Almaty kópsalaly klınıkalyq aýrýhanasynda dárigerler 1931 jyly týǵan, 95 jastaǵy naýqasqa biregeı joǵary tehnologıalyq ota jasady. Oǵan aortalyq qaqpaqsha transkateterlik ádispen (TAVI) aýystyryldy. Eń bastysy — operasıa keýde qýysy ashylmaı, júrek toqtatylmaı júrgizildi.

Aortalyq stenoz – egde jasta jıi kezdesetin ári ómirge qaýipti dertterdiń biri. Bul aýrý ýaqytynda emdelmese, júrek jetkiliksizdigine ákelip, naýqastyń ómirin qysqartady. Al 90 jastan asqan adamdarǵa dástúrli ashyq operasıa jasaý óte qaýipti.

Osyny eskergen dárigerler naýqasqa eń qaýipsiz ári tıimdi ádisti — az ınvazıvti TAVI tehnologıasyn tańdady.

Bul ádis kezinde jańa qaqpaqsha san arterıasy arqyly engizilgen juqa kateterdiń kómegimen júrekke jetkiziledi. Iaǵnı, keýde súıegi kesilmeıdi jáne jasandy qan aınalymy apparaty qoldanylmaıdy. Mundaı tásil ásirese jasy úlken naýqastar úshin asa mańyzdy.

TAVI ádisiniń negizgi artyqshylyqtary:

•aǵzaǵa túsetin júktemeniń az bolýy

•tez qalpyna kelý

•aýrýhanada jatý merziminiń qysqarýy

•operasıalyq táýekeli joǵary naýqastarǵa múmkindik berý

Angıohırýrg Arman Sadyqovtyń aıtýynsha, operasıa sátti ótken:

«Naýqastyń jasy – úlken qaýip faktory. Soǵan qaramastan, qazirgi medısınanyń múmkindikteri bizge osyndaı kúrdeli jaǵdaılarda da tıimdi kómek kórsetýge jol ashady. TAVI – bul aýyr operasıasyz ómir súrýge berilgen múmkindik. Biz jaqsy nátıjege qol jetkizdik».

Al basqarýshy kompanıanyń bas dırektory Jumaǵalı Ismaılov mundaı otalardyń mańyzdylyǵyna toqtaldy:

«Bul – otandyq medısınanyń deńgeıin kórsetetin naqty nátıje. Bizdiń maqsat – pasıenttiń jasyna qaramaı, barlyǵyna sapaly ári qaýipsiz medısınalyq kómek qoljetimdi bolýy».

Naýqastyń týystary da dárigerlerge alǵysyn bildirdi:

«Biz mundaı jasta osyndaı ota jasaýǵa bolady dep oılamadyq. Dárigerlerge kásibıligi men janashyrlyǵy úshin, jaqynymyzdyń ómirin uzartqany úshin shyn júrekten alǵys aıtamyz».

Búginde TAVI – júrek qaqpaqshasy aýrýlaryn emdeýdegi eń zamanaýı ári tıimdi ádisterdiń biri. Ol egde jastaǵy naýqastarǵa jańa múmkindik berip, olardyń ómir sapasyn jaqsartýǵa jol ashady.