Syılyq tańdaý eshqashan ońaı sharýa bolǵan emes. Janyńyzǵa jaqyn adamǵa tosyn syı jasap, qýantqyńyz-aq keledi. Alaıda, unata ma, unatpaı ma? Mundaı syılyq berý jaqsy yrym ba? Dástúr ne deıdi? Osy syndy jan-jaqtan antalaǵan suraqtar kóńil-kúıińizdi sý sepkendeı basyp tastaıdy. Osyndaı daý-damaıly syılyqtardyń biri – saǵat. Bylaı qaraǵanda, saǵattan asqan keremet syılyq joq sıaqty. Biraq, úlkender nemese qurby-qurdastaryńyz "joq, saǵat syılaýǵa bolmaıdy, bul jaman yrym" degendi kóp aıtyp jatady. Munyń syry nede ekenin bilgińiz kele me? Bizben birge bolyńyz!
Bizdiń qazekeń saǵatty aıyrylysýdyń nyshany, saǵat toqtaǵanda, senderdiń de qarym-qatynastaryń toqtap qalady dep yrymdaıdy. Úlkender jastarǵa jaqyn adamdaryńa saǵat syılamaǵanyń jón degen keńester berip te jatady.
Tipti, el aýzynda úılený toıyna tartý etilgen saǵat jas jubaılar nekesiniń tez buzylýyna alyp keledi, baqytty adamdar saǵat taqpaıdy degen sózder de az aıtylmaıdy. Saǵat syılaýǵa bolmaıdy degen nanym-senim bizderge Qytaıdan kelgen.
Osy eldiń turǵyndary syıǵa alynǵan saǵat – jerleý rásimine shaqyrý dep túsinedi eken (kimniń ekeni belgisiz). Yrym birtúrli estilgenimen, kóp halyq buǵan shúbásiz senedi. Yrymnyń ekinshi bir sebebi ejelden beri syılyqqa ótkir zat berýge bolmaıdy degen tyıymda jatyr. Pyshaqqa qatysty mundaı tyıymdardan ózińiz de habardar bolarsyz.
Ótkir tildi saǵattar dál osy tyıym salynǵan zattardyń qataryna jatady. Joramalǵa keliser bolsaq, ótkir zattardy syılaý arqyly sol adammen qarym-qatynasyńyzdy óz qolyńyzben qyryqqan bolasyz.
Árıne, munyń bárin de yrymshyl adamdarǵa arnalǵan málimetter dep qabyldaǵan durys. Sondaı-aq mundaı nanymdardan habary bar tanysyńyzǵa saǵat syılar bolsańyz, renjitip alýyńyz ábden múmkin. Endi bir jaǵynan, bári de shyn kóńilmen berilgenin esińizden shyǵarmaǵanyńyz jón. Sondyqtan, joǵarydaǵy yrym-tyıymdarǵa sený de, senbeý de óz quzyryńyzda!
Pikir qaldyrý