Mindetti áleýmettik medısınalyq saqtandyrýǵa 0,8 mlrd.teńge jarna tústi

/uploads/thumbnail/20170801153147402_small.jpg

Shilde aıynda mindetti áleýmettik medısınalyq saqtandyrý júıesine 0,8 mlrd.teńge kóleminde jarna (aýdarymdar) tústi dep habarlaıdy Qamshy.kz aqparat agenttigi. 

Bul týraly búgin QR úkimetinde Ult josparynyń 80-shi qadamyn iske asyrý sheńberinde «Mindetti áleýmettik medısınalyq saqtandyrýdy engizý» máselelerine arnalǵan brıfıńte  QR Densaýlyq saqtaý mınıstri Eljan Birtanov habarlady.

Vedomstvo basshysynyń aıtýynsha, 2017 jyly 23 mlrd. teńge kóleminde mindetti saqtandyrý jarnasy túsýi tıis. Onyń 95% jumys berýshilerdiń aýdarymdary bolsa, 5% jarnalarǵa tıesili bolmaq.

Sonymen qatar, mınıstr qazirgi tańda múddeli memlekettik organdarmen, Medısınalyq saqtandyrý qorymen jáne «Azamattarǵa arnalǵan úkimet» korporasıasymen birlesip aqparattyq júıelerdi yqpaldastyrý sharalary atqarylyp jatqanyn habarlady. Oǵan qosa, elektrondy densaýlyq pasportyn ázirleý, jergilikti medısınalyq aqparattyq júıelerdi qalyptastyrý jumystary da jalǵasyn taýyp jatyr.

Áleýmettik medısınalyq saqtandyrý qorynyń málimeti boıynsha, 2017 jyldyń shildesinde júıege túsken qarjy kólemi 800 mln. teńgege jýyqtaǵan. Túsimderdiń basym bóligi ıaǵnı, 44% bıylǵy jyldyń ekinshi jartysy úshin avans túrinde tólengen tólemder bolyp tabylady.

Aýdarymdar men jarnalardy tóleý jaǵynan kósh basynda elimizdiń 4 óńiri tur. Olar: Shyǵys Qazaqstan, Qaraǵandy, Qostanaı jáne Almaty oblystary.

«Búgingi kúnge deıin jasalǵan aýdarymdar kólemi 2017 jylǵa jasalǵan boljamdarmen sáıkes keledi. Aldaǵy tamyz aıynda qorǵa túsetin túsimderdiń kólemi artýy tıis. Sebebi shilde aıynyń tólemderin aýdarý merzimi tamyz aıynyń 25-inde aıaqtalady», -dedi «Áleýmettik medısınalyq saqtandyrý qory» KEAQ-nyń Basqarma tóraǵasy Elena Bahmýtova. 

Buǵan deıin habarlanǵandaı, 2017 jyldyń 1 shildesinen bastap mindetti áleýmettik medısınalyq saqtandyrý júıesi iske qosylǵan bolatyn. Bıyl aýdarymdar men jarnalardy jumys berýshiler, jeke kásipkerler men azamattyq-quqyqtyq sıpattaǵy kelisimshart negizinde eńbek etetin azamattar tóleıdi.

Osy normaǵa sáıkes, jumys berýshi aı saıyn qaramaǵyndaǵy jumysker jalaqysynyń 1% kóleminde aýdarym aýdarady. Biraq aýdarym somasy 3668,9 myń teńgeden aspaýy tıis (bul – 15 tómengi aılyq jalaqynyń 1%).

Jeke kásipkerler men osy sanatqa jatqyzylǵan jeke menshik advokattar jáne notarıýstar, kásibı medıatorlar da jarnany 2017 jyldyń 1 shildesinen bastap aýdarady. Bul sanattaǵylar jarnasy 2 tómengi aılyq jalaqynyń 5 paıyzyn nemese 2017 jyl úshin 2445,9 teńgeni quramaq. Sonymen qatar jeke kásipkerler qaramaǵyndaǵy jumyskerler úshin jumys berýshi retinde jarna aýdarady.

Sonymen qatar, 1 shildeden bastap azamattyq-quqyqtyq kelisimshart negizinde eńbek etetin jumyskerler de jarna aýdarýǵa mindetti. Bul top tapqan tabysynyń 5 paıyzy kóleminde jarna aýdarady. Degenmen atalǵan sanattaǵy azamattardyń jarna esepteletin tabysynyń eń joǵarǵy mólsheri 15 tómengi aılyq jalaqydan aspaýy tıis. Jarnalar men aýdarymdardyń naqty somasyn Qordyń fms.kz saıty arqyly eseptep bilýge bolady. Tóleýshilerge arnalǵan nusqaýlyq pen jarna esepteıtin kálkýlátor saıttyń basty betinde ornalasqan.

Esterińizge sala ketsek, 2018 jyldyń 1 qańtarynan bastap saqtandyrý júıesine memleket pen ózin-ózi jumyspen qamtyǵandar qosylady. Memleket jeńildigi bar 14 sanattaǵy 10 mln. azamat úshin jarna tóleıdi. Olardyń qatarynda jumyssyz retinde resmı tirkelgender, zeınetkerler, balalar t.b. bar. Al, jumyskerler jarnany 2019 jyldyń birinshi qańtarynan bastap aýdarady. Tólenetin jarna mólsheri: 2019 jyly – jalaqynyń 1 paıyzyn, 2020 jyly – 2 paıyzyn quramaq. 

Saqtandyrylǵan azamattar MÁMS paketi sheńberindegi medısınalyq kómekti 2018 jyldan bastap paıdalana alady. Cebebi jeke menshik klınıkalarmen jáne memlekettik emdeý mekemelerimen medısınalyq qyzmet kórsetý týraly kelisimsharttar sol kezge deıin bekitilip bitýi tıis. Sondaı-aq, elimizdiń barlyq turǵyndary áleýmettik mańyzy bar aýrýlarǵa qosa, jedel járdem, shuǵyl kómek, sanıtarlyq avıasıa shyǵyndaryn jabatyn kepildendirilgen tegin medısınalyq kómek paketin paıdalana alady.

Aldaǵy 2 jylda (2018-2019 jj.) saqtandyrylmaǵandar úshin jeńildik merzimi qarastyrylǵan. Jarna tólemegen azamattar ambýlatorlyq kómek pen shuǵyl jaǵdaılar týyndaǵanda kórsetiletin stasıonarlyq kómekti tegin paıdalanady.

Pikir qaldyrý

Qatysty Maqalalar