Táýelsizdiń jyldarynda Shyǵys Qazaqstannyń densaýlyq saqtaý salasynda jetken jetistikteri az emes. Sonyń ishinde ana men bala ólimi azaıyp, aýrýhanalar zamanaýı tehnıkalarmen jabdyqtalýda dep jazady Qamshy.kz aqparat agenttigi. 

Atap aıtsaq, Óskemen qalalyq №1 aýrýhana bazasynda eldegi alǵashqy robottandyrylǵan hırýrgıa ortalyǵynyń ashylýy josparlanǵan. Sımýlásıalyq jabdyqtar ornatylǵan ortalyqta transplantalogıalyq jáne angıohırýrgıalyq ota jasaýǵa múmkindik týǵyzady. Bul jaıly Aımaqtyq komýnıkasıalar qyzmetinde ótken baspasóz máslıhaty barysynda oblystyq densaýlyq saqtaý basqarmasynyń basshysy Marat Shoranov aıtyp ótti.

– Tek osy jyldyń ózinde oblystyq búdjet esebinen medısına salasyna 9,5 mlrd teńge bólinse, onyń 7,3 mlrd teńgesi jabdyqtar alýǵa jumsalady. Qarajatqa Besqaraǵaı, Ulan, Glýbokoe, Borodýlıha aýdandarynyń ortalyq aýrýhanalaryna jáne Óskemendegi ınsýlt ortalyǵyna jańa zamanaýı jabdyqtar alynady, – dedi Marat Shoranov.

         Sonymen qatar aımaqta SHQO ákimi Danıal Ahmetovtyń tapsyrmasymen densaýlyq saqtaý salasyn damytý maqsatynda quny 1,2 mlrd. teńgeni quraıtyn úsh kezeńnen turatyn strategıalyq jospar qurylǵan. Atalmysh jospar aıasynda onkologıa, kardıologıa, ana men bala densaýlyǵyn saqtaý syndy baǵyttarǵa ekpin jasalyp, mamandar daıyndalyp jatyr.

– Aldaǵy 3 jyldyqtyń ishinde sheteldik klınıkalarda 150 maman oqytylyp, olar jergilikti dárigerlermen is-tájirıbemen bólisip, biliktilikterin arttyrady. Qazirdiń ózinde shyǵysqazaqstandyq 50 maman Ulybrıtanıadan oqyp keldi, – dedi basqarma basshysy.

Búgingi tańda oblysta ana men bala ólimi 3 ese azaısa, ortasha ómir súrý kórsetkishi ósip keledi.