Májiliste Premer-mınıstriniń orynbasary – Ulttyq ekonomıka mınıstri Serik Jumanǵarın “Qazaqstan Respýblıkasynyń keıbir zańnamalyq aktilerine astanany jáne respýblıkalyq mańyzy bar qalalardy damytý máseleleri boıynsha ózgerister men tolyqtyrýlar engizý týraly” birinshi oqylymda tanystyrdy.

Zań jobasy qalalardyń biryńǵaı sáýlettik kelbetti kórinisin qalyptastyrýdy kózdeıdi.

Jumanǵarın qazirgi ýaqytta qalalardyń sáýlettik kelbeti tek syrtqy jarnama arqyly ǵana emes mańdaıshalardyń da retsiz ornalasýyna baılanysty nasharlap bara jatqanyn aıtty.

Syrtqy jarnamany joldar men kóshelerdi boıaý arqyly ornalastyrý da qalalardyń estetıkalyq kelbetine teris áser etedi. Sonymen qatar qalanyń syrtqy kelbetiniń nasharlaýyna qoǵamdyq oryndarda aýdıo jarnamanyń keń taralýy sebep bolyp otyr. Búgingi tańda atalǵan áreketter zań buzýshylyqqa jatpaıdy jáne zańnamada eshqandaı ákimshilik sharalar kózdelmegen, - deıdi ol.

Zań jobasynda qandaı ózgerister daıyndaldy:

• respýblıkalyq mańyzy bar qalalardyń, astananyń stılısıkalyq biryńǵaı sáýlettik kelbetin qalyptastyratyn dızaın-kodty, sondaı-aq stasıonarlyq emes obektilerdi ornatý men jumys isteýi boıynsha qaǵıdalardy bekitý;
• elordada biryńǵaı dızaın-kodty engizý jáne onyń jalpy erejelerin aıqyndaý;
• ǵımarattardyń menshik ıelerine talaptarǵa sáıkes emes ornatylǵan jarnama obektisine demontaj jasaý jónindegi sharttardy qoldaný;
• ashyq keńistikte aýdıo jarnamany taratýǵa tyıym salý;
• trotýarlarda, velojoldarda, avtojoldarda jáne kóshelerde syrtqy (kórneki) jarnamany ornalastyrýǵa tyıym salý usynylady.

Sonymen qatar, atalǵan normalardy Ákimshilik quqyqbuzýshylyq týraly kodeksine (455-bap) engizý máselesi pysyqtalyp jatyr.