Qyrǵyzstan basshysy Almazbek Atambaev Reseı prezıdenti Vladımır Pýtındi respýblıkanyń joǵary memlekettik marapaty – «Manas» ordenimen marapattady. Bul týraly qyrǵyz basshysynyń baspasóz qyzmeti habarlady, dep jazady Qamshy.kz aqparat agenttigi.

Baspasóz qyzmetiniń málimetine súıensek, Atambaev atalmysh jarǵyǵa sársenbide qol qoıǵan.

«Almazbek Atambaev Qyrǵyz Respýblıkasy men Reseı Federasıasynyń yntymaqtastyǵynyń damýy men beriktigine úles qosqany úshin Reseı prezıdenti Vladımır Pýtındi I dárejeli «Manas» ordenimen marapattady», - delingen baspasóz habarlamasynda.

«Manas» ordeni Qyrǵyzstannyń joǵarǵy memlekettik marapaty bolyp 1996 jyly bekitilgen. Ol úsh dárejeden turady, memlekettiń jáne demokratıalyq qoǵamnyń, halyqtyń birligin, eldiń ekonomıkalyq, rýhanı jáne ıntellektýaldy áleýetin qorǵaý men nyǵaıtýǵa zor úles qosqandar «Manas» ordenimen marapattalady.

Aıta keteıik, 2015 jyldyń shildesinde Atambaev Qazaqstan prezıdenti Nursultan Nazarbaevty I dárejeli «Manas» ordenimen marapattaǵan.