Qoǵamdyq oryndarda egde kisilerdiń gazet oqyp otyrǵanyn jıi baıqaımyz. Árıne, oryssha. Qatelespesem, gazet ustaǵan adam da orys. Qazaq tiliniń sóılenbeýi haqynda áńgime qozǵalǵan jerde onyń oqylmaýy da zańdy sekildi. Burynnan urandalyp kele jatqan «kitap oqymaıdyny» emes, «qazaq gazetterin kim, qalaı oqyp júr?» degenge toqtalǵanymyz durys-aý.

         Túrli tehnıkaǵa táýeldi bolǵan sanamyzda gazet týraly mynandaı bir kórinis jattalyp qalypty: gazet oqyp otyrǵan qarıa. Iá, qazir gazet oqý sán emes. Sol sebepten bolar qoǵamda «gazettiń bolashaǵy bulyńǵyr» degen pikir qalyptasqan. Óıtkeni qaladaǵy kez kelgen dúńgirshekke qazaq basylymdaryn izdep barsańyz, tappaısyz. Eger taýyp jatsańyz, súıinshi surańyz! Qalalyq qazaqtar kóbine oryssha oqıdy. Qazaq gazetterinen oqıtyn dúnıe tappaǵandyq pa, ıakı básekege jaramaǵandyǵynan ba, suramadyq. Al aýyldyq jerlerde ár shańyraqtan bir-eki gazettiń sulbasyn baıqaısyz. Eń aldymen aýdandyq basylym, árıne, odan soń oblystyq, keıingi kezekti «Egemen Qazaqstan» alady. Atalǵan gazetterge jumys orny talap etken soń jazylatyny da belgili jaǵdaı. Mundaıda «gazet oqıtyn ádebıet súıer qaýym aman bolsyn!» dep ishteı kúbirlep otyrasyń. Aıttyń ne, aıtpadyń ne...

P.S.:«Gazetti qarıalar ǵana oqı ma eken? Bilmeseńiz, biz de oqımyz...» dep týlap otyrsańyz, sabyr etińiz. Búgingi jastardyń kitap ustap, gazet oqyp júrgeninen habarymyz bar. Tek, ony aıta bersek, kóz tıip qalatyndaı...

Marjan ÁBİSH