Rım papasy Fransısk Mánmanyń azamattyq jetekshisi Aýn San Sý Chjımen kelissóz júrgizdi. Álemdik agenttikterdiń habarlaýynsha, Vatıkan basshysy álemdegi eń daǵdarys aımaǵyna saparmen baryp otyr dep jazady Qamshy.kz aqparat agenttigi Azattyqqa silteme jasap.
Sý Chjımen kezdesýden soń Rım papasy Mánma turǵyndaryna úndeý arnady. Ol Bırmanyń bolashaǵy "árbir etnıkalyq toptyń" quqyǵyn qorǵaýyna baılanysty ekenin eskertti. Sol arqyly ol ondaǵan jyldar boıy memleketten teperish kórip, sońǵy aılarda aıaýsyz áskerı qýdalaýǵa ushyraǵan musylman rohındjalarǵa qoldaý bildirdi.
Fransısk qýdalaý nemese "rohındja" sózin Aýn San Sý Chjı men bıliktiń basqa da ókilderi aldynda ataǵan joq. Biraq ol Mánma turǵyndary "azamattyq janjaldar men áskerı qımyldardan zardap shegip kele jatqanyn", munda adam quqyǵy saqtalýy kerektigin basa aıtty.
Negizinen býddalar turatyn Mánmada "rohındja" sózin kópshilik aldynda qoldaný tabý dep esepteledi. Shaǵyn musylmandardyń quqyqtaryn shektep, olarǵa zańsyz "bengal" ımıgranttary degen at berip qoıǵan.
AQSH pen BUU soltústik Rakhaın shtatyndaǵy az ulttarǵa jasalǵan qysymdy "etnıkalyq tazalaý" dep atady. Rohındja búlikshileri ásker beketine shabýyldaǵan soń, oǵan jaýap retinde kúsh qoldanǵan, sonyń nátıjesinde 620 000-dan astam musylman rohındja kórshiles Bangladeshke qashýǵa májbúr boldy. Olar rohındjalardyń tutas aýyldary tonalyp, órtelip, áıelder men qyzdardy zorlaǵanyn habarlady.
