Araqqa qumar erli-zaıyptylar túnniń qaq ortasynda tórt balasyn úıinen qýyp, qańǵytyp jibergen. Bul sumdyq jaǵdaı Ordabasy aýdany Shubar sý turǵyn úı alabynda oryn alǵan. Balasynan bezingen ata-analar perzentterin dalaǵa tastamaq túgili qaıyr suraý, urlyq syndy qylmystyq isterge barýǵa deıin májbúrleıdi eken. Bul jaıynda otyrar.kz habarlady.

Kishkentaı Aleksandranyń aıtýynsha, týǵan ákesi ony bireýdiń úıine tereze arqyly kirip, urlyq jasaýǵa májbúrlegen. Ózi bala bolsa da ákesiniń qysymymen jasaǵan áreketi úshin ol kamera aldynda uıalyp otyr. Araqqa qumar ata-anaǵa jasy kámeletke tolmaǵan balalary tabys kózine aınalǵan. Qulqy úshin perzenterin qaıyr suraýǵa, araq tabýǵa jumsap kelgen. Munymen qoımaı taıaqtyń astyna alyp, bir túnde qańǵytyp jibergen.

Marına Novıkova esimdi kórshisi «Úlken qyzyn anasy aqsha úshin er kisimen jatqyzbaq bolǵan. Al qyzy buǵan kónbegen. Sóıtip anasy pyshaqpen, al ákesi baltamen bala-shaǵasyn qorqytyp, erkekpen tósekke jatpaǵan qyzyn ólimshi etip sabap tastap, balalaryn úıden qýyp jibergen. Kámelet jasyna tolmaǵan úsh balasy bar. Olardyń barlyǵy kóshede qaıyr surap júredi. Qaıyr surap aqsha nemese azyq-túlik ákelmese, ata-anasy balalaryn uryp-soǵady» dedi.

Ata-anasynyń kórsetken qorlyǵyn perzenteri sózben aıtyp jetkize almaıdy. Araq ishse boldy anasy men ákesi adam tózgisiz áreketke baryp, kún kórsetpeıdi deıdi.

«Bir kúni túnde tursam, ákem Alınany qylqyndyryp, uryp jatyr eken. Ákemdi áreń ıterip jiberdi. Sóıtsem, áke-sheshem ony Rýslan esimdi jigitpen tósekke jatqyzbaq bolǵan eken. Úıde men jáne eki sińlim bar edi. Barlyǵymyz Alınany alyp shyǵyp, kelesi bólmege tyǵylyp qaldyq. Ákem aǵash esikti baltamen uryp, syndyryp ishke kirdi. Al anamnyń qolynda pyshaǵy bar. Áke-sheshimiz bizge aıqaılap urysyp, baltamen urmaq boldy. Aqyr sońy tún jarymda úıden qýyp jiberdi. Amal joq, osy úıge keldik» deıdi qorlyq kórgen balalardyń biri Karına.

Jetkinshekter ázirge Temirlan qalasyndaǵy ınternatta bola turady. Bilim bóliminiń mamandary ata-ana quqyǵynan aıyrý týraly sheshimdi alǵan soń jetkinshekter balalar úıine ótkizilýi múmkin.