«Azamattarǵa arnalǵan úkimet» memlekettik korporasıasy Astanadaǵy memlekettik qyzmet salasyndaǵy Óńirlik habpen birge uıymdastyrǵan «Qazaqstannyń memlekettik qyzmetti damytý salasyndaǵy tájirıbesi. Inovasıalyq tásilder: syn-tegeýrinder men sheshimder» atty halyqaralyq konferensıa barysynda basqa elderden kelgen qatysýshylar Qazaqstannyń memlekettik qyzmet kórsetý salasyndaǵy tájirıbesimen tanysyp, ınovasıalyq jobalardy memlekettik basqarý sektoryna engizý múmkindikterin talqylady dep habarlaıdy Qamshy.kz aqparat agenttigi.
Konferensıanyń ashylý saltanatynda Qazaqstan Respýblıkasy Aqparat jáne komýnıkasıalar mınıstriniń orynbasary Qaırat Balyqbaev, Astanadaǵy memlekettik qyzmet salasyndaǵy Óńirlik habtyń basqarýshy komıtet tóraǵasy Álıhan Báımenov, Qazaqstan Respýblıkasy Parlament Májilisiniń depýtaty Maıra Aısına, Sıngapýrdaǵy memlekettik qyzmetti jetildirý jónindegi BUU «Damý» baǵdarlamasy ǵalamdyq ortalyǵynyń dırektory Maks Everest Fıllıps jáne t.b. sóz sóıledi.
Spıkerlerdiń aıtýynsha, qazir Qazaqstan UNDESA elektrondyq úkimetti damytý ındeksi aıasynda 27-shi orynda, ıaǵnı bul úkimettiń halyqqa memlekettik qyzmetterdi usyný tártibin jeńildetýge baǵyttalǵan belsendi jumysynyń kórsetkishi.
Búgingi tańda memlekettik qyzmetter birneshe tásil boıynsha kórsetiledi: elektrondyq úkimet portaly arqyly (700-den astam qyzmetter men servıster), Halyqqa qyzmet kórsetý ortalyqtary (548 memqyzmet), Mgov mobıldi qosymsha (80-nen astam qyzmet pen servıster). Aıta keteıik, halyqaralyq úkimettik samıtte Mgov mobıldik úkimettiń úzdik qosymshasy bop tanyldy. Memkorporasıaǵa kelsek, qazir 723 memlekettik qyzmettiń 548-i «Azamattarǵa arnalǵan úkimettiń 349 front-ofısteri arqyly usynylady. Jáne bul kórsetkish jyldan-jylǵa ulǵaıyp keledi (2011 jyly HQKO arqyly 51 memqyzmet usynylǵan). Qazir qyzmetter tolyq sıklmen kórsetilgendikten, suratylatyn qujattar mólsheri azaıdy. Al qyzmetter elektrondy túrge kóshirilgendikten, Memlekettik korporasıaǵa kelýshiler sany qysqardy.
HQKO-nyń sapasyn kótergen basty erekshelik – túrli organdardyń qujattaryn «bir tereze» qaǵıdaty boıynsha daıyndap berý. Mysaly, Ázirbaıjan, Malaızıa, Sıngapýr jáne taǵy basqa elderde túrli organdardyń qujat daıyndaýshy ókilderi bir ǵımaratta bolǵanymen, bólek buryshtarda qyzmet kórsetedi. Al qazaqstandyqtar túrli organnyń qujattaryn alý úshin ár buryshqa baryp kezek turmaıdy, «bir tereze» arqyly HQKO-nyń kez-kelgen qyzmetkerinen ala alady.
Konferensıaǵa qatysýshy elderdiń ókilderi Qazaqstannyń tájirıbesin zertteý reformalar ótkizý kezindegi aqparattyq-saraptamalyq jumystyń bazasyn kúsheıtýge septigin tıgizetinine, sonymen qatar memqyzmetterdi kórsetý salasynda tájirıbe almasý barysynda tıimdi dıalog ornatatynyna senimdi.
