Armangúldiń balalar aýrýhanasynda jumys istegenine kóp ýaqyt bolmady. Alaıda, nebári 5 aıdyń ishinde balalardyń ólimin de, taǵdyr tálkegimen sal bolyp qalǵan balalardy da, dúnıe esigin ashpaı jatyp túrli aýrýǵa shaldyqqan sábılerdi de, balasy aýrý bolyp týǵandyqtan ony tastap ketip jatqan tas baýyr ata-anany da, jaryq dúnıege kelgennen kúnnen bastap birden qıyndyqpen betpe-bet kelgen aýyr taǵdyrǵa da kýá boldy. Talaı ata-ananyń kóz jasyn da, qýanyshyn da kórdi.

Oqýdy jańa ǵana támamdaǵan jas qyzǵa bastapqy kezde munyń barlyǵy qorqynyshty tústeı kórindi. Ár otbasynyń qaıǵysyn júregine jaqyn qabyldady. Solarmen birge jylap, birge kúldi. Aýrýhana - ómirdiń ashshy shyndyǵyn, ushy qıyry joq teńizdeı kórinetin ómirdiń ólsheýli ekenin árkez kózge shuqyp kórsetip turatyn jáne baqyt, qýanysh, shattyq, jetistik, mahabbat, dostyq sekildi ómirdiń túrli-tústi, ádemi tusyna kereǵar kún men tún sekildi qarańǵylyqtyń bar ekenin eske salyp turatyn jer sekildi. Ár buryshy adamnyń kóz jasyn, qıyndyǵyn, aýrýynan arylǵandaǵy qýanyshynan syr shertip turǵandaı. Armangúl aýrýhanany dál osyndaı kúıde kóredi, sezinedi.

Armangúl alǵash balalar aýrýhanasyna kelgende bir jaǵdaıdyń kýási boldy. Sol jaǵdaı onyń máńgi esinde qaldy.

Aýrýhanaǵa 18 jastaǵy qyz sharanasymen tústi. Jap-jas qyzdyń týys, týǵandary joq pa álde onyń bosanǵanyn bilmeı me, áıteýir onyń artynan eshkim  izdep kelmedi.

Armangúl úshin ádettegi kún bastaldy. Tańǵy as, úıden jumysqa deıin sol baıaǵy kúnde kóretin jol. Alaıda aýrýhanadaǵy jaǵdaı ádettegideı emes edi. Qyzmetkerlerdiń barlyǵy ári-sári. Aýrýhanaǵa sábıimen túskenine 3 kún bolǵan áıel qyzyn tastap aýrýhanadan qashyp ketipti. Armangúl 18 jastaǵy qyz balalyq jasap ketip qalǵan bolar dep úmittendi. Ony keshke deıin kútti. Ókinishke qaraı, kókek ana balasyn izdep keshke de, ertesi kúni de, odan keıin de kelmedi.

Sharana anasyn izdep kúni boıy jylady. Aýrýhana qyzmetkerleri ólimge de, balalardyń kóz jasyna da ábden eti úırenip ketken. Sondyqtan ony kúni boıy jubatyp, kóńilin aýlaǵan eshkim bolmady. Armangúl  qoly bosaǵanda sábıge qaraılasty, alaıda jumystyń kóptiginen kúni boıy janynda bola almady.

Armangúl keshke jumystan keıin sábıdi bir kórip ketý úshin keldi. Arada 3, 4 kún ótip ketken. Sábı burynǵydaı jylamaıdy. Kelesi kúni de dál solaı. Anasynan aıyrylǵan kúnderi toqtaýsyz jylaǵan bala, birneshe kún únsiz jatyr. Bul tipti sábıdiń tabıǵatyna jat. Dúnıe esigin endi ǵana ashqan sábı endi ony eshkim jubatpaıtynyn kishkentaı júregimen sezgen sekildi. Ol bul ómirde jalǵyz. Ómirdiń soqpaǵyn, aýyrtpalyǵyn da endi jalǵyz ózi kóteretinin túsingendeı. Onyń erkeligin kóterip, ińgálaǵan daýysyn estı sala janynan tabylatyn anasy ony tastap ketkenin uqqandaı.

Armangúl sábıdiń osy bir jaǵdaıyn kórip júregi eljirep ketti. Kózine jas aldy. Ómirge kelgeni keshe ǵana, alaıda onyń ashshy dámin sezip úlgergeni kóńilge kirbiń túsirdi. Eń soraqysy, qashqyn anasy «baladan bas tartamyn» dep jazbaǵandyqtan, ony eshkim asyrap ta ala almaıdy eken. 

Armangúl ýaqyt óte kele balasynan bas tartqandar men 18 jastaǵy kókek ana sekildi qashyp ketkenderdiń sábıi de jalǵyz qalǵandaı kúı keshetinin túsindi. Tastandy sábıler kóp jylamaıtynyn baıqady. Sebebi olardy jubatatyn eshkimi joq ekenin kishkentaı júregimen sezedi.

Ásem Álmuhanbet