Prezıdent Nazarbaev bıylǵy halyqqa joldaýynda zeınetaqy týraly arnaýly toqtalǵan bolatyn. Joldaýda halyqtyń áleýmettik jaǵdaıyn jaqsartý týrasynda aıqyn jazylǵan. 

Úshinshi. Áleýmettik qamtamasyz etý salasyna qatysty.

Meniń tapsyrmam boıynsha 2017 jylǵy 1 shildeden bastap 2,1 mıllıon zeınetker úshin zeınetaqy 2016 jylǵy deńgeıden 20%-ǵa deıin arttyrylady.

Budan bólek, bazalyq zeınetaqy taǵaıyndaý 2018 jylǵy 1 shildeden bastap jańa ádisteme boıynsha júzege asyrylady. Onyń kólemi zeınetaqy júıesine qatysý ótiline baılanysty belgilenedi.

Osy ósimniń barlyǵy 2018 jyly bazalyq zeınetaqynyń jańa mólsherin 2017 jylmen salystyrǵanda 1,8 ese arttyrýǵa múmkindik beredi.

Elimizde jyl saıyn 400 myńǵa jýyq bala týady, bul – 1999 jylǵy deńgeıden 2 ese derlik joǵary. Mundaı jaqsy úrdisti aldaǵy ýaqytta da saqtaý kerek.

"Meniń tapsyrmam boıynsha 2017 jylǵy 1 shildeden bastap bala týǵanda beriletin bir rettik járdemaqy kólemi 20%-ǵa ósiriledi.

Eń tómengi kúnkóris shegin de qaıta qarastyrý kerek. Ol qazaqstandyqtardyń naqty tutynýshylyq shyǵystaryna sáıkes kelýge tıis. Bul qadam 2018 jylǵy 1 qańtardan bastap bazalyq zeınetaqy, múgedekterge jáne asyraýshysynan aırylǵan otbasylarǵa arnalǵan járdemaqy, múgedek bala tárbıelep otyrǵandarǵa beriletin ataýly kómek pen járdemaqy kólemin 3 mıllıon adam úshin ósirýge múmkindik beredi.

2018 jylǵy 1 qańtardan bastap ataýly áleýmettik kómek kórsetý shegin eń tómengi kúnkóris sheginiń 40%-ynan 50%-ǵa deıin ósirip, onyń jańa formatyn engizý kerek. Bul rette jumys isteýge qabiletti adamnyń bári tek jumyspen qamtý baǵdarlamasyna qatysý sharty arqyly ǵana qoldaýǵa ıe bolýǵa tıis.", - delingen joldaýda.

2017 jyldyń 1 shildesindegi jaǵdaıǵa sáıkes zeınetaqy jınaǵynyń jalpy somasy 7,14 trln. teńgeni qurady, bul jyl basyndaǵy somadan 450 mlrd. teńgege (nemese 6,3%-ǵa) kóbirek dep habarlaıdy Qamshy.kz aqparat agenttigi «BJZQ» AQ baspasóz ortalyǵyna silteme jasap. Búkil zeınetaqy jınaǵynyń basym bóligi, ıaǵnı 98,3%-y mindetti zeınetaqy jarnasy esebinen quraldy. Osy tusta 2017 jyldyń birinshi jartysyndaǵy túsimniń jalpy somasy 364,9 mlrd. teńgeni qurady. Aldyńǵy jylǵy kórsetkishpen salystyrar bolsaq, ótken jyldyń týra osyndaı kezeńinde zeınetaqy jarnasy 221,8 mlrd. teńgeni quraǵan, ıaǵnı bul soma 64,5%-ǵa ósip otyr.

2017 jyldyń 6 aıy ishinde salymshylarǵa (alýshylarǵa) tıesili 201,3 myń jeke zeınetaqy shoty  (JZSH) ashyldy. Ústimizdegi jyldyń 1 shildesindegi jaǵdaıǵa sáıkes sharttardyń barlyǵy boıynsha ashylǵan JZSH jalpy sany 10,07 mln. birlikti qurady.

BJZQ-nyń 2017 jyldyń 6 aıy ishinde tólegen zeınetaqy tólemderiniń somasy  121,25 mlrd. teńge qurady, ótken jyldyń týra osyndaı kezeńinde bul soma 96,59 mlrd. bolǵan, ıaǵnı ósim 25,5%-dy qurady. Osy búkil somanyń ishindegi 86,6 mlrd. teńge (nemese 71,4%-y) zeınetaqy jasyna jetken kezde tólenetin zeınetaqy bolsa, 14,7 mlrd. teńge (nemese 12,1%) saqtandyrý uıymdaryna aýdarylǵan zeınetaqy jınaqtary, 9,7 mlrd. teńge (nemese 8%) shetelge turaqty turýǵa ketýge baılanysty jasalǵan tólemder, 10,3 mlrd. teńge (nemese 8,5%) basqa da birjolǵy tólemder (muragerlerge jáne jerleý úshin) bolyp tabylady.

2017 jyldyń birinshi jartysyndaǵy taza ınvestısıalyq tabys somasy 205,69 mlrd. teńge qurady. Sóıtip 2017 jyldyń 1 qańtarynan bastap 30 maýsymy aralyǵyndaǵy kezeńde salymshylardyń (alýshylardyń) shotyna úlestirilgen BJZQ zeınetaqy aktıvteriniń tabystylyǵy ınflásıanyń 3,7%-ǵa teń deńgeıinde 3,01%-dy qurady. Ústimizdegi jyldyń 1 tamyzyndaǵy jaǵdaıǵa sáıkes BJZQ zeınetaqy aktıvteriniń tabystylyǵy 4,3%-dy qurady, bul ınflásıa deńgeıinen 0,5%-ǵa joǵary (ınflásıa - 3,8%).

2017 jyldyń 6 aıy ishinde BJZQ-nyń jeke qyzmet kórsetý ortalyqtarynda barlyǵy 2,9 mln-ǵa jýyq operasıa júrgizildi, ıaǵnı BJZQ keńselerinde turǵyndarǵa arnap kúnine 25 myńǵa jýyq qyzmet (operasıa) kórsetiledi.

Sondaı-aq, Qor elektrondyq qyzmetterdi damytý baǵytynda keńinen qyzmet júrgizýde. Elektrondyq qyzmetterdi qoldanýy múmkin tulǵalardyń sany 3,4 mln-nan asyp ketti. 2017 jyldyń birinshi jartysynda Qordyń saıty jáne mobıldik qosymshasy arqyly elektrondyq kóshirmeni alý qyzmeti 2,4 mln-nan astam ret qoldanylǵan, bul 2016 jyldyń birinshi jartysyndaǵy kórsetkishten 3 esege joǵary.

2017 jyldyń 1 shildesinen bastap Qor jańa elektrondyq qyzmetterdi iske qosty. BJZQ keńsesine barmastan, elektrondyq sıfrlik qoltańba kómegimen Qor saıtyndaǵy jeke kabınet arqyly zeınetaqy tólemderin taǵaıyndaý jóninde aryz berý, tólemdi júrgizý jóninde jiberilgen aryzdyń jaı-kúıin qadaǵalaý nemese mindetti zeınetaqy jarnalaryn esepke alý aıasynda JZSH-n ashýǵa aryz berý syndy jańa qyzmetterdi halyq keńinen qoldanýda. Máselen, bir aıdyń ishinde Qor saıtyndaǵy bul qyzmetterdi 33 salymshy (alýshy) qoldanyp úlgerdi.

Ústimizdegi jyldyń basynan bastap Qor halyq arasynda aqparattyq-túsindirme jumystaryn kúsheıtýge, BJZQ qyzmetin barynsha aıqyn etýge baǵdar alyp otyr. Bıylǵy jyldyń alty aıy ishinde kásiporyndar men uıymdarda 6,6 myńnan asa tanystyrylym ótkizilip, búkil respýblıka boıynsha oǵan 206,6 myńnan asa adam qatysty. Aldyńǵy jylmen salystyrar bolsaq, ótken jyldyń týra osyndaı kezeńinde 3 myńǵa jýyq tanystyrylym ótkizilip, búkil 2016 jyl ishinde 4,8 myńǵa derlik tanystyrylym uıymdastyryldy. Sonymen qatar, 2017 jyldyń 1 shildesindegi jaǵdaıǵa sáıkes BJZQ jáne jeti oblystyń ákimdikteri arasynda Yntymaqtasý jáne ózara árekettesý jóninde memorandýmǵa qol qoıylyp, 5,5 myńnan asa adam qatysqan eki Ashyq esik kúni ótkizildi.

2017 jyldyń birinshi jartysynda Qordyń táýekelderdi basqarý jáne ishki baqylaý salasyndaǵy basty qujattary halyqaralyq standarttar talaptaryna sáıkes qaıta qaralyp, bıznes-úrdisterge birizdilikpen endirilýde. Sondaı-aq, Qor ISO 9001:2015 standartynyń talaptaryna sáıkes bınes-úrdisterin standarttaý jáne ońtaılandyrý baǵytynda belsendi jumys júrgizýde, osy standartqa sáıkes keletinin rastaıtyn sertıfıkatty kelesi jyldyń birinshi toqsanynda alý josparlanyp otyr.

Sonymen qatar, shyǵyndardy ońtaılandyrý jáne tıimdiligi tómen, basymdyqqa ıe emes shyǵyndardy qysqartý baǵytynda da jumys jalǵastyrylýda. Ústimizdegi jyldyń birinshi jartyjyldyǵynda júrgizilgen jumys nátıjesinde BJZQ shyǵyndary 2017 jylǵa arnap bekitilgen bastapqy búdjetke qaraǵanda 11,7 mlrd. teńgege (nemese 28%-ǵa) qysqartyldy. BJZQ barlyq bıznes-úrdisterge taldaý júrgizgen soń, qaıtalanatyn jáne tıimsiz úrdisterdi ońtaılandyryp, qysqartty. Sondaı-aq, uıymdyq qurylym jáne eńbekaqy tóleý júıesi qaıta qarastyryldy, bul eńbekaqyny tóleý aıasynda osyǵan deıin bekitilgen shyǵyndardy 2,4 mlrd. teńgege (nemese 23%-ǵa) qysqartýǵa jaǵdaı jasady.

Qor 2017 jyldyń sońyna deıin kásiporyndar men uıymdarda 14 myńnan asa tanystyrylymdy (osyǵan deıin ótkizilgen is-sharalardy qosqanda) ótkizýdi josparlap otyr, oǵan 350 myńnnan asa adamdy qatystyrý kózdelgen. BJZQ-nyń elektrondyq baılanys arnalary arqyly kórsetetin zeınetaqy qyzmetteri aıasyndaǵy operasıalar úlesin jalpy operasıalar kóleminen 47%-ǵa deıin jetkizý josparlanyp otyr.