktemniń shýaǵymen birge kelgen 8 naýryz – Halyqaralyq áıelder kúni merekesimen shyn júrekten quttyqtaımyn!
«Áıel - ómir tiregi ǵana emes, áıel - ómirdiń ózi». Óıtkeni ómirge nár berip, oshaqtyń baq-berekesi men jylýyn saqtaıtyn Sizder, qymbatty arýlar.
«İzgilik ataýlynyń bári kúnniń nury men ananyń aq sútinen jaralǵan» osyny umytpaı, biz sizderge árdaıym bas ıip taǵzym etý bizdiń mindet.
Biz qashanda qoǵamnyń damýyn, ómirde – názik, al iste – myǵym áıelder qaýymymen tyǵyz baılanystyramyz.
Táýelsizdiktiń alǵashqy jyldary analarymyz ben apalarymyz el men erge syn bolǵan shaqta qoǵam júgin qaıyspaı kótere bildi.
Tarıhymyzda batyrlar men aqyndardy dúnıege ákelgen, aqylymen el bılegen jáne aıbatymen jaý qashyrǵan analar – qaı kezde de qoǵamnyń baǵy men baqyty, tiregi men júregi, armany men jaýapkershiligi bola bilgen.
Mine sol urpaqtar sabaqtastyǵynyń kýási retinde búgin aramyzda Vera Vasılevna, Shamsha Kópbaıqyzy, Aıagúl Tóreqyzy, Marıam Nurǵalıqyzy, Marfýǵa Aıtqojına sıaqty aýdanymyzdyń qurmetti azamatshalary otyr.
Otanymyzdyń ár qutty qadamy men tabysty isteri Sizderdiń arqalaryńyzda kelgen asyl dúnıe. Elbasymyz aıtqandaı: «Áıel – oshaqtyń uıytqysy, altyn besiktiń ıesi. El bolashaǵynyń barlyǵy áıel azamattarynyń qolynan ótedi» degen sózi barshamyz úshin úlken ónege.
Memleketimizdiń búkil tynys-tirshiliginiń basy – qasynda bolyp, birlik pen turaqtylyqtyń saqtalýyna, el áleýetin kóterýge analarymyz búginde de er azamattarymyzben ıyq tirese eńbek etip kelesizder.
Sondyqtan da barshańyzdyń el damýy jolyndaǵy eren eńbekterińizge zor yqylaspen rızashylyǵymdy bildiremin!»
