Hadısha Bókeeva atyndaǵy  qazaq drama teatrynda Batys Qazaqstan oblystyq klınıkalyq aýrýhananyń 150 jyldyǵy  saltanatty túrde atalyp ótildi.

Merekelik keshke  atalmysh mekemeniń ardagerleri men qyzmetkerleri qatysty. Shara aýrýhananyń tarıhy, búgingi jetistikteri men sala ardagerleriniń estelikterinen quralǵan beınefılmdi tamashalaýdan bastaldy.

- Sonaý 1867 jyly qurylǵan alty kereýettik stasıonar búginde 150 jyldyq tarıhy bar, ýaqyt talabyna saı irgeli mekemege aınalyp otyr. Elbasymyzdyń «Bolashaqqa baǵdar: rýhanı jańǵyrý» atty maqalasynda jazylǵandaı, buqaralyq sanany ózgertý úshin qoǵam óziniń tarıhyna mán berip, ony dáriptep, aıtýly oqıǵalardy bilip otyrýy kerek. Búgingi tańda oblystyq klınıkalyq aýrýhana keńesshi emhanasy bar, shuǵyl kómek kórsete alatyn, oblystyń barlyq turǵyndaryna qoljetimdi, naýqastardy dári-dármekpen tegin qamtamasyz ete alatyn eń iri aýrýhanalardyń biri. Qazirgi ýaqyt talabyna saı densaýlyq saqtaý salasyna kóptegen ózgerister men reformalar engizilýde, - dedi Batys Qazaqstan oblysy ákiminiń birinshi orynbasary Arman Óteǵulov quttyqtaý sózinde.  Sondaı-aq ol «Densaýlyq» memlekettik baǵdarlamasy aıasynda óńirde atqarylyp jatyrǵan birqatar  isterge, jetistikterge  toqtalyp ótti. Shara barysynda Arman Kárimuly hırýrg-dáriger Erbol Eseev pen  dáriger-epıdemıolog Dınara Májıtovaǵa oblys ákiminiń «alǵys hatyn» tabys etti. Osy oraıda aıta ketsek, jalpy oblystyq densaýlyq saqtaý basqarmasynyń jumysy negizgi demografıalyq kórsetkishterdiń jaqsarýymen, oqytý-klınıkalyq ortalyǵynyń qurylýymen, qalalyq jedel-járdem stansıasy bazasynda «Sımýlásıalyq ortalyǵynyń» ashylýymen, oblys boıynsha ońaltý eminiń damýymen, medısınalyq uıymdardyń medısınalyq aqparattyq júıege 100% qosylýymen erekshelenip keledi. Al bıyl oblys boıynsha 19 medısınalyq nysan kúrdeli jóndeýden ótken edi.

Saltanatty shara barysynda oblystyq densaýlyq saqtaý basqarmasy, qala ákimdigi jáne atalmysh aýrýhana basshylyǵy tarapynan medısına salasynyń birneshe qyzmetkeri merekelik tósbelgi, syı-sıapatpen marapattaldy. Kesh óńir ónerpazdarynyń konserttik baǵdarlamasymen órildi.

Gúlim AQAP,

Batys Qazaqstan oblysy