Búgin Ulttyq kitapthanada belgili jazýshy, etnograf, tarıhshy, ǵalym, “Qarakereı Qabanbaı”, “Has batyr Qabanbaı”, “Tuǵyryl han”, “Demejan batyr”, "Halyq kúıshisi Qaıraqbaı”, “Baspaı” atty kitaptar men birneshe etnografıalyq eńbekterdiń avtory Zeınolla Sánik pen onyń qyzy Janat Zeınollaqyzy birlesip jazǵan «Qazaq etnografıasy» atty kitabynyń tusaýkeseri bolyp ótti, dep habarlaıdy «Qamshy»

Atalmysh kitapta qazaqtyń turmys-salty, týystyq ataýlar men olardyń maǵynalary, sharýashylyǵy jaıynda keńinen túsinik berilgen. Kitap 3 bólimnen turady:

İ bólim – Etnografıa degenimiz ne?

İİ bólim – Zattyq etnografıa týraly túsinik

İİİ bólim – Rýhanı etnografıa

«Bul kitap ulttyq bolmys pen minezdi ǵana emes, búkil qazaq halqynyń shyǵý teginen bastap ómiriniń barlyq san-salasyn tolyq qamtyıdy. Tek áleýmettik turǵyda emes, bıologıalyq, ıaǵnı qaıtalanbas qubylys esebinde de qarastyrady. Sondaı-aq qanshama alasapyran jaǵdaı bolsa da, óz birligin ustap turǵan etnos týraly málimetterge keńinen sholý beredi» - dep jazylǵan kitaptyń anotasıasynda.

2013 jyldyń 26 qyrkúıeginde ómirden ozǵan qalamgerdiń izin jalǵastyrýshy urpaq – óziniń qyzy Janat Zeınollaqyzy da ákesiniń salǵan sara jolyn jalǵap, osy baǵytty ustanýdy jón kórgen. Búkil januıasy fılolog, jazýshy, etnograf, tarıhshy bolyp keletin otbasyda Gúlsat Zeınolla atty qyzy ǵana tehnolog mamandyǵyna bet burǵan eken.

Bolashaqta Zeınolla Sániktiń jazǵan eńbekterin 20 tomdyq etip shyǵarmaq maqsatta. Bul jaıynda qalamgerdiń aıaýly jary Shámshibaný Ǵamzaqyzy baıandap berdi. Shyńjań ýnıversıtetinde fılologıa mamandyǵyn támamdaǵan Shámshibaný apamyzdyń da aqyndyq óneri bar. Sonymen qatar, Qytaıdyń birneshe qalalarynda apamyzdyń 5 óleńder jınaǵy jaryq kórgen.

«Búgin osy kitabynyń jaryqqa shyǵyp, tusaýkeseri bolyp jatqandyǵyna qatty qýanyp, tolqyp turmyn. Etnografıa búkil bir halyqtyń ómirin beıneleıdi. El bolamyn deseń, etnografıańdy durysta deıdi. Kez kelgen memlekettiń óziniń etnografıasy bolýy kerek. «Qazaq etnografıasy» – ulttyń maqtanyshy. Sol sebepti qazir qýanyshtan tolqyp otyrmyn. Zekeń ózi bolsa, qazir osynyń barlyǵyn kóretin edi. Eń aldymen, halyqqa rahmet. Osy etnografıa úshin, aýyryp júrse de, 10-15 jyldaı materıal jınap, aıanbaı eńbek etip jazyp shyqty, aqyryndap baspaǵa ótkizdi. Bul kitap eń alǵash Úrimjide arab jazýynda jaryq kórgen. Muny tóte jazýdan qazaq tiline aýdaryp, ózderi basqaryp, búgingi kúni tusaýkeserin jasap otyrǵan Qazaqstan Jazýshylar odaǵyna, sonymen qatar Nurlan Orazalın bastaǵan redaksıalar alqasyna úlken rahmetimdi aıtamyn. Osyndaı kitapty basyp shyǵaryp, elge jetkizip otyrǵan «An Arys» baspasynyń qyzmetkerlerine de alǵysymdy bildiremin», - dep qalamgerdiń jary Shámshibaný Ǵamzaqyzy óziniń júrekjardy lebizin jetkizdi.

Qamshyger: Nazerke Labıhan