Bir ǵasyr ómir súrýdiń qupıasy ashyldy. AQSH-ta turatyn reseılik kásipker júz jasaýdyń syryn anyqtapty, dep Qamshy.kz aqaparat agenttigi baq.kz saıtyna silteme jasap habarlaıdy.
Qazir Sergeı Fageniń bıohakıng degen maqalasy ǵalamtorda qyzý talqylanyp jatyr.
Bıohakıng sózine anyqtama berip kórsek, bul adamnyń ózin-ózi jáne qorshaǵan ortany basqasha qabyldaýǵa úıretetin jańasha uǵym eken. Iaǵnı, dıvannan túspeıtinder sportpen shuǵyldansa, toıa tamaq jeıtinder ashyǵyp, aǵzasyn tazartýda qolǵa alsa, 120 jyl ómir súrýi múmkin.
Bıohakıng degenimiz – kez kelgen tásildi qoldaný arqyly adam ómirin jaqsartý ján sol arqyly onyń uzaq jasaýyna jol ashý. Sportpen shuǵyldanyp, as mázirine úlken mán beretinderdi de bıohakıng qoldanýshylary desek bolady. Osyny búge-shúgesine deıin zerttep jazǵan reseılik kásipkerdiń maqalasy búginde kópshiliktiń nazaryn aýdaryp otyr. Sebebi, ol bıohakıng arqyly júz jyldan astam ómir súrýge bolatyn kórinedi. Jáne ózi sol arqyly aǵzadaǵy maıdy azaıtyp, otteginiń mólsherin ósiripti.
«Bıohakıngpen aınalysqanyma 4-5 jyl boldy. Myńdaǵan test tapsyryp, júzdegen preparatty qoldandym. Dárigerlermen keńesip kóptegen tásildi kóre otyryp bir sheshimge keldim. Osynyń barlyǵyn zertteýge shamamen 200 myń dollar jumsadym», - deıdi kásipker Sergeı Fage.
Maqalada kásipkerdiń qyrýar qarjy shashtym degeni adam bıohakıngti bastaý úshin túrli dárigerlerge baryp, aǵzany teksertýi kerek eken. Iaǵnı, sizdiń qandaı asty qansha mólsherde ishetinińizdi jáne qansha kúsh shyǵyndap jattyǵý jasaıtynyńyzdy mamandar ǵana synaq arqyly anyqtap beredi. Sondaı-aq uıyqtaý rejımin qalypqa keltirip, aptasyna bir-eki ret ashyǵý da bıohakıngtiń bir bólshegi. Biraq Sergeı Fageniń bul bastamasy biz úshin tańsyq emes. Almatydaǵy fıtnes zaldarda osyndaı genetıkalyq test birazdan beri jasalady.
«Genetıkalyq test degenimiz adamnyń múmkindigin anyqtap beredi. Ol úshin biz silekeıden synaq alamyz. Onyń nátıjesine qarap qandaı sportpen shuǵyldanýǵa bolady, qandaı mólsherde bulshyq etke salmaq salý kerek ekenin aıtyp beremiz. Al bıohakıng degendi birinshi ret estip otyrmyn», - deıdi fıtnes-menedjer Georgıı Egazarán.
Al seksenniń seńgirine shyqqan keı ájeler bıohakıng degendi múldem estimegen. Biraq uzaq ómir súrý úshin salaýatty ómir saltyn ustaný kerek ekenin jaqsy biledi. Aptasyna eki ret dene shynyqtyrýmen aınalysady. Bári tegin. Ózderi jattyqtyrýshyny saılap alypty. Qımyldary shıraq qarıalardyń eń jasy jetpisten asyp ketse aldy toqsanǵa taıap qalǵan.
«Bizdiń qatarymyz shoıqańdap, aqsap júredi ǵoı. Óıtkeni tizesi qımyldamaıdy. Sosyn osteohondroz shyǵady, bizdiń omyrtqalar jaqsy qımyldamaıdy. Sonyń bárin osy jerde túzetemiz», - dep túsindirdi zeınetker Raıgúl Sabanısheva.
Suraý salynǵan adamdardyń barlyǵy bıohakıngti sońǵy kezde qaptap ketken zaty bir bolǵan men aty ózge jańa termın dep qana qabyldaıtynyn jasyrmady. Al reseılik kásipkerdiń kózdegeni tek paıda tabý deıdi.
Rasynda da dene shynyqtyrý men durys tamaqtanýdan ózge bıohakıngtiń taǵy bir mindetti ádisi – kóptegen preparatty qoldaný. Bıo sózine jalǵanǵan hakıng, ıaǵnı haker syndy adam mıyndaǵy baǵdarlamany qaıta jazyp shyǵý. Osylaısha óz ómirin jaqsy jaqqa ózgertý arqyly uzaq jasaısyń degen reseılik kásipkerdiń daqpyrty ǵylymı turǵyda dáleldenbegen.
