Qazaqstan úkimetiniń basynda baqandaı alty jyl otyryp, aýyz toltyrarlyqtaı is atqara qoımaǵan Másimov, Qazaqstannyń 9 Premer-mınıstri bolyp qaıta taǵaıyndalǵan kóktemde onymen birge qazaqqa bir qýanysh kelgen. Ol oralmandarǵa qysqa ýaqyt ishinde azamattyq berý máselesi men olardyń azamattyq alýy úshin talap etiletin artyq sharttardyń joıylatyny týraly Dúısenova hanymnyń málimdemesi edi.
Másimov alǵash úkimet basynda otyrǵan tusta shetten kelgen etnıkalyq qazaqtarǵa jasalatyn kóp jeńildik alynyp tastalǵan bolatyn. Onyń ishinde túrli qujattyq jeńildiktermen qatar olarǵa beriletin qonystandyrý kómek aqysy kvota da joıylǵan. Al, byltyr úkimet bastap, depýtattar qostap, shetelderden elge oralatyn etnıkalyq qazaqtardyń ata zańdaǵy mártebesin aıaqqa taptaıtyn, olarǵa tek tórt jyldan keıin ǵana azamattyq berý týraly zań qabyldap jibergen. Sondaı-aq, olar Qazaqstan azamaty ataný úshin belgili aımaqtarda ǵana turýy ári tólem qabletin dáleldeýi kerek edi. Sáýir aıynda Másimovtiń mınıstrler kabıneti jasaqtala sala, Tamara Dúısenova hanym habarlaǵan jańalyq dúnıeniń ár túkpirindegi qazaqty qýantqanymen, ol zań júzinde áli bekitilgen joq.
Al, tamyzdyń 6-sy kúni, Úkimettiń keńeıtilgen otyrysynda Qazaqstan Respýblıkasynyń Premer-mınıstriniń orynbasary Gúlshara Ábdihalyqova oralmandardyń jaǵdaıy týraly baıandama jasaǵan bolatyn: "Jyl basynan beri elimizge jeti myń otbasy nemese 135 myń oralman kóship keldi. Olarǵa "Jol kartasy" baǵdarlamasy aıasynda jaǵdaı jasap jatyrmyz. Qazirgi kúni jumysqa ornalastyrý máseleleri qarastyrylyp sheshilýde. Kúzde parlamenttiń sesıasyna jańa zań usynyp, olardyń jaǵdaıyn kótere túsemiz", - degen mınıstr hanym. "Qandastarymyzǵa jol ashýymyz kerek. Qazaqtyń jeri keń. Ornalasamyn degen jerin ózi tańdasyn. Ońtústikte halyqtyń tyǵyzdyǵyn, al soltústikte azdyǵyn da eskerý qajet. Kelgen jastar óz bolashaǵyn jasaý úshin múmkindikterdi paıdalanýy tıis. Osy oraıda Úkimet barlyq jaǵynan qoldaý bildirýi kerek"», - dep edi sol otyrysta Elbasy Ábdihalyqova hanymnyń sózin tyńdap.
Úkimet otyrysynda Elbasy aıtqan sózdiń nátıjesi kútiletin kez endi keldi. Ol úshin, 60 kún demalyp, jumysqa kele sala óz kanıkýlderin qysqartý týraly oılanǵan depýtattardan jańa pármender kútemiz jáne olardyń aıtqan jumysqa qajet shıraqtyǵyn úkimetten de kútemiz. Sebebi Úkimet tezdetip Parlamentke ózderi ýáde etken zańdy usynýy kerek.
Nurǵalı Nurtaı
