Densaýlyq saqtaý salasynda  adamnyń  aǵza  múshesi men tinderin aýystyrý  medısınanyń iri jetistigi  bolyp sanalady. Búginde álemniń ozyq memleketterimen birge elimizde de múshe transplantasıasy sátti júrgizilip keledi.

Múshe transplantasıasyn qarapaıym tilmen jetkizer bolsaq, bir adamnyń múshesin ekinshi adam­ǵa aýystyrý degendi bildiredi. Iaǵnı donordyń óz kelisimimen ózge adam­ǵa múshesin berýi. Osy oraıda aıta ketetin jaıt, jalpy búırek trans­plantasıasyna tiri adam do­nor bola alsa, júrek, baýyr sıaq­ty dene músheleri belgili bir jaǵ­daıda kóz jumǵan adamnan ǵana alynady. Batys Qazaqstan oblystyq densaýlyq saqtaý basqarmasynyń baspasóz qyzmetinen kelip túsken málimet boıynsha, oblysta 31 naýqas búıregin almastyrǵan. Onyń 26-synyń otasy   elimizde  jasalsa, beseýi alys shetelde jasalǵan. Qazir olardyń barlyǵynyń jaǵdaıy qanaǵattanarlyq.  Búgingi tańda  óńirde 99 adam búıregin almastyrý  úshin kútý paraǵyna  tirkelgen. Oblystyq densaýlyq saqtaý basqarma basshysy Qanat Tósekbaevtyń aıtýynsha,  2017 jyldyń sáýir aıynda búırek almastyrýǵa arnalǵan kútý paraǵyna esepke qoıý úshin  oblystyq qan ortalyǵy men eki dıalız ortalyǵyna,  ıaǵnı «Nefros-Azıa»-ǵa 79 adam, «Bıos» -qa  20 adam qan tapsyrǵan.    Búırek almastyrýdan keıin resıpıentterdi esepke alý MSAK uıymdarynda júrgizilip, munda olarǵa ımmýnosýpressıvtik preparattar beriledi eken. Al nefrologtyń konsýltasıasy táýlik boıy júrgizilip, shuǵyl jaǵdaılarda nefrologıalyq tósekterge jatqyzylady. Sondaı-aq óńirde jylyna 500-den astam kúrdeli joǵary mamandandyrylǵan otalar jasalynýda. Atap aıtsaq, travmatologıada jambas jáne tize býyndaryn endoprotezdeý, artroskopıalyq otalar, al neırohırýrgıada  omyrtqa jaraqaty kezinde, tamyr hırýrgıasynda jáne kardıologıa kúrdeli otalar sátti júrgizilip keledi. Elimizde 2013 jyldan bastap  donorlary týys bolyp keletin naýqastarǵa transplantasıa otasy jasala bastaǵan bolatyn. 2013 jyly beseý, 2014 jyly jeteý, 2015 jyly altaý, 2016 jyly bes ota jasalsa, onyń bireýine teris nátıje kórsetip, gemodıalızge keri qaıtarylǵan. Al 2017 jyldyń segiz aıynda búırek almastyrylǵan  tórt naýqastyń ekeýi búldirshin eken.

Gúlim AQAP,

Batys Qazaqstan oblysy