Aqtóbe oblysynyń Mártók aýdanynda «polıseıdiń qorlyǵyna» shydamaǵan burynǵy sottalýshy óz-ózine qol jumsady. 43 jastaǵy er adam ústine benzın quıyp, ózin tirileı órtep jiberdi dep habarlaıdy Qamshy aqparattyq agenttigi kerek-info.kz-ke silteme jasaı otyryp.
Aqtóbelik Abzal Jaqsylyqov buryn buzaqylyq jasaǵany jáne kisi óltirgeni úshin sottalǵan. Osydan eki jyl buryn jazasyn ótep, abaqtydan bosap shyqqan ol jańadan ómir bastaǵysy keledi. 43 jastaǵy jigit Aqtóbe oblysynyń Mártók aýdanyna qonys aýdarǵan. Tipti otbasyn quryp, jumysqa da turǵan. Alaıda, aıtýynsha, oǵan ýchaskelik ınspektor kún kórsetpepti. Ár nárseni syltaýratyp túrtpekteı beretin kórinedi.
- Qostanaı oblysynyń Jetiqara qalasyndaǵy túrmede jazamdy ótedim. Abaqtydan shyqqannan keıin ákemniń bir áıelmen Mártókte turyp jatqanyn estidim. Qonaqqa baryp, keıin sonda kóship bardym. Bir áıelmen tanysyp, otbasy qurdym. Mártók aýdandyq mádenıet úıine santehnık bolyp jumysqa turdym. Ómirim retke kelip, jaqsy jaǵyna qaraı ózgerip kele jatyr edi. Alaıda ýchaskelik ınspektor Almas Jumabaev meni orynsyz mazalap, túrtpekteı bastady,-deıdi ol.
Abzaldyń aıtýynsha, polısıa qyzmetkeri oǵan kez-kelgen nárseni syltaýratyp, jıi tıisedi. «Shydamnyń da shegi bar ǵoı. Aqyry óz-ózime qol jumsaýǵa májbúr boldym», - deıdi ol.
- Buǵan deıingi polısıa qyzmetkerleri mazalamaıtyn edi. Alaıda osy jigit kelgennen keıin maǵan kún kórsetpedi. Aýdanda qandaı da bir qylmys tirkelse, meni kún demeı, tún demeı mazalaıdy. Ózi menen 20 jastaı kishi. Sottalǵanymdy syltaýratyp, maǵan únemi qoqan-loqy kórsetedi. Jumys istep jatqanyma qaramastan, polısıa ýchaskesine tez arada jetýimdi aıtyp, júgirtip qoıady. Úıime de keledi. Meni sot sheshimimen 3 jylǵa kólik júrgizý quqyǵynan aıyrǵan. Soǵan qaramastan, meni óz sharýalarymen kólik júrgizýge májbúrledi. Qaqpa jasatty. Oqıǵa bolǵan kúni, 1 maýsymda men óz úıimde velosıped jóndep jatqanmyn. Ýchaskelik ınspektor keldi. Meniń temeki tuqylyn kóshege tastaǵan sátim beınekameraǵa tirkelgenin aıtyp, tıisti. Sońyra ishimdik ishkenim úshin polısıa bólimshesine medısınalyq kýálandyrýǵa barýymdy surady. İshimdik ishken joqpyn. İshken kúnniń ózinde, kóshede qulap jatqanym joq, óz úıimdemin ǵoı. Meni ýchaskelik bólimshege alyp keldi. Men medısınalyq kýálandyrýdan ótýden bas tarttym. Aqyry úzdiksiz mazalaǵandyqtan, júıkem syr berdi. Sol úshin joldasymmen de jıi urysyp qalamyz. Úıge kelip, ústime benzın quıyp, órtep jiberdim,-deıdi Abzal.
Osydan keıin er adam oblystyq jedel járdem aýrýhanasyna jetkizilgen. Jan saqtaý bóliminde 7 kún jatyp, esin jıypty. Qazir densaýlyǵy túzelip, beti beri qarap keledi.
- Qazir jasym 43-te. Onyń 21 jylyn túrmede ótkizdim. Ómirimniń jartysy ótip ketti deýge bolady. Ózimniń jasaǵan isimdi moınymmen kóterip, jazamdy ótedim. Ómirimde alǵash ret úılendim. Adam qataryna qosylyp, tynysh ómir súremin degenmin,-dep kúıinedi burynǵy sottalýshy.
Alaıda bul derekke qatysty oblystyq İİD-niń aıtar óz ýáji bar.
- Shaǵymdanýshy buǵan deıin birneshe ret, onyń ishinde kisi óltirgeni úshin sottalǵan. Abzal Jaqsylyqov 2015 jyldyń 3 maýsymynda KA-161/3 mekemesinen shartty túrde merziminen buryn bosap shyqqan. Sol sebepti ýchaskelik ınspektor oǵan baqylaý júrgizýi kerek. Jaqsylyqovqa birneshe ret ákimshilik quqyq buzýshylyq jasaǵan jaǵdaıda sot arqyly shartty túrde merziminen bosatýdyń kúshi joıylatyndyǵy eskertildi. Alaıda burynǵy sottalýshy profılaktıkalyq esepte turǵanyna qaramastan, ishimdik ishken kúıi kólik júrgizgen. Sondaı-aq ózine belgilengen shekteýdi buzyp túngi saǵat 22.00-den keıin turaqty mekenjaıynda bolmaǵan,-dep habarlaıdy İİD-iniń baspasóz qyzmeti.
Polıseıler oqıǵa bolǵan kúni ony úıinde ishimdik iship,qıqar minez kórsetkendigin aıtady. Tártip saqshysynyń eskertýine qulaq aspaı, temeki tuqylyn laqtyrypty. Osy oqıǵaǵa qatysty tekserý júrgizilgen.Alaıda Mártók aýdandyq İİB jergilikti polısıa qyzmetiniń ýchaskelik ınspektory Almas Jumabaevtyń áreketinen eshqandaı zańsyzdyq tabylmady. İİD baspasóz qyzmetiniń habarlaýynsha, ýchaskelik ınspektorǵa negizsiz aıyp taǵylyp otyr.
Sholýshy: Ásel Bolatqyzy
