Mundaı kelisimge «Qazaqstan Halyq Banki» AQ men «Damý» Qory arasynda qol qoıyldy. Endi Damý Blıs tehnologıasy mólsherlemesi 8,5 paıyzdan aspaıtyn barlyq óńirlik qarjylandyrý baǵdarlamalaryna engiziletin bolady dep habarlaıdy Qamshy.kz aqparat agenttigi.
«Halyq Bankiniń Damý Blıs tehnologıasyna qosylǵanyna qýanyshtymyz. Munymen qatar bank «Damý» Qorynyń baǵdarlamasymen shektelip qalmaı, shaǵyn jáne orta bızneske nesıe boıynsha jyldam sheshim kerek ekenin eskere otyryp, naryqqa óz ónimi – «Halyq Kásipker-35» jobasyn da shyǵardy. Bul bizdiń maqsatymyzben úndes. Qazir naryqta básekelestik joǵary. Bul taıtalasta jyldam áreket etetin bankter ozady»,-dedi «Damý» Qory Basqarma Tóraǵasynyń orynbasary Nurlan Aqshanov.
«Damý Blıs» tehnologıasy 2016 jyly qańtar aıynda Almaty men Almaty oblysynda «Bank KassaNova» AQ, «Álfa Bank» AQ jáne «Bank Astany» AQ arqyly qanatqaqty joba retinde engizilgen edi. Bul – «jyldam nesıe» berýdiń jańa tehnologıasy. Negizinen ońaı rásimdep, 7 kúnge jetpeıtin ýaqyt ishinde qarjyny qolǵa tıgizedi. Bul tehnologıa boıynsha jumys isteıtin barlyq menedjerler konsaltıńtik kompanıada arnaıy semınardan ótken.
Nesıe túrleri:
Mıkro kredıt – Qazaqstannyń óńirleri úshin 30 mln teńgege deıin, Astana men Almaty úshin 60 mln teńgege deıin beriledi. Investısıa úshin 84 aıǵa deıin, aınalym qarajatyn toltyrýǵa 36 aıǵa deıin. Kem degende 6 aı jumys istep turǵan bıznes bolýy kerek.
Start kredıt - 20 mln teńgege deıin beriledi. Investısıa úshin 84 aıǵa deıin, aınalym qarajatyn toltyrýǵa 36 aıǵa deıin beriledi. Bıznestiń tirkelgenine 36 aıdan aspaýy kerek.
Eki nesıe boıynsha da maquldaý ýaqyty ekinshi deńgeıli bankke ótinim bergen ýaqyttan bastap 7 jumys kúninen aspaıdy.
Qazirgi kezde Damý blıs tehnologıasy 15 óńirdegi ekinshi deńgeıli 14 bankte qoldanylyp keledi. Salynǵan qarajattyń jalpy somasy 29 mlrd teńgege jetti. Búginde jalpy quny 1,5 mlrd teńge bolatyn 116 joba maquldanǵan.
