Marhum bop ketken S.degen bir ádebıet synshysy ánebir jyly Jazýshylar Odaǵyndaǵy ádebıet máselesine arnalǵan bir jıynda sóılep turyp áı-sháı joq bas salyp Amerıkany jamandaı jónelipti. Onysy tipti uzaqqa sozylyp ketken kórinedi. Sonda zalda otyrǵan T. Degen jazýshy «Apyr-aı, myna bizdiń S-men Amerıkanyń arasy tym ashylyp ketti-aý, bunyń aqyry nemen biter eken?»—degen eken.
Sol aıtqandaı, ánebir joly Qyrǵyzstan Prezıdenti Qazaqstannyń keıbir saıası da áleýmettik jaǵdaılaryna qatysty keıbir kemshilikterdi atap turyp aıtyp edi ásheıinde tóbesinen «Proton» qulap, bala-shaǵasy múgedek bolyp týyp jatqanda jaǵy qarysyp qalǵandaı úni shyqpaıtyn bireýler «Otan úshin otqa túsetin» patrıot bolyp shyǵa keldi. Atambaevtyń sózi ásirese ózim biletinderdiń ishinde Aıagúl Mantaı, Ulyqbek Esdáýletov degen azamattarymyzǵa da qatty batypty. Men bilmeıtin, buryn aty-jóni beımaǵlum, buǵan sheıin elimizdegi qazaq tiliniń múshkil hali, ıesiz qalǵan aýyldar men aýyl turǵyndarynyń qaıyrshylyq turmysy, úısiz-kúısiz jetim-jesirler, sottardyń ádiletsizdigi eldi jaılaǵan jemqorlyq pen qylmys elimizdegi úırenshikti jaǵdaıǵa aınalǵan taǵy basqa adam shoshyrlyq jaǵdaıattar týraly kózi ashyq, kókiregi oıaý qazaq azamattary janushyra jazyp, aıtyp jatqanda aýzyn býǵan ógizdeı úni bir shyqpaǵan saıasatkerler men sarapshy dep atalatyndar shyqty.
Bulardyń eshbiriniń sózinde Atambaevtyń aıtqandaryn teriske shyǵaratyn eń bolmasa birde-bir dálel, derek joq. Qur baıbalam, ótirik ókpeleý. Ne úshin namystanyp jatqany da túsiniksiz. Al Qyrǵyzstan basshysynyń sózinde qazaq halqynyń namysyna tıetin, qazaq pen qyrǵyzdyń ortasyna ot jaǵatyn eshqandaı zıankestik sóz joq ekenin kórip otyrmyz.
Bir qyzyǵy osylardyń bári Atambaevtyń prezıdentterdiń jasyna baılanysty aıtqan sózin aınalyp ótip, ol máseleni aýzyna almaıdy. Qyrǵyzstanda prezıdenttikke úmitkerlerdiń jasy bizdiń prezıdentten 20 jas, al Atambaevtyń ózi Elbasymyzdan 16 jas kishi ekeni ras qoı. Qyrǵyzstanda 26 jylda 4 prezıdent aýysty. Bizde she? Álde qazaqta Qazaqstandy basqarýǵa qabiletti bala týý toqtap qalǵan ba? Iá, Qazaqstanda Qudaıǵa til tıgizgenderge eshkim tıispeıdi, al aty-jóni áıgili bireý týraly birnárse aıtsań Maýglı týraly ertektegi banderloga-maımyldarsha jabyla ketýge daıyn turatyndar jetedi. Qalaı deseńiz olaı deńiz Atambaevty kústanalap jatqandar Jandaıshaptyq pen Patrıotızmniń ne ekenin aıyra bilýi kerek.
Myrzan KENJEBAI
