(Sh.Qaldaıaqov pen M.Shahanovty kinálaǵan daý qalaı aıaqtaldy?)
Qazaqstan Ulttyq telearnasyndaǵy ózekti máselelerdi qozǵaıtyn «Aıtýǵa ońaı» baǵdarlamasynyń kezekti sany «Asqaq sezim jyrshysy» degen taqyrypta daryndy sazger, án ónerinde ózindik dara bıigi bar Shámshi Qaldaıaqovtyń jurt nazarynan qalys qalyp qoıǵan týyndylaryna jáne eń bastysy, Muhtar Shahanovtyń sózine jazylǵan, dál qazir aınalasyna úlken daý týyndatqan «Aqsýdan ushqan aqqýym» ánine arnaldy.
Habarǵa aqyn qoǵam qaıratkeri Muhtar Shahanov, Shámshi Qaldaıaqovtyń qaryndasy – Raıhan Qaldaıaqova, kompozıtor, shámshitanýshy Qaldybek Qurmanáli, aqyn-sazger, dramatýrg Israıl Saparbaı, Respýblıkalyq sport kolejiniń dırektory Amalbek Tshanov, Shámshi týraly beınematerıal túsirgen belgili rejıser Tilegen Ahmetov, Mádenıet qaıratkeri, án shyrqaý ónerinde ózindik dara bitimimen, sazdy daýsymen halyqtyń júregin baýraǵan tanymal ánshi Jubanysh Jeksenuly, sazger, án árleýshi Baǵlan Omarov t.b. qatysty.
Baǵdarlama Muhtar Shahanov pen Shámshi Qaldaıaqovtyń shyǵarmashylyq birliginen týǵan «Arqalyqtyń aq tańy» ánin Jubanysh Jeksenulynyń oryndaýymen bastaldy. Ánnen soń «Aıtýǵa ońaı» baǵdarlamasynyń júrgizýshisi Beısen Quranbek Shámshi murasynyń ishinde halyq arasyna keń taraǵan ánder men qatar belgisiz bolyp qalyp jatqandary bar ekenin, endi bir ánderiniń avtorlyǵyna kúmánmen qaraıtyn jandar da kezdesetinin aıtyp ótti. Muhtar Shahanov pen Shámshi Qaldaıaqovtyń birlese jazǵan ánderiniń qatarynyń da mol ekenine toqtalyp, Muhtar aǵaǵa qarata «Ekeýińizdiń shyǵarmashylyq jaqyndyqtaryńyz týraly aıtyp ótseńiz» degen suraý tastady.
Muhtar Shahanov: «Tólegen Aıbergenov, Shámshi Qaldaıaqov úsheýmiz erekshe dostyq qarym-qatynasta boldyq. Anam marqum 13 qursaq kótergen, sonyń ishinde menen basqasy túgel o dúnıelik bolyp ketken. Neshe balańyz bar dep suraǵan adamdarǵa: «Meniń úsh balam bar: úlkeni – Shámshi Qaldaıaqov, ortanshysy – Tólegen Aıbergenov, kishisi – myna Muhtar» – deıtin. Shámshi de, Tólegen de anamdy erekshe qadirleıtin. Shámshi ekeýmiz birlese jazǵan «Alǵashqy kezdesý», «Egiz maqta», «Gúl tańdaý», «Kelin keldi» sıaqty t.b. ánderimiz áli kúnge deıin aıtylmaı, umyt qalyp keldi. Mysaly, «Ómir-ózen» áni 32, «Arqalyqtyń aq tańy» áni 42, «Súımegender saǵynbaıdy» áni 43 jyldan soń el súıispenshiligine bólenip jatyr.
«Aqsýdan ushqan aqqýym» ánin 1968 jyly Aqsý degen tamasha ózeni bar qazirgi Tóle bı aýdany, Mádenı aýylyna barǵanymyzda sol jergilikti halyqqa tartý retinde jazǵan bolatynbyz. Tóle bı aýdany buryn Lengir, Mádenı aýyly Komýnızm kolhozy atalatyn. «Biz bul ánimizdi Lengir aýdanyna qarasty «Komýnızm» kolhozynyń kollektıvine arnaımyz. Avtorlar» degen alǵysózimen Shámshiniń óz qolymen jazǵan notasymen birge 1968 jyldyń 13 sáýiri kúni «Ońtústik Qazaqstan» gazetiniń №73 sanynda jarıalanǵan bolatyn.
Osy kúnge deıingi shyǵarmashylyq jolymda bireýdiń bir jol sózin ózime menshiktep kórgen jan emespin. Shámshide de ondaı minez atymen joq. Eger ánimiz gazet betine jarıalanbaǵan bolsa, biz shynynda da urylar qataryna kirip te ketedi ekenbiz».
Budan soń baǵdarlama ekranynan Muhtar Shahanov pen Shámshi Qaldaıaqov týraly jasalǵan beınesújet berildi. Erekshe darynymen, kúrdeli oılarymen, asqaq poezıasymen halqyna birden tanymal bolǵan aqynnyń jas kezindegi jalyndap jyr oqyp turǵan, bir sátke jalǵyz oıǵa shomǵan sáti men oqyrmandarynyń mahabbatyna bólenip qoltańba berip turǵan kezi óte áserli kórinister boldy.
Shámshi Qaldaıaqov týraly beınesújette kompozıtordyń 60 jyldyq mereıtoıynan kórinister berildi. Daryndy kompozıtordan qalǵan osy bir jalǵyz beınesújettiń avtory rejıser Tilegen Ahmetov óz sózinde onyń halyqty ánmen terbegen týyndylary kóp bolǵanymen, tasqa basylǵan estelikterdiń tym azdyǵyna qynjylys bildirdi.
Baǵdarlamaǵa arnaıy kelgen Shámshi Qaldaıaqovtyń týǵan qaryndasy Raıhan Qaldaıaqova: «Óte jaqyn qarym-qatynasta bolǵandyqtan Shámshi aǵam men Muhtar aǵamnyń ortasynda ekeýin de aǵa tutyp óstim. Ekeýin adamı syılastyqtan basqa ónerge degen yntalary da erekshe jaqyn etti. Ózin qazaqpyn dep sanaıtyn kez-kelgen jan olardyń erekshe daryn ıeleri ekenin moıyndaıdy. Olarda bireýdiń ónerin, bolmasa darynyn moıyndamaý, kóre almaý, qyzǵaný degen túsinik múlde joq. Sóıte tura, myna «Aqsýdan ushqan aqqýym» ánine qatysty daýly jaıtty estigende «tóbemnen jaı túskendeı» qalde boldym. 1968 jyldyń kókteminde eki aǵamnyń jazǵan ánin men Muhtar aǵanyń úıinde otyryp, Shámshi aǵamnan úırengen edim. Endi olardyń osy ánin «Qudash Muqashevtiki eken» deý, Shámshi men Muhtar ury degen sóz emes pe? Bul ǵaıbat sózdi aıtýǵa qoldarynda qandaı dálelderi bar? Eger Qudash Muqashevtiń kitabyna alǵysóz jazǵan segiz adamnyń atynan ne jubaıy Aqjoltaı Jylqybaıqyzy, ne ózge qol qoıǵan adamdar qate oılaryn moıyndap, arnaıy keshirim suramasa, avtorlyq quqyqty qorǵaý zańyna saı sotqa shaǵymdanamyn. Óıtkeni men óz sózimniń durystyǵyna júz paıyz senimdimin, oǵan qosa ánniń meniń aǵalarymdiki ekenin dáleldeıtin aıǵaqtar jetkilikti» – dep aǵalarynyń murasyn qorǵaýda qandaı iske de bolsyn baratynyn bildirdi.
Sol ýaqytta Muhtar aǵa men Raıhan apanyń sóziniń dáleli – «Ońtústik Qazaqstan» gazetiniń 1968 jylǵy 13 sáýirdegi №73 sany, ondaǵy án mátini úlken masshtabta baǵdarlamadaǵy ekrannan kórsetildi.
Beısen Quranbek qarsy tarapqa, ıaǵnı, kitapqa alǵysóz jazǵan adamdarǵa habarlasqandaryn, biraq olardyń barlyǵy ártúrli sebeppen baǵdarlamaǵa qatysýdan bas tartqanyn aıtty. Tek Qudash Muqashevtiń kitabyna alǵysóz jazǵandardyń biri – Sháken Kúmisbaevtyń sóılegen sózinen sınhrondy sújet ekrannan beriletinin habarlady. Sháken Kúmisbaev: «Ánge qatysty qolymyzda naqty derek joq. Ándi aýdan kólemindegi jıyn-toılarda «Qudash Muqashevtiki» dep habarlaıtyn. Án 1962-63-64-65 jyldary shyqqan bolýy múmkin» dedi. Sh.Kúmisbaevtiń sóılegen sóziniń ózi kúmánge toly. Ánniń shyǵý ýaqytyn 4 jylǵa sozyp otyrǵany da senimdiliktiń joqtyǵynan. Bar aıtatyn ýáji, ánniń el arasynda aýyzdan-aýyzǵa taralyp aıtylyp júrýi ǵana. Soǵan maldanyp, búkil halqymyzdyń maqtanyshyna aınalǵan tulǵalardy qaralaı salýǵa, ultjandy kez kelgen adamnyń jol bermeıtinin túsinbegeni qandaı ókinishti.
Sóz kezegin alǵan Qaldybek Qurmanáli: «Maǵan birtalaı adamdar habarlasyp, sen kezinde Shámshi Qaldaıaqovtyń murasyn zertteýshi, jınastyrýshy bolyp halyqqa taǵy bir qyryńnan tanylyp ediń. Shámshi ánderinen jyl saıyn festıvál uıymdastyrdyń, «Shámshi» atty jýrnal da shyǵardyń. Endi atyńdy shyǵaryp alǵannan keıin Shámshi Qaldaıaqov saǵan kerek joq bolyp qaldy ma? «Shámshi Qaldaıaqov pen Muhtar Shahanov birlesip bireýdiń ánin urlaǵan eken, ury eken» degen sóz shyqqanda únsiz qarap otyrǵanyń qalaı?» degen kezde ne bolyp jatqanyn túsinbeı qaldym. Dereý osy máseleniń aq-qarasyn ajyratýǵa kiristim. Qolymyzda ánniń avtorlaryn áıgileıtin naqty derek bar. Shámshi ánderinen bizge qazir belgisi 97 án. Onyń 43-i «Altyn qorǵa» endirilgen. Iaǵnı, derek bolmaǵan kúnniń ózinde óner zertteý ınstıtýttary ánniń notasy men ıirimderin, al mátinindegi poezıalyq ereksheligi men sóz qoldanystary arqyly ánniń Shámshi Qaldaıaqov pen Muhtar Shahanovqa tıesili ekenin aıqyndap beredi. Biz búgingi baǵdarlamada el arasyndaǵy bir ánge qatysty alypqashpa pikirlerdi joıyp, naqty avtorlardy moıyndap shyǵýymyz kerek» degen usynysyn bildirdi.
Odan keıin ekrannan ándi sol kezeńge saı kásibı turǵyda oryndaǵan tuńǵysh oryndaýshysy Serikjan Seıitjanov sóılegen beınesújet berildi.
Mádenı aýylynan arnaıy kelgen Bekbolat Berdısov: «Ol kezde men 21 jastaǵy jas jigit edim. İssaparmen kelgen Shámshi Qaldaıaqov pen Muhtar Shahanov bizdiń úıge tústi. Aýyl irgesindegi Aqsý ózenin jaǵalap, jaǵalaýdaǵy arnalardy aralap biraz júrdi. Qaıtqandaryna deıin osy ándi jazyp, aýyl halqyna syı jasap ketti. Sol arada úırenip alǵan aýyl adamdary bul ándi barlyq jıyn-toılarda aıtyp júrdi» dep kýáger boldy.
Israıl Saparbaı: «Kez kelgen týyndy avtor úshin týǵan balasynyń ómirge kelýine uqsas qýanysh. Avtor talaı ýaqyt pen kúsh-jigerin jumsap, jazatyn taqyrybyn, ıdeıasyn, oqıǵa jelisin oılanady, tolǵanady, júreginen ótkizedi. Sodan keıin ǵana ol kórkem dúnıege aınalyp, oqyrmanyna, tyńdaýshysyna bolmasa kórermenine jol tartady. Keıbir týyndylar shyǵa salysymen halyqtyń júreginen oryn alyp, biraz ýaqyttan keıin umytylsa, endi bireýleri jaryqqa shyqqan sátinen bastap halyqpen birge jasasady, taǵy bireýleri Muhań aıtqandaı 30-40 jyl ýaqyttan keıin baryp qana el súıispenshiligine bólenip jatady. Al meniń óz tanymym men baǵalaýymda Shámshi Qaldaıaqov pen Muhtar Shahanovtyń óner týyndylary qaı ýaqytta bolmasyn halyqpen birge jasaıdy. Men osy arada Muhańdy jaqsy túsinemin. Óıtkeni óz basymyzdan da osyǵan uqsas keleńsiz jaıttar oryn alǵan. Oǵan toqtalyp jatpaı-aq qoıaıyn.
Men Qudash Muqashevtiń ózin de, jary Aqjoltaı Jylqybaıqyzyn da kórgen adammyn, kitabyna alǵysóz jazǵan jazýshylar Arasanbaı Estenov pen Sháken Kúmisbaevty da tanımyn. Al, Shámshi Qaldaıaqov ánderin zerttep, onyń ániniń, ómiriniń keıbir kezderine negizdelgen «Syǵan serenadasy» atty pesa jazdym. Qazir «Shámshi fenomeni» degen zertteý kitap jazyp jatyrmyn. Bul ánniń sazy Shámshiniki ekenine kóp jyldan beri Shámshi ánderiniń qupıa syrlaryna úńilip júrgen adam retinde esh kúmánim joq. Onyń ústine oý, aǵaıyndar, qoldaryńyzda esh derek bolmasa anaý aıtty, mynaý aıtty degen sózge senip, ashyq hat uıymdastyrý degen ne sumdyq? Qudash Muqashevtiń murasyna shyn jany ashıtyn adam árbir óleńine, shyǵarmasyna úlken zertteý jasap baryp qana qorytyndy shyǵarýy kerek. Avtorlyq quqyq uıymy bar, biraq sol uıym tirkeıtin kez kelgen shyǵarmanyń taqyrybyn, mazmunyn, ıdeıasyn saraptaıtyn burynǵy Keńes Odaǵy tusyndaǵydaı memlekettik deńgeıde kórkemdik keńes qurylýy kerek shyǵar. Óıtkeni, bir-birimen attas ánder, óleńder, t.b. kórkem týyndylar qaptap ketti. Al daýly másele týdyryp otyrǵan «Aqsýdan ushqan aqqýym» ániniń áýeni – Shámshi Qaldaıaqovtiki, sózi – Muhtar Shahanovtiki ekenine naqty dáleldermen kózimiz anyq jetti. Bul istiń aqyry sotqa deıin jalǵassa da, taıǵa tańba basqandaı jazylǵan aıǵaqpen avtorlary – Sh.Qaldaıaqov pen M.Shahanov degen sheshim shyǵady. Biraq isti nasyrǵa shaptyra berý eldigimizge, azamattyǵymyzǵa syn. Sondyqtan «Aqsýdan ushqan aqqýym» ánin Q.Muqashevtiki dep sanaǵan adamdar, búgingi dálelderden keıin, el aldynda baspasóz betinde, bolmasa telearnalar arqyly qatelikterin moıyndap, keshirim surasyn» dep bátýaly bitimgershilik sóz aıtty.
Beısen Quranbek baǵdarlamany «Aqsýdan ushqan aqqýym» ánine qatysty oryn alǵan keleńsiz jaıt, daýly másele osy habardan keıin qaıtadan kóterilmeýi kerek. Óıtkeni, biz ánge qatysty bultartpas aıǵaqtar arqyly ánniń áýenin jazǵan – Shámshi Qaldaıaqov, mátinin jazǵan – Muhtar Shahanov ekenin halyqqa jetkizdik» degen qorytyndy sózben aıaqtady. Baǵdarlama sońynan Jubanysh Jeksenuly «Aqsýdan ushqan aqqýym» ánin tamasha mánerinde tamyljyta oryndap shyqty.
***
Kez-kelgen daýly másele jan-jaqty saraptaýdy qajet etedi. Sondyqtan ultymyzdyń birtýar daryn ıelerin ózgeniń murasyn ıemdenetindeı beıshara halge túsirgen aıyptaýlarǵa qol qýsyryp qarap otyra almaıtyndyqtan da zertteý jumystaryn júrgizdik.
Qudash Muqashevtiń «Baıanjúrek» baspasynan 2013 jyly shyqqan «Sóılep bir ketse ótkender» atty jınaq kitabynyń alǵysózi retinde «Qudash (Qudaıbergen) Muqashevtiń bir óleńi haqynda» degen hatty jazǵan segiz adamnyń ishinde, attary biraz deńgeıde belgili eki adam bar.
Onyń biri – Qapal aýdandyq «Qapal eńbekkeri» gazetinde aýdarmashy, keıinnen jaýapty hatshy, «Jazýshy» baspasynda aǵa redaktor, 2002 jyldan «Baıanjúrek» baspasynyń dırektory, halyqaralyq «Daraboz» konkýrstarynyń birneshe dúrkin jeńimpazy Arasanbaı Estenov. Qudash Muqashevtiń «Sóılep bir ketse ótkender» kitaby Arasanbaı Estenovtyń «Baıanjúrek» baspasynan jaryqqa shyqqan. Iaǵnı, onyń jazǵan murasyn jınaqtap, arhıv materıaldaryn da surastyryp, joǵyn túgendep júrgen birden bir adam. Arasanbaı Estenovpen birneshe ret jolyqqan kezimizde, qolynda ánniń Qudash Muqashevtiki ekendigi jaıly esh deregi bolmasa da ol alǵashynda, óz pikirin jan-jaqty dáleldeýge tyrysyp, tipti, kitaptyń alǵysózindegi oıyn nyqtaı túsken «Ashyq hatyn» Muhtar Shahanovtyń atyna joldady.
«...Bul ándi bala kúnimizden marqum Qudan Muqashevtiń áni dep estip, jattap óstik, aıtyp óstik. Aldyńǵy býyn aǵalarymyz solaı aıtatyn. Búkil Aqsý, Qapal óńiriniń, qala berdi kúlli Jetisý jurtshylyǵy súıip aıtatyn án edi. Úlken kisilep tipti án mátinindegi aqyn jeńeshesiniń prototıpine deıin atyp atap, túsin tústep, áńgimelep júrýshi edi. Alǵash Respýblıka saraıynda ótken Shámshi áderine arnalǵan konsertte «sózi – Muhtar Shahanovtiki, áni – Shámshi Qaldaıaqovtiki» degendi estigende ornymyzdan turyp kete jazdaǵanymyz da ras. Aqsý aýdanynyń azamattary telefon soǵysyp, habarlasyp, «bul qalaı desisip», aqyldasa kele gazetke («Qazaq ádebıeti», 9-15 sáýir, 2010 jyl) jazǵanymyz da shyndyq. Osydan keıin Qudash Muqashevtiń týǵanyna 80 jyl tolýyna oraı «Baıanjúrek» baspasy muryndyq bolyp, Almaty oblysy ákiminiń qarjylaı qoldaýymen «Sóılep bir ketse ótkender» degen atpen marqumnyń bir tomdyq jınaǵy jaryqqa shyqty. Jınaqty qurastyrýshy marqumnyń jubaıy – Aqjoltaı Jylqybaıqyzy. Aqynnyń týystary men kózkórgen jerlesteriniń usynysy boıynsha «Qazaq ádebıetine» jarıalanǵan sol maqala sol kúıinde kitaptyń alǵysózi retinde berildi. Ondaǵymyz «ádildigin ýaqyt – qazy ózi anyqtar» degen oı edi.
Bizdiń oıymyz: «marqumnyń baldyzy Maıra Jylqybaıqyzynyń aıtýynsha, Shámshi aǵa bul ándi notaǵa túsirip, jarıalap úlgermeı ketken bolar» degen kúdik edi. Sózin jazǵan adamdy habarlaýshylar shatastyryp alǵan bolar degenbiz...
Shyndyǵyn aıtýymyz kerek, muraǵattan bul ánniń Qudash aǵamyzdiki ekenin aıǵaqtaıtyn eshbir derek taba almadyq. Biraq Qudavssh aǵamyzdyń kózi tiri qaryndasy Núken apaı: «Bul án 1964 jyly Qudashtyń qyzy Kemenniń shildehanasynda aıtylǵan» deıdi. Sol sıaqty «Qazaq ádebıeti» gazetinde jarıalanǵan maqalada keltirilgendeı sol kezgi aýdan basshylary men mádenıet qyzmetkerleriniń (Q.Qabdoldın, A.Zıadanov, T.Shynybekova t.b.) aıtýlarynsha «Aqsýdan ushqan aqqýlar» áni 1964-67 jyldardaǵy aýdandyq kórkemónerpazdar úıirmeleriniń festıválderinde birneshe ret oryndalyp, júldeli oryndarǵa da ıe bolǵan. Demek, tanymal týyndyǵa aınalǵan. El basqarǵan aıtýly ardager aqsaqaldarymyzdyń sózine senbesek, kimge senbekpiz?!.».
Ánge qatysty naqty aıǵaqtar tabyldy. Endi jala jabýshy jaq qatelikterin moıyndap, keshirim suramaıynsha, bul istiń orta jolda toqtap qalmaıtynyn aıtqanymyzdan keıin Arasanbaı Estenov raıynan qaıtyp Muhtar Shahanovtyń atyna keshirim hatyn joldady. Hattyń tolyq mátini mynaý:
«Qadirmendi Muha!
Eń aldymen biraz sharshatyp, júıkeńizge tıetin áreketterimiz úshin ózińizden keshirim ótinemiz. Qolymyzda «Aqsýdan ushqan aqqýlar» atty ánniń marqum Qudash Muqashevtiki ekenin dáleldeıtin eshbir dálel men muraǵatty derektiń joqtyǵynan bul týyndynyń Siz ben marqum Shámshi aǵamyzdyń shyǵarmasy ekenin moıyndaımyz. Buǵan ózińiz aıǵaq etip keltirgen «Ońtústik Qazaqstan» gazetiniń 1968 jylǵy atalmysh nómirin kórip, kózimiz jetti. Aýyl, aýdan aǵalary dep sanaǵan úlkenderdiń sózine erip, biz de sol kisilerdi jaqtap, maqalaǵa («Qazaq ádebıeti» gazeti, 9-15 sáýir, 2010j.) qol qoıyp, kitapqa engizgenimiz úshin ózińizden jáne marqum Shámshi aǵamyzdyń arýaǵynyń, týǵan-týysqandarynyń aldynda úsh qaıtara ıilip, keshirim ótinemiz. «Jańylmaıtyn jaq, súrinbeıtin tuıaq joq» degendeı, bizden bir pendeshilik ketkeni ras.
Men úshin bul úlken sabaq, sabaq bolǵanda da ashshy sabaq boldy. «Aldyńa kelse, atańnyń qunyn kesh» degendi de aıtqan óz atalarymyz ǵoı, Muha! Bir jolǵa keńdik jasar degen úmitpen aldyńyzǵa bas ıgen qalamdas inińiz Arasanbaı Estenov».
Ekinshisi – «Qazaq eli», «Ana tili» gazetterinde jáne t.b. basylymdarda ádebı qyzmetker, «Balalar ádebıeti» baspasynda bas redaktor bolyp qyzmet etken, birneshe kitaptardyń avtory, «Alash» ádebı syılyǵynyń laýreaty Sháken Kúmisbaev. Úlken daýǵa sebepshi bolǵan sol bir hat týraly, birneshe márte habarlasqanymyzben, ol «Aıtýǵa ońaı...» baǵdarlamasyna bergen suhbatyndaǵy oıyn qaıtalaýmen boldy. Biraq, «gazet betine basylǵan naqty derekti mise tutpaı, bastapqy pikirlerińizde qalatyn bolsańyzdar, isti ashyq sotta jalǵastyrýǵa daıyn otyrǵanymyzdy» bildirgenimizde, Sháken Kúmisbaev ta Muhtar Shahanovtyń atyna keshirim suraǵan tómendegi hatyn joldady:
«Qurmetti Muqa!
Ánniń avtory – Siz, kompozıtory – Shámshi Qaldaıaqov ekeni dáleldendi. Sizden, marqum Shámshi aǵamyzdan keshirim ótinemin. Sháken Kúmisbaıuly. 17.09.2014j.»
Osy arada biz Q.Muqashevtiń áıeli Aqjoltaı Jylqybaıqyzymen telefon arqyly habarlasqanymyzdy aıta ketelik. Ol kisi:
«Qudash úıde otyrǵanda dombyrada, keıde gıtarada osy ándi únemi aqyryn tyńqyldatyp oınap, «ózim shyǵarǵan án» dep aıtyp otyratyn. Keıin aýyl-aımaq barlyq jıyndarynda ándi Qudashtiki dep habarlaıtyn boldy. Biraq, meniń qolymda ánniń Qudashtiki ekenin aıqyndaıtyn eshbir derek joq. Ózimniń qan qysymym da joǵary, densaýlyǵym da máz emes. Sońǵy kezde ánge qatysty aıtylyp jatqan daý-damaı júregime aýyr tıip jatyr. Sondyqtan endigi jerde bul máselemen habarlaspaı-aq qoıyńdarshy» – dep ótinish jasady.
Saralaý, jan-jaqty zertteý barysynda «Aqsýdan ushqan aqqýym» áni jazylǵan janynda sarqyrap aǵyp jatqan Aqsý ózeni bar, Mádenı aýylynda osy án tóńireginde arnaıy baıqaý óte salysymen, úlken daýdyń alǵa shyǵýy «Muhtar Shahanovqa qarsy ádeıi uıymdastyrylyp jatqan kezekti aıaqtan shalýlardyń biri me» degen oıǵa da qaldyq.
Sonymen, «Aqsýdan ushqan aqqýymnyń» alǵash tusaýy kesilgenine 46 jyl tolsa da, ándi ıelenbekshi bolǵandar qısynsyz ótirikterin kóldeneń tartyp, shyǵarma avtorlaryna topyraq shashqysy kelgenimen, aqıqat tolyq aıqyndalyp, naǵyz shyndyq jeńiske jetti.
Janna IMANQUL,
Ǵabıt Músirepov atyndaǵy
syılyqtyń laýreaty
