QR Mádenıet jáne sport mınıstri Arystanbek Muhamedıuly Túrkitildes memleketterdiń yntymaqtastyq keńesiniń bas hatshysy Ramıl Gasanovpen kezdesti. Kezdesýde sport jáne týrızm salasyndaǵy máseleler talqylandy dep habarlaıdy "Qamshy" aqparattyq agenttigi.

Kezdesý barysynda taraptar yntymaqtastyqqa baılanysty  máseleler boıynsha jan-jaqty pikir almasyp, týrızm, mádenıet jáne sport salasyndaǵy kóptegen suraqtardy talqylady.

Túrkitildes memleketterdiń yntymaqtastyq keńesi sheńberinde ótkiziletin sharalarǵa toqtalǵan Ramıl Gasanov sońǵy eki jylda týrızm salasyndaǵy baılanystardyń keńeıgendigin atap ótti.

Onyń pikirinshe, Uly Jibek Jolyn tartymdy týrısik baǵytqa aınaldyrý úshin túrkitildes memleketterdiń ózara kúsh-jigeri qajet. «Zamanaýı Uly Jibek Joly» atty Túrik keńesiniń týrısik ónimi osy sala yntymaqtastyǵyndaǵy kún tártibiniń mańyzdy bólimi bolyp tabylady. 

Áńgime barysynda, túrkitildes memleketterdiń mádenıet, til men tarıh ortaqtyǵynyń arqasynda, Túrik keńesi aımaqtyq ózara baılanystyń biregeı úlgisine aınalǵandyǵy atap ótildi. Mysaly, tarıh salasyndaǵy naqty nátıje XV ǵasyrǵa deıingi túrkitildes halyqtardyń tarıhyna arnalǵan jalpy túrik tarıhy oqýlyǵyn ázirleý bolyp tabylady. Jastar men sport taqyryby da yntymaqtastyqtyń mańyzdy salasy bolyp otyr. Osyndaı ózara tıimdi jumys qorytyndysy – Qyrǵyzstan Respýblıkasynda ótkizilgen Dúnıejúzilik kóshpendiler oıyny.   

Túrkitildes memleketterdiń yntymaqtastyq keńesiniń bas hatshysy Ramıl Gasanov Túrik keńesi qyzmetiniń qorytyndylary men aldaǵy jumystar týraly aıtyp ótti. Ol qazaqstandyq áriptesterine túrkitildes memleketter yntymaqtastyǵyn damytýǵa qosyp jatqan úlesteri úshin alǵys bildirdi. 

Arystanbek Muhamedıuly Qazaqstan Túrik keńesiniń jan-jaqty damýy men nyǵaıýyna nıetti ekendigin, qazaqstandyq taraptyń onyń qyzmetine qajetti kómekti kórsetýge daıyn ekendigin atap ótti.  Tıisti aımaqtyq jáne halyqaralyq uıymdarmen tyǵyz áriptestik qatynasty ornatý arqasynda Túrik keńesi  túrkitildes memleketterdiń turaqtylyǵy men damýyna óz úlesin qosýda.

Esterińizge salasaq, 2009 jylǵy 3 qazanda Nahchyvan qalasynda (Ázerbaıjan Respýblıkasy) ótken Túrkitildes memleketter basshylarynyń 9-shy Samıtinde QR Prezıdenti N.Á.Nazarbaevtyń bastamasymen Túrkitildes memleketter yntymaqtastyǵy keńesin qurý týraly Kelisimge qol qoıyldy.

Atalmysh Kelisimniń qabyldanýy túrki halyqtarynyń birligin nyǵaıtýdy kózdegen aımaqtyq elaralyq birlestikti qurýǵa negiz qalady.

Túrki Keńesiniń múshe-memleketteri Ázerbaıjan, Qazaqstan, Qyrǵyzstan jáne Túrkıa bolyp tabylady. Túrki Keńesiniń Hatshylyǵy qurylyp, oǵan Keńestiń samıtteri barysynda qabyldanǵan sheshimderdiń oryndalý barysyn zerdeleý, joǵary deńgeıdegi kezdesýler men sarapshylar otyrystaryn daıyndaý jáne basqa mindetter júkteldi.