Sháken Aımanov atyndaǵy «Qazaqfılm» AQ jaryqqa shyǵarǵan «Qunanbaı» jáne «Jańǵaq tal» fılmderi sáýirdiń 19-y men 21-i aralyǵynda Qytaıdyń astanasynda Halyqaralyq Beıjiń kınofestıvaliniń (Beijing International Film Festival) «Panorama» baǵdarlamasynda kórsetiledi, - dep habarlaıdy «Qamshy» aqparattyq agenttigi «Qazaqfılm» AQ baspasóz qyzmetine silteme jasap.

«Fılmniń festıvldi taǵdyry jalǵasyn taýyp jatqanyna óte qýanyshtymyn. Kartınanyń jelisi meıirimge toly, sondyqtan da qytaılyq kórermenderdiń kóńilinen shyǵatynyna senimdimin», - dedi «Jańǵaq tal» fılminiń rejıseri Erlan Nurmaǵambetov.

Esterińizge sala ketsek, kishigirim aýyl ómiri beınelengen «Jańǵaq tal» fılmi Ońtústik Koreıadaǵy Pýsan festıvalinde álemdik premerasyn ótkizip, onda New Currents («Jańa aǵym») seksıasy aıasynda bas júldeni ıemdengen bolatyn. Sonymen qatar, atalmysh kartına Vezýldegi Azıa kınolary 22-i Halyqaralyq kınofestıvaliniń negizgi baıqaýynda kórsetilip (Fransıa, 2016 jyl), eki birdeı júldege - halyqaralyq qazylardyń arnaýly júldesine jáne kıno synshylarynyń arnaýly júldesine ıe boldy.

«Osydan birneshe jyl buryn marqum Talasbek Ásemqulov ekeýimiz «Birjan sal» fılmin kórsetý úshin Qytaıǵa arnaıy baryp edik. Kórsetilimge 500-ge jýyq halyq qatysty, olardyń arasynda qazaqtar da boldy. Fılmdi óte jaqsy qabyldady. «Qunanbaı» fılmi de qytaılyq kórermenderge unaıdy degen oıdamyn», - dedi «Qunanbaı» fılminiń rejıseri Dosqan Joljaqsynov.

Uly oıshyl Abaıdyń ákesi - Qunanbaı Óskenbaıulynyń ómiri jaıly baıandaıtyn tarıhı týyndy elimiz boıynsha prokatqa 2015 jyly shyǵyp, kórermenniń kózaıymyna aınalǵan bolatyn. Fılmdi QR Prezıdenti N.Á.Nazarbaevt ta, Memleket te joǵary baǵalady. Elbasy QR Táýelsizdik kúnin toılaý qarsańynda 2016 jyldyń ádebıet pen óner salasy boıynsha Memlekettik syılyqty fılmniń túsirý tobyna úlestirdi. Jarlyqqa sáıkes premıa rejıser - Dosqan Joljaqsynovqa, qoıýshy sýretshi - Rýstam Odınaevqa, sonymen qatar akterler - Nýrsıfat Salyqovaǵa jáne Aıdos Bektemirge berildi.

Sonymen qatar, alǵashqy ulttyq «Tulpar» kınopremıasynda fılmniń avtorlary úzdik atanyp, «Úzdik er adam róli», «Úzdik qoıýshy sýretshi», «Úzdik kompozıtor», «Úzdik senarı» atalymdar boıynsha tórt birdeı júldege qol jetkizdi. Odan bólek, Ýfada ótken III halyqaralyq ulttyq jáne etnıkalyq kıno «Kúmis Aqbozat» festıvalinde Ámir Ábdirazaqov atyndaǵy «Ulttyq rýh» júldesin ıelengen.

Beıjiń halyqaralyq kınofestıvali Qytaıdyń baılanys, radıo, kınematografıa jáne telearnalar bas basqarmasy jáne Pekınniń mýnısıpalıtet halyq úkimeti, sondaı-aq Qytaıdyń kıno jónindegi basqarmasynyń uıymdastyrýymen ótkiziledi. Baıqaý uıymdastyrýshylarynyń aıtýyna qaraǵanda, Pekın festıvali jyldan jylǵa damyp, búginde Azıada ótip jatqan kınofestıvalderdiń aldynda tur. Bıyl baıqaýǵa 90 elden 1000-ǵa jýyq kınotýyndylar qatysyp otyr. Olardyń ishinen negizgi baǵdarlamaǵa 15 fılm iriktelip alynǵan.

Konkýrstyq baıqaýǵa usynylǵan fılmderdiń úzdigin belgili dat rejıseri Bıll Avgýsttyń basshylyǵymen halyqaralyq qazylar alqasy anyqtaıtyn bolady.