Kaspi, Halyk Bank, Qazkom, Astana banki jáne Jınaq banki qazaqstandyqtarǵa málimdeme jasady, dep habarlaıdy tengrinews.kz, málimettiń qazaqsha nusqasyn «Qamshy» portaly oqyrman nazaryna usynady.

Ekinshi dárejeli bank ortalyqtarynyń málimdeýinshe, halyqaralyq kıbermoshennıkter qazaqstandyqtardyń bank esebinen aqsha jymqyrýdyń jańasha ádisin oılap taýypty. Alaıda qarjy ınstıtýttary bankilerdiń onlaın-servısteri buzyp kirýden jaqsy qorǵalǵan.

Bank ortalyqtary sol sebepti de qylmyskerlerge kedergi jasap úlgerdi. Keıbir bankiler tutynýshylaryn saqtandyrý maqsatynda ınternet arqyly aqsha aýdarý isinde qarjyǵa belgili mólsherde shek qoıǵan. Alaıda qaskóıler alǵan betterinen qaıtar emes, olar kez kelgen jolmen tutynýshylardyń logıni men qupıa sózin bilip alýǵa talpynýda.

Qazaqstandyq bank qyzmetkerleri alaıaqtar óz oılaryn qalaı júzege asyratyny jaıly aıtyp berdi. Belgili bolǵandaı, tutynýshy ózine kelgen siltemeni ashyp, ishindegi usynystardy kóredi de, belgisiz papkalardy ashady, keıinnen vırýstan qorǵalmaǵan USB-fleshkalardy paıdalanady. Mundaı jaǵdaıda onyń kompúterine nemese telefonyna vırýs enip ketýi múmkin. Sol vırýstardyń kómegimen tutynýshylardyń logıni men qupıa sózi alaıaqtardyń qolfna tıedi.

Odan bólek alaıaq qońyraý shalyp, ózin bank qyzmetkeri retinde tanystyrýy múmkin. Sonan soń tutynýshyǵa óziniń jeke málimetterin aıtyp berýin suraıdy da, sol arqyly onyń qarjylyq aqparattary men tutynýshynyń jeke shotyna tikeleı jol tabady.

«Mundaı jaǵdaıda bankilerdiń tehnıkalyq qorǵanysy tutynýshylardyń jeke shotyn qorǵaı almaı qalady. Sol sebepti de tutynýshylarymyzǵa ózderiniń jeke málimetterin eshkimge de tis jaryp aıtpaýlaryn ótinemiz jáne de bul máselege barynsha jaýaptylyqpen qaraýǵa shaqyramyz. Solaı jasaǵan kezde ǵana biz alaıaqtardyń isine bóget keltire alamyz», - dep málimdeıdi bank qyzmetkerleri.

Aýdarǵan: Nazerke Labıhan