Elimizdegi densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynda medısınalyq-demografıalyq ahýalǵa oqys jaǵdaılardan, jaraqattar men ýlanýlardan jáne jol-kólik oqıǵalarynan bolatyn ólim-jitim týraly másele kóterilgen bolatyn. Osy oraıda oblystyq kópbeıindi balalar aýrýhanasynyń dáriger-travmatology Bolat Álibaevtyń aıtýynsha, balalar arasynda turmystyq jaraqat – eń birinshi orynda  eken.

-Sodan keıin kóshedegi, mekteptegi, jol-kólik jaraqattary oryn alady. Kóbine qaraýsyz qalǵan balalar turmystyq ár túrli jaraqatqa ushyraıdy. Atap aıtar bolsaq, kúıik, ýlaný, bıiktikten qulaý, ár túrli synyqtarmen balalar dáriger kómegine júginedi. Oblystyq kópbeıindi balalar aýrýhanasyna birneshe bala jaraqat alyp túsedi. Sonyń ishinde aýrýhanada 700-800-deı bala ár túrli jaraqattaryna baılanysty stasıonarlyq em qabyldaıdy.  Ókinishke oraı, jyl saıyn balalardyń jaraqat alý kórsetkishi ósip keledi.  Salystyrmaly túrde qaraǵanda, bes jasqa deıingi balalar balabaqshada, lagerde bolǵanda úıdegi balaǵa qaraǵanda az jaraqat alady. Óıtkeni olar tárbıeshilerdiń qatań baqylaýynda. Sodan soń hımıalyq kúıiktermen de balalar aýrýhanaǵa túsip jatady. Sábılerdiń margansovka, sirke sýyn iship qoıýy, ókinishke oraı, oryn alyp turatyn jaǵdaılar. Bul da ata-ananyń salǵyrttyǵy,- deıdi Bolat Álibaev.

Al densaýlyq saqtaý basqarmasynyń baspasóz qyzmetine súıensek, oblysta sońǵy jeti aıda 3083 ólim-jitim tirkelse, onyń 202-si jaraqattar men ýlanýlardan, 100-i óz-ózine qol jumsaýdan, 32-si jol-kólik oqıǵalarynan, 31-i úsikten, 16-sy gazdan ýlansa, 27-si sýǵa batyp ketken. Sondaı-aq oblysta jazataıym jaǵdaılar nátıjesinde jambas jáne tize býyndaryn endoprotezdeý, artroskopıalyq otalar jáne omyrtqa jaraqaty kezinde, tamyr hırýrgıasynda rekonstrýktıvti sekildi jylyna 500-den astam joǵarymamandandyrylǵan otalar jasalynady.  

Gúlim AQAP,

Batys Qazaqstan oblysy