Qazaqstan telearnasyndaǵy Láılá Sultanqyzy júrgizetin «Áıel baqyty» baǵdarlamasy eshkimge de tańsyq emes. Taqyrybynyń ózi aıtyp turǵanda baǵdarlamanyń ár bólimi áıelderdiń ómirine arnalǵan. Qyz balanyń turmys quryp kelin atanýynan bastap, aq jaýlyqty áje bolǵan áıel zatynyń basynan keship otyrǵan jaǵdaılardyń bári derlik osy baǵdarlamada qyzý talqylanyp otyrady. Al «báıbishe-toqal» máselesi qaı qoǵamda bolmasyn pikirtalas týdyratyny anyq. Bul taqyryp tóńireginde «Áıel baqyty» da sóz qozǵady.

Onda árkim óz pikirin aıtyp, qarsy shyǵyp jatqandarmen qosa jaqtaıtyndar da tabyldy.

Baǵdarlamaǵa óz bastyǵynyń toqaly bolyp júrgen Astana qalasynyń turǵyny da kelip, toqaldyń shynaıy ómiri qandaı bolatynyn aıtyp berdi.

Dına Erlanqyzy osydan 6 jyl buryn 26 jasynda óziniń bastyǵyna turmysqa shyqqan. Ol toqal bolýdyń ońaı emestigin, onyń ústine zańdy nekege turmaǵanyn aıtty. Dese de, kúıeýiniń ortaq balalaryn jaqsy kóretinine senimdi.

«Osydan 6 jyl buryn ózimnen jıyrma jas úlken azamatqa turmysqa shyqtym. Ol kezde 26 jasta bolǵanmyn. Úı sharýasymen, eki ulymnyń tárbıesimen aınalysamyn. Úlkeni 5 jasta, kishisi 3 jasta. Joldasym – jeke kásipker. Barlyq jaǵdaıymyzdy jasap jatyr. Jas kezimde turmysqa shyǵýǵa usynys jasaǵan azamattar kóp boldy. Biraq olardy unatpadym. Al kúıeýim menen 20 jas úlken bolsa da, ózine erekshe kútim jasaıdy. Bastapqyda otbasynyń bar ekenin bildim, keńsesinde bir jyl menedjer bolyp jumys istedim. Oǵan qaramaımyn dep oıladym. Qandaı da bir sheshim qabyldaýǵa materıaldyq jaǵdaıy áser etken emes. Aqyry qatty baýyr basyp, bala kóterip qaldym. Áke-sheshem toqal bolýyma qarsy boldy. Bala týǵanǵa deıin menimen aralaspaı qoıǵan edi, qazir jaqsy qarym-qatynastamyz», - deıdi astanalyq arý.

Onyń sózderine qaraǵanda, kúıeýiniń birinshi áıeli alǵashynda qarsy bolǵan eken. biraq kónbeske amaly qalmaǵan. Kelinshektiń balalaryn «toqaldan týǵan» dep bóletin kórinedi.

«Alǵashqy bir jyl enemmen, báıbishemen bir shańyraq astynda turdyq. Qazir bólek turyp jatyrmyz. Meniń balalarymdy «toqaldan týǵan» dep bóledi. Balalarymnyń bolashaǵy úshin ýaıymdaımyn. Osyndaı problemanyń bolatynyn aldyn ala bildim.  Meshitke baryp nekemizdi qıyp, balalaryma óziniń tegin berdi. Báıbishemniń uly menen 3 jas kishi. Jýyrda ol óziniń úılenetinin aıtyp, bizdi bólek shyǵartqyzdy. Kúıeýim báıbishesine qaraǵanda, menimen kóbirek ýaqyt ókizedi. Ol menen suranbaıdy. Dese de, onyń birinshi otbasyna baryp turýyna, aralasýyna qarsy emespin», – deıdi Dına.

Dınanyń pikirin sol jerde otyrǵan mamandar jaqtyrmady. Tipti, ashýyn keltirdi desek te bolady.

Psıholog Erjan Qýandyquly uıyp otyrǵan shańyraqty buzyp, kúıeý taýyp aldym dep ózin baqytty sanap otyrǵan áıeldi naǵyz baqytsyz dep bildi:

 «Siz kúıeý taýyp, jaǵdaıyńyzdy durystap alǵanyńyzǵa qýanyp otyrsyz. Onyń ústine balalaryńyz da bar. Biraq sizdi kúıeýińizdiń birinshi áıeli qalaı qabyldady? Otbasyn buzyp jatyrmyn degen qorqynysh sizde bolmady ma? Eshbir esi durys áıel kúıeýin basqa bireýmen bóliskisi kelmeıdi», – deıdi ol.

«Ol menimen kezdespeı jatyp otbasyna toqal alǵysy kelgenin jarıa etken. Báıbishem óz kelisimin bermegen. Meniń kelýime amalsyz kónýine týra keldi. Meni betashar jasap turyp qarsy aldy. Eki qyzy men ulynyń óz otbasylary bar. Al kishisi tym qatty erke. Aýyr sózder aıtyp qoıady. Ásirese, balalaryma «Bul seniń úıiń emes. Eshnársege tıisýshi bolma!» dep aıtyp otyrady. Kúıeýim meni saǵyndyrmaı jıi janymda bolýǵa tyrysady. Qyzym ósip toqal bolǵysy kelse, shyn súıse, jolyna bóget bolmaımyn. Óıtkeni ózim baqyttymyn ǵoı. Árıne, maǵan toqal bolmaýǵa keńes bergender boldy. Biraq ómir osylaı bolyp qaldy.

Toı-tomalaq máselesi qıyndaý. Barǵan jerimde enem meniń toqal ekenimdi aıtyp qoıady. Qoǵamnyń pikirinen qoryqpaımyn. Sebebi, artqa sheginetin jol joq. Kúıeýim úshinshi áıel alǵysy keletinin aıtsa, men qarsy emespin. Báıbishem meni qalaı qabyldasa, men de ony týra solaı qabyldaımyn. Kúıeýim qaıtys bolyp ketse, bala-shaǵamnyń ómiri qalaı bolar eken dep ýaıymdaımyn. Biz zańdy túrde úılenbegendikten, múlik máselesi kóterilmedi. 5-10 jyldan keıin barlyǵy jaqsy bolady dep senemin. Óte aqyldy azamat, balalaryn qatty jaqsy kóredi», – deıdi Dına hanym.

Baǵdarlama barysynda toqaldyqty qoldaıtynyn bildirgen adamdar da boldy. Sonyń biri zańger Aınur Mahmetova.

 «Jurt toqal bolyp otyrǵan adamdardy shalqyp ómir súrip jatyr dep oılaıdy. Negizinde olaı emes. Olar kerisinshe óz eńbekterimen eshkimnen qalyspaý úshin tyrmysyp ómir súredi. Toqaldyqqa tek materıaldyq múddemen barady degen qate pikir. Olar shyn súıip, kúıeýine birinshi áıelinen almaǵan jylýlyqty beredi. Barlyǵyna birdeı kiná taǵýǵa bolmaıdy. Men negizi toqaldyqty ózim qoldaımyn», – deıdi ol.