25 tamyzda «AgroInvest Forum 2017»  agroónerkásiptik ınvestısıalyq forýmy  aýyl sharýashylyǵy ónimin óndirýshiler men ınvestorlardyń basyn qospaq. Halyqaralyq sharaǵa Qytaı, Iran, BAÁ, Vengrıa, Polsha, Reseı, Ispanıa, Túrkıa elderinen 100-den asa adam qatysady, dep habarlaıdy Qamshy.kz.

Búgin «QazAgro» Ulttyq basqarýshy holdıńi» AQ Basqarma tóraıymy Gúlnaz Atamqulova Ortalyq komýnıkasıalar qyzmetinde ótken baspasóz konferensıada agroónerkásiptik ınvestısıalyq forýmnyń maqsat-mindetteri týraly aıtty. Forým QR Aýyl sharýashylyǵy mınıstrliginiń qoldaýymen ótpek.

- Aýyl sharýashylyǵyndaǵy jobalardy birlesip iske asyrý men azyq-túlik taýarlaryn óndirý salasyna seriktesterdi tartý arqyly qazaqstandyq bıznesti qoldaımyz. Halyqaralyq áriptesterimizben salaǵa ınvestısıalyq kapıtaldy tartý, agroónerkásiptik keshendegi bıznestiń jańa trendteri men perspektıvalaryn qalyptastyrýǵa múmkindik týady, - dedi Gúlnaz Atamqulova.

Osynyń nátıjesinde sońǵy 5 jylda Holdıń jáne onyń enshiles kompanıalary agroónerkásiptik keshen salasyna jalpy kólemi 375 mıllıard teńgeden asatyn sheteldik ınvestısıany tartyp úlgergen. Qazirgi tańda 10 jylǵa 100 mıllıon evro alý úshin Eýropalyq ınvestısıalyq bankimen kelissózder júrgizilýde. Bul qarjy birqatar jobalardy qarjylandyrý úshin jumsalady.

Sonymen qatar, spıkerlerdiń aıtýynsha agroónerkásiptik keshenge ınvestısıa tartýdyń bir túri – tikeleı ınvestısıalar qoryn qurý.  Kapıtalızasıasy 40 mıllıon dollardy quraıtyn Qazaq-Venger tikeleı ınvestısıalyq qory jumysyn bastap ta ketken. Qor agroónerkásiptik kesheniniń iske asqan, biraq qazirgi tańda qarjy tapshylyǵyn tartyp otyrǵan jobalaryn damytýdy, mal, qus, balyq sharýashylyqtary men jemis-kókónis,  sút óndirisi, dándi jáne maıly daqyldardy aýyl sharýashylyǵy tehnıkasyn qurastyrý baǵytyndaǵy jańa jobalardy qarjylandyrýdy kózdeıdi. Al qosymsha ınvestorlardy tartý arqyly Qor kapıtalızasıa kólemin 150 mıllıon dollarǵa deıin ulǵaıtýdy josparlady.