Júrek derti - túrli aýrýlardyń asqynýynan nemese júrek jáne qan tamyr júıesi qyzmeti buzylýy men zaqymdanýynan paıda bolady.

Júrek-qan tamyr aýrýlary eresek adamdardy ne múgedektikke shaldyqtyrady nemese ólimge ákelip soqtyrýy da múmkin. Oblystyq densaýlyq saqtaý basqarmasynyń basshysy Qanat Tósekbaevtyń málimetinshe, atalmysh dertpen óńirde  bıyl 64613 naýqas dıspanserlik esepke tirkelgen.  Olarǵa oblystyq kardıologıalyq ortalyǵy mamandandyrylǵan kardıologıalyq jáne joǵary mamandandyrylǵan kardıohırýrgıalyq qyzmet kórsetilýde. Sondaı-aq onyń aıtýynsha, óńirde revmatızm, gıpertonıa, júrek aqaýlary, júrek demikpesi, mıokard ınfarkti sekildi júrek aýrýlarynyń túrleri jıi kezdesedi eken. 2012 jyldan bastap oblys boıynsha materıaldyq-tehnıkalyq bazamen jabdyqtaýdyń jaqsarýymen,  jiti koronarlyq sındrom algorıtmi engizilýimen atalmysh dertten ólim-jitim sany azaıyp keledi. Oblystyq kardıologıalyq ortalyqta aorto-koronarlyq shýnttaý, týa bitken júrek aqaýlaryna, júre paıda bolǵan júrek aqaýlaryna ota jasaý, júrekke elektro kardıostımýlátor ornatý otalary jasalyp keledi. Atalmysh otalardy Janaıdar Qaztýǵanov, Rýslan Aıýpov, Talǵat Gýsmanov, Aqylbek Ermuhanov sekildi bilikti kardıologtar jasaýda. Mamandardyń aıtýynsha, artyq salmaq ıaǵnı semizdik, júrek- qan tamyry aýrýlarynyń, qant dıabeti jáne basqa da kúrdeli aýrýlardyń qaýipti faktory bolyp tabylady eken. Sondaı-aq júrek-qan tamyry aýrýlaryn qozdyratyn taǵy bir sebep - kúızelis, toryǵý jaǵdaılary. Ol adamdardy jasyna qaramaı, júrek talmasyna ushyratýy múmkin. Jalpy kóńil kúıdiń tolqýy, mazasyzdanýy, adamnyń mıy arqyly beriledi. Jaǵymsyz emosıalar vegetatıvtik júıeni qozdyrady, odan baryp aǵzadaǵy qan aınalymyna, ishki organdarǵa, endokrındik bezderdiń qyzmetine áser etedi eken. Sonyń saldarynan aǵzadaǵy gormondardyń balansy buzylady. Onyń áseri júrek soǵysynyń, yrǵaǵynyń buzylýyna, qan qysymynyń kóterilýine, bulshyq etterdiń, qan tamyrlarynyń tartylýyna aparady. Mıdyń qan aınalymy nasharlaıdy, mıdyń kletkalarynda ottegi jetispeýshiligi paıda bolady. Júrektiń, mıdyń qan tamyrlarynyń qysylýy ınfarkt, ınsýlt sıaqty aýyr jaǵdaıǵa alyp kelýi múmkin, nemese júrektiń ıshemıalyq aýrýy, gıpertonıa, asqazan jarasy sekildi sozylmaly aýrýlarǵa ushyratady. Sondyqtan aq halatty abzal jandardyń keńesi boıynsha, júrek dertiniń aldyn alý úshin salaýatty ómir salty men kóńil kúıdi bir qalypty 
ustanǵan jón.

Gúlim AQAP,

Batys Qazaqstan oblysy