Aqtóbe oblystyq mamandandyrylǵan qylmystyq ister jónindegi aýdanaralyq sotynda otbasylyq janjalǵa qatysty sot otyrysy bastaldy. Áıelin aıaýsyz pyshaqtap, malsha baýyzdaǵan Denıs Kýlashtyń isine sýdıa Nurlan Sultanov tóraǵalyq etedi dep habarlaıdy Nur.kz portaly.

Oqıǵa 2016 jyldyń 16 qarashasynda bolǵan. Sottalýshy Denıs Kýlash aýyryp qaıtys bolǵan inisiniń jerleý rásiminen keıin ishimdik ishedi. Aıyptaý paraǵynda jerleýden qaıtqan sottalýshynyń úıine qaıtar jolda dúkennen araq alyp, áıelimen birge otyryp ishkeni jazylǵan.

"Jerleý rásimine týystaryń az keldi, seni syılamaıdy" dep birneshe ret aıtqan áıeliniń sózine ashýlanǵan Kýlash oǵan asqana pyshaǵyn eki ret tyǵyp alǵan. Sol kezde áıeli aıqaılap kómek surap, qashýǵa umtylady. Kúıeýi artynan qýyp júrip, taǵy da birneshe jerinen pyshaq salady. Arqasymen jerge qulaǵan áıeliniń denesine taǵy da pyshaq salyp, uryp, teýip tastaıdy. Alaqanyn pyshaqpen jaraqattap alǵan sottalýshy as úıden ekinshi pyshaqty ákelip urǵan.

Sottalýshy áıeline 41 ret pyshaq jaraqatyn salǵan.

Aıyptaýda sottalýshynyń áıeline 41 ret pyshaq jaraqatyn keltirip, tamaǵynan baýyzdap tastaǵany aıtyldy. Qınap óltirgen áıelin tastap, tanysyna baryp taǵy ishedi. Alys týysyna iship otyryp áıelin óltirip tastaǵanyn aıtqan. Ol senbeıdi.

Túnde úıine qaıtyp kelgen sottalýshy qylmysyn jasyrý úshin áıeliniń denesin tósek japqyshqa orap, daladaǵy dárethanaǵa tastaıdy. Qanǵa boıalǵan kıimderdi órtep, bir pyshaqty dárethanaǵa salyp jibergen. Áıeliniń qany juqqan ekinshi pyshaqty tazartyp, as úıge qaıta aparyp qoıady. Úıin tazartyp qoıǵan sottalýshy alǵashynda áıelin óltirgenin týystarynan jasyrady. Sottalýshy sotta kinásin tolyq moıyndady.

Ózimdi ustaı almadym

"Ne bolǵanyn bilmeımin. Áıelimmen úsh bótelke araqty bólip ishtim. Ózimdi ustaı almadym. Ony as úıdegi nan týraıtyn pyshaqpen óltirdim. Qansha soqqy bergenim esimde joq. Tamaǵynan soldan ońǵa qaraı kestim. Qan kóp ketti. Áıelim: "Sen ne istep jatsyń?" degende ǵana esimdi jıdym. Kesh boldy. Denesin dárethanaǵa tastap, barlyq jerdi jýyp qoıdym. Esikti jaýyp, úıde taǵy ishtim. Uıyqtaı almadym. Áıelim túsime kirdi. Bári qas qaǵym sátte ótti", - deıdi Kýlash.

- "Qalaı qas qaǵym sát? 41 ret pyshaq salǵansyń. Ony 1-2 mınýtta jasaý múmkin emes. Siz sıyr, qoı, shoshqa soıyp kórdińiz be?", - dep surady sýdıa Sultanov.

- "Iá..."

- "Olar qınalmasyn dep birden óltiredi. Solaı emes pe? Siz ne istedińiz? Meniń túsingim keledi. Kómek suraǵanyna qaramastan nege qınadyń", - degen sot tóraǵasyna sottalýshy "Ol kezde ne istegenimdi túsingen joqpyn" dep jaýap berdi.

Dárethanada jatqan áıeldiń denesin páter ıesi taýyp alǵan. Polısıa men týystaryna habar bergen.  Sotta kýágerlerden jaýap alyndy.