Batys Qazaqstan oblystyq perınataldyq ortalyqqa Mınsk qalasyndaǵy perınataldy dıagnostıkalyq ortalyǵynyń jetekshisi, medısına ǵylymynyń kandıdaty, joǵary bilikti dáriger Alekseı Chýkanov kelip, últra dybystyq zertteý baǵyty boıynsha óńir dárigerlerimen tájirıbe almasty.
Biliktilik dárisine óńirdegi ÝDZ-y salasy boıynsha qyzmet atqaryp júrgen sala mamandary qatysty. Basqosýda últradybystyq zertteýdiń dıagnoz qoıýda, jatyrdaǵy uryqtyń kúıin baqylaýda keńinen qoldanylatyn tekserý ádisiniń túri ekendigi jáne uryqtyń jynysyn anyqtap qana qoımaı, bolashaq náresteniń jatyrdaǵy damýynan tolyq aqparat beretindigi. QR Densaýlyq saqtaý jáne áleýmettik damý mınıstrligi bekitken ereje boıynsha júktilik barysynda úsh ret ǵana ÝDZ jasaýǵa ruqsat berilgen bolatyn. Birinshisi 10-14 aptada bolsa, ekinshisi 20-24 aptada, úshinshisi 30-34 aptada túsiriledi.
Mamannyń aıtýynsha, alǵashqy ÝDZ dárigerge júktilik merzimin naqty anyqtaýǵa jáne uryqtyń damýynda qandaı da bir aýytqýshylyqtar bar-joǵyn anyqtaýǵa múmkindik beredi eken. Jatyrdaǵy náresteniń damýy, joldasynyń (plasenta) kúıi, qaǵanaq sýyn (okoloplodnye vody), bosanǵanǵa deıin balanyń jynysy kelesi zertteýler barysynda baqylanady. 20-24 aptada barlyq uryq organdary tolyqtaı damyp, qalyptasady. Osy kezeńde jasalatyn ÝDZ sol damyǵan aǵzalardyń qalypty jaǵdaıdan aýytqýyn anyqtaýǵa múmkindik beredi. ÝDZ arqyly uryqtyń bet-pishinin kórip, kóziniń araqashyqtyǵyn baıqap, muryn súıeginiń uzyndyǵyn, erin jáne tańdaı jyryǵy aýrýlaryn kórýge bolady. Mı, júrek, asqazan, ókpe, búırek, ishek, qýyq, omyrtqa qalaı damyp jatqany týraly da bilýge bolady. Sondyqtan osy kezeńdegi ÝDZ-nyń mańyzy joǵary. 30-34 aptalyq kezinde júrgiziletin úshinshi ÝDZ-niń negizgi maqsaty – balanyń bosanar aldyndaǵy jaǵdaıy men jatyrda qalaı jatqanyn anyqtaıdy. Iaǵnı bala basymen nemese quıryǵymen kelip tur ma, kindik moıynǵa oratylyp jatqan joq pa, salmaǵy qandaı, burynǵy zertteýler kezinde baıqalmaı qalǵan aqaýlar joq pa – osy suraqtarǵa jaýap alynady eken.
Basqosýdan soń oblystaǵy perınataldyq ortalyqtardyń 25 mamany halyqaralyq deńgeıdegi sertıfıkat ıelendi.
Gúlim AQAP,
Batys Qazaqstan oblysy
