Astana qalasynda Qazaqstan Respýblıkasy Din isteri jáne azamattyq qoǵam mınıstrliginiń uıymdastyrýymen Qoǵamdyq keńesterdiń 1-shi respýblıkalyq májilisi óz jumysyn bastady dep habarlaıdy Qamshy.kz aqparat agenttigi. 

            Atalǵan sharanyń maqsaty - qoǵamdyq keńesterdiń qyzmetin jetildirý boıynsha usynystar ázirleý, jáne osy baǵytta oń tájirıbelerimen almasý sondaı-aq, qoǵamdyq keńester men memlekettik organdardyń arasyndaǵy yntymaqtastyqty odan ári damytýdyń tetikteri men baǵyttaryn anyqtaý bolyp tabylady. 

            İs-shara aıasynda «Qoǵamdyq keńester: is-tájirıbe jáne memleket pen qoǵamnyń ózara árekettesý tetikteri» taqyrybynda plenarlyq otyrys ótti. Onyń jumysyna QR Parlamenti Senatynyń tóraǵasynyń orynbasary Bektas Beknazarov, QR Premer-Mınıstriniń orynbasary Erbolat Dosaev, QR Din isteri jáne azamattyq qoǵam mınıstri Nurlan Ermekbaev, BUU Damý baǵdarlamasynyń Turaqty ókili Mýnhtýı Altangerel qatysty.

            2016 jyly «100 naqty qadam» Ult josparyn  iske asyrý sheńberinde memlekettik organdar men azamattyq qoǵam arasyndaǵy dıalogtyń nysany retinde Qoǵamdyq keńester quryldy. Bul memlekettik emes uıymdar úkimettik sheshimderdi qabyldaýdyń ashyqtyǵyn arttyrýǵa arnalǵan konsýltatıvtik, konsýltasıalyq, baqylaýshy organdar bolyp tabylady.           

Qazaqstanda respýblıkalyq jáne jergilikti deńgeıde 229 qoǵamdyq keńes óz qyzmetin júzege asyrýda  (Olardyń 16-y respýblıkalyq deńgeıde, 213-i óńirlik deńgeıde jumys isteıdi). Elimiz boıynsha Qoǵamdyq keńesterdiń quramyna 4 055 adam múshe, onyń 818-i úkimettik emes uıymdardyń ókilderi.

Qoǵamdyq Keńester qurylǵaly beri jalpy sany  213 oblys, qala jáne  aýdan  ákimderiniń, 16 ortalyq jáne 1300-den asa jergilikti atqarýshy organdar basshylarynyń esepteri tyńdaldy. Qoǵamdyq keńesterde  600-den astam ózekti máseleler qoǵamdyq tyńdaýlardan ótti.  Sondaı-aq, 9 myńnan astam normatıvti-aktiler jobalaryna  usynystar engizildi.

«Keńesterdiń qyzmeti esep beretin jáne ashyq memleket qalyptastyrý úderisine oń áserin tıgizdi jáne myńdaǵan belsendi azamattarǵa eldiń qoǵamdyq ómirine belsendi qatysýǵa múmkindik berdi», - dep atap ótti Din isteri jáne azamattyq qoǵam mınıstri N. Ermekbaev.  

Qoǵamdyq keńesterdiń májilisi barysynda qoǵamdyq keńesterdiń qazirgi ýaqyttaǵy  mártebesin kóterý, máslıhattardyń qyzmetine uqsas qoǵamdyq keńesterdiń fýnksıalaryn joıý úshin keńestiń ókilettikterin ózgertý, Keńester jumysynda memlekettik organdar músheleriniń ókildik deńgeıin tómendetý sıaqty birqatar ózekti máseleler kóterildi.  

Qoǵamdyq keńesterdiń respýblıkalyq májilisi atalǵan keńes jumysyn jetildirý maqsatynda  halyqpen buqaralyq aqparat quraldarynyń ózara is-qımylyn nyǵaıtý,  jumys tıimdiligin damytý, ońtaıly tájirıbelerdi talqylaý taqyryptarynda  paneldik pikirtalastar men semınarlar ótkizildi.

            İs-sharaǵa qoǵamdyq keńesterdiń, sarapshylar qaýymdastyǵynyń, úkimettik emes uıymdardyń ókilderi, sondaı-aq,  memlekettik organdardyń jáne halyqaralyq uıymdardyń basshylary, jalpy sany  500 delegat qatysty.

           Aıta ketken jón qoǵamdyq keńester májilisiniń qorytyndysy boıynsha qatysýshylardyń naqty sheshimderi men usynystary negizinde arnaıy qarar qabyldanatyn bolady.