2017 jylǵy 11 tamyzda saǵ. 19.00-de «Qazaqstan» ortalyq konsert zalynda Qazaqstan Respýblıkasy Mádenıet jáne sport mınıstrligi, Astana qalasynyń ákimdigi jáne Ermek Serkebaev atyndaǵy Mádenıetti jáne ónerdi qoldaý qorynyń qoldaýymen EKSPO-2017 Halyqaralyq mamandandyrylǵan kórmesiniń aıasynda «Ermek Serkebaevqa arnalady» atty álemdik opera juldyzdarynyń Gala-konsertin uıymdastyrady dep habarlaıdy Qamshy.kz aqparat agenttigi.

Atalmysh gala-konserttiń uıymdastyrylý barysyndaǵy derektermen Ortalyq komýnıkasıalar qyzmetiniń alańynda QR Mádenıet jáne sport vıse-mınıstri Aqtoty Raıymqulova, Ermek Serkebaev atyndaǵy mádenıet jáne ónerdi qoldaý qorynyń quryltaıshysy,  A’Studio tobynyń  mýzykanty ári prodúseri Serkebaev Baıǵalı, opera ánshisi Ildar Abdrazakov, opera ánshisi Asmık Grıgorán, qoıýshy rejıser Vasılıı Barhatov bólisti.

Gala-konsert ataqty qazaqstandyq ánshi, KSRO halyq artısi, KSRO jáne QazKSR Memlekettik syılyqtarynyń ıegeri, Sosıalısik Eńbek Eri Ermek Serkebaevty eske alý maqsatynda uıymdastyrylyp otyr.

Quramy boıynsha aıryqsha bolyp tabylatyn bul konsertke álemge tanymal ánshiler óner kórsetedi, onyń ishinde álemniń úzdik bas daýys ıesi, Gremmı syılyǵynyń eki dúrkin ıegeri, Metropolıten-opera (Nú-Iork), Marıın teatry men Parıj operasynyń solısi Ildar Abdrazakov, Marıın teatrynyń solısi, Opera Awards (London q.) syılyǵynyń laýreaty Asmık Grıgorán, Úlken teatrdyń jetekshi solısi, Plasıdo Domıngonyń «Operalıa - 2016» konkýrsynyń jeńimpazy Bogdan Volkov, Úlken teatrdyń jetekshi solısi Igor Golovatenko, Marıın teatrynyń solısi Sergeı Skorohodov, Máskeýlik «Novaıa Opera»  teatrynyń solısi Alekseı Tatarınsev, Úlken teatrdyń solısi  Agýnda Kýlaeva, «Astana Opera» teatrynyń jetekshi solısi, Qazaqstan Respýblıkasynyń eńbek sińirgen qaıratkeri Súndet Baıǵojın, Qazaqstan Respýblıkasynyń eńbek sińirgen qaıratkeri, «Astana Opera» teatrynyń jetekshi solısi, «Bolshaıa opera» televızıalyq jobasynyń jeńimpazy Saltanat Ahmetova, Qazaqstan Respýblıkasynyń eńbek sińirgen qaıratkeri, Astana qalasy Memlekettik akademıalyq fılarmonıasynyń solısi Azamat Jyltyrkózov.

Ermek Serkebaevty eske alý keshinde álemdik opera klasıkasynyń jaýharlary -  Dj. Rossını, Dj. Verdı, Sh.Gýno, A.P. Borodın, K. Sen-Sans, J. Bıze, P.I. Chaıkovskıı, A. Dvorjak, G. Donısettı, Dj. Pýchchını, A.Q. Jubanov, L. Hamıdı operalarynan arıalar shyrqalatyn bolady. Konsertke Reseıdiń eńbek sińirgen artısi, Tatarstannyń halyq artısi Renat Salavatovtyń jetekshiligimen «Astana Opera» teatrynyń sımfonıalyq orkestri qatysady. Keshtiń qoıýshy rejıseri, álemniń úzdik jáne jarqyn rejıserlarynyń biri Vasılıı Barhatov bolmaq.