Reseı prezıdenti Vladımır Pýtın men AQSH prezıdenti Donald Tramp telefon arqyly sóılesip, kelissóz júrgizdi. Aq úı baspasóz qyzmeti eki prezıdent arasyndaǵy áńgimeniń shamamen bir saǵatqa sozylǵanyn habarlady. Pýtın men Tramp Sırıa jáne Ýkraınadaǵy qarýly qaqtyǵystardy, Soltústik Koreıa, Iran jáne Aýǵanstandaǵy jaǵdaıdy talqylady, dep Qamshy.kz aqparat agenttigi Azattyqqa silteme berip jazady.

Budan bir kún buryn Pýtın Sırıa prezıdenti Bashar Asadpen kezdesken bolatyn. Kremldiń habarlaýynsha, Pýtın Tramppen áńgimesinde Sırıada prezıdent jáne parlament saılaýlaryn ótkizýdi qalaıtynyn, konstıtýsıalyq reformany jaqtaıtynyn málimdegen.

Máskeý, Ankara jáne Tegeran Qazaqstan astanasy Astanada Sırıa beıbit kelissózin ótkizip keledi. Oǵan janjaldasýshy taraptar qatysyp júr. Astanadaǵy kezdesýde Sırıanyń mańyzdy aımaqtarynda deeskalasıa aımaqtaryn qurý máselesi talqylanyp jatyr.

Aq úıdiń málimetine qaraǵanda, Tramp pen Pýtın 21 qarashada «Taıaý Shyǵys pen Ortalyq Azıa aýmaǵynda terorızmmen kúrestiń mańyzdylyǵyn» aıtty jáne «Islam memleketi», «Ál Qaıda», «Talıban» jáne basqa da terrorlyq toptarmen kúresý úshin áriptestikti arttyrý joldaryn izdeýge kelisti.

Ótken aptada Tramp pen Pýtın Vetnamdaǵy samıtte beıresmı kezdesý ótkizgen. Ol kezde Kreml amerıkalyqtar «resmı kezdesýge kelispeı qoıǵanyn» málimdegen. Aq úı kezdesý prezıdenttiń «ýaqyty joqtyqtan jáne jumys kestesiniń tyǵyzdyǵynan» ótpeı qalǵanyn aıtqan.