M.Áýezov atyndaǵy Ońtústik Qazaqstan memlekettik ýnıversıtetiniń konferens zalynda ótken jıynda alǵashqy sózdi oblys ákimi J.Túımebaev bastap, Elbasynyń bul maqalasy – memlekettik ıdeologıany anyqtaıtyn basty saıası qujaty bolyp tabylatynyn jáne «Rýhanı jańǵyrý» baǵdarlamasynyń ońtústik óńirinde iske asyrý jumystarynyń ózektiligin atap ótti.

«Elbasy maqalasy - rýhanı jańǵyrýdyń jarqyn joly. Osy mańyzdy maqalada zamanǵa sáıkes jańǵyrý, onyń ishinde rýhanı jańǵyrý máselesi jan-jaqty taldanyp, taıaý jyldarǵa aýqymdy mindetter qoıylyp otyr. Osy oraıda oblysymyzda maqalanyń basym baǵyttaryn ilgeriletý, nasıhattaý maqsatynda arnaıy spıkerler toptary jasaqtalyp, BAQ arqyly qyzý qoldaý sharalary atqarylýda, áleýmettik jelilerde pikirler jarıalanýda. Halyqty birlikke, yntymaqqa, tatýlyqqa shaqyratyn jáne ulttyq qundylyqtardy, salt-dástúrdi dáripteıtin túrli derekti fılmder, rolıkter ázirleý qolǵa alynýda», - dedi J. Túımebaev.

Budan bólek, óńirimizde maqalanyń mátini jazylǵan kitapshalar, ádistemelik quraldar shyǵarylyp, taratylýda. Sondaı-aq, oblystaǵy tarıhı-mádenı eskertkishter aýmaǵynda týrıserge qyzmet kórsetetin ulttyq qolóner buıymdary, kádesyılar satatyn saýda dúkenderin jáne tek ulttyq taǵamdar daıyndaıtyn dámhanalar ashý boıynsha tıisti jumystar atqarylyp jatyr. Alǵashqy nysandardyń biri retinde qazaq halqynyń salt-dástúri men ádet-ǵurpyn pash etetin Otyrar aýdanynda «Alash» etnografıalyq aýyly ashyldy. Jalpy, qoǵamdyq sanany jańǵyrtý baǵdarlamasynyń 6 baǵytynyń 2-i respýblıkalyq deńgeıde júzege asyrylatyn bolady.

Sonymen qatar, komısıa otyrysynda Ońtústik Qazaqstan oblysynda Jobalyq keńse jumysy týraly óńirlik jobalyq keńseniń basshysy Baqytjan Áshirbekov, «Atameken jáne azamattyq sana» taqyrybynda jazýshy, Halyqaralyq «Alash» syılyǵynyń laýreaty Marhabat Baıǵut, Qoǵamdyq sanany jańǵyrtý baǵdarlamasyn iske asyrý joldarynyń óńirlik erekshelikteri týraly «Intellekt Orda» halyqaralyq áleýmettik-gýmanıtarlyq zertteýlerdi yqpaldastyrý ınstıtýtynyń bas dırektory, profesor Sattar Májıtov sóz sóılep, negizgi baǵyttardy atady.

«Joǵary oqý oryndarynda jastardy qazaqstandyq patrıotızmge tárbıeleý joldary» taqyrybynda M.Áýezov atyndaǵy Ońtústik Qazaqstan memlekettik ýnıversıteti rektory Jumahan Myrhalyqov, Joǵary oqý oryndarynda rýhanı jańǵyrýǵa qatysty turaqtylyq pen tatýlyq týraly Ońtústik Qazaqstan memlekettik pedagogıkalyq ınstıtýtynyń rektory Ońalbaı Aıashev ta óz pikirlerin ortaǵa saldy.

OQO ákiminiń baspasóz qyzmeti málim etkendeı, kezdesý suraq-jaýaptar men pikir almasýlarmen jalǵasty. Otyrys sońynda oblys ákimi J.Túımebaev óńirdegi «Rýhanı jańǵyrý» baǵdarlamasyn iske asyrý boıynsha aýdan, qala ákimderine, basqarma basshylaryna jáne quzyrly mekemelerge tıisti ári naqty tapsyrmalar júktedi.