Tumandy Albıon elinde turyp jatqan qazaqtar ulttyq meıramdardyń eshbirin qalt jibermeıdi. Shette júrse de, olar ultymyzdyń rýhanı mádenıetin saqtap, halqymyzdyń ádet-ǵuryptaryn bir sátke de umytpaq emes. 
Árıne, Ulybrıtanıada bilim alyp jatqan qazaqstandyq stýdent Tımýr Ábdireshtiń aıtýynsha, ulttyq meıramdardyń ishinde Naýryz merekesiniń shoqtyǵy bıik. Týǵan jerden jyraqta júrgen qazaqtar Ulystyń uly kúnin erekshe ystyq yqylaspen atap ótedi. 

«Men oqıtyn Newcastle qalasynda Newcastle Kazakh Society atty uıym bar. Osy qaladaǵy búkil qazaq stýdentteriniń basyn biriktirip otyr. Jalpy, bul jerde stýdentter óte uıymshyl ári birligi jarasqan. Naýryz merekesine bir kisideı jumylyp, daıyndalady. Ulystyń Uly kúni bári jınalyp, meıramdy ý-shý bolyp atap ótedi. Bireýi kóje, ekinshisi palaý, qalǵandary baýyrsaq pisirip ákeledi. Kóje iship ári dámdi baýyrsaqtan aýyz tıgen stýdent bir sátke týǵan jerine sapar shekkendeı bolady. Syrtta júrgen qazaq jastaryna Naýryz merekesi osyndaı bas qosýlarmen este qalady», — deıdi Newcastle University stýdenti.

Onyń aıtýynsha, Newcastle Kazakh Society munymen shektelmeıdi. 2014 jyly Naýryz erekshe formatta toılanypty.  «Into Newcastle University ǵımaratynyń qabyrǵasynda Naýryz meıramyna oraı Qazaqstanǵa arnalǵan tanystyrý kórmesi ótti. Ulttyq kıim kıgen qyz-jigitter bı bılep, án shyrqady. Aıta ketý kerek, basqa eldiń stýdentteri bul sharaǵa erekshe qyzyǵýshylyq tanytyp, qazaq halqynyń mádenıeti, ulttyq kıimi jáne salt dástúri týraly suraqtaryn aıaǵan joq», — dep áńgimeledi Tımýr. 
Álbette, Ulystyń uly kúnin naýryz kójesiz toılaý múmkin emes. Naýryz kóje molshylyqtyń joralǵysy retinde naýryzda mindetti túrde ázirlenedi. Shette júrgen qazaq stýdentteri de bul dástúrdi buzbaıdy eken. 

«Naýryz kójeni úıde qalaǵan adam pisirip ákeledi. Bul jaqta arnaıy musylmandardyń dúkenderi bar. Sol jerden aıran, arpa jáne basqa dánderdi tabýǵa bolady», — deıdi qazaqstandyq stýdent.  Tımýr Ábdiresh áńgimelegendeı,  áz-Naýryzǵa oraı merkelik sharalar Brıtanıanyń túkpir-túkpirinde uıymdastyrylady. Qazaq stýdentteriniń qaýymdastyqtary ár qalada bar. Ásirese, Londonda Naýryz meıramy keńinen toılanady. 

«Byltyr Brıtanıanyń astanasynda dástúrli Naýryz festıvali ótip, oǵan Orta Azıa elderiniń ókilderi qatysty. Sóıtip, Londondaǵy naýryz jetinshi ret toılandy. Ózbek, tájik, qyrǵyz, ázirbaıjan jáne qazaqtar birge Ulystyń uly kúnin toılady. Kıiz úıler tigilip, ulttyq taǵamdar daıyndaldy. Bul festıvalge araldyń túkpir-túkpirinen bir-birin kópten kórmegen stýdentter jınalyp, tós taǵystyryp jatty. Shetelde júrse de halyqty biriktiretin Naýryz meıramy osymen kudyretti emes pe?!», — dep túıdi sózin Tımýr.

Derekkóz: sputniknews.kz