Sırıadan shyǵarylǵan DAISH-tyqtar Aýǵanstannyń soltústiginde, Ózbekstan men Túrkmenstan arasynda jańa jattyǵý lagerlerin qurdy dep jazady Qamshy.kz aqparat agenttigi Frans Pres-ke silteme jasap.
Orta Azıa elderindegi ýshyqqan jaǵdaı týrasynda otandasymyz saıasattanýshy Maksım Kaznacheev ázirbaıjandyq Haqqin.az portalyna suhbat berdi.
- DAISH sodyrlarynyń Ózbekstan men Túrkmenstanǵa basyp kirý qaýpi joǵarylaı tústi. Sodyrlar ótken jyly-aq Aýǵanstannyń soltústigine jınala bastaǵan. Onda etnıkalyq ózbekter men túrkmender turady. Sondyqtan sodyrlardyń ortaǵa sińisip, jalǵan bet-perde jasaýǵa múmkindikteri zor. Sırıadaǵy jeńilisten keıin DAISH Ortalyq Azıany jaılaýǵa tyrysatyny buǵan deıin de talaı márte aıtyldy.
Sarapshylardyń oıynsha, Túrkmenstanǵa qaýip tónip tur. Aýǵanstanmen shektesetin Ózbekstan shekarasynda Túrkmenstanmen salystyrǵanda baqylaý kúshti. Sebebi shekara Amýdarıa ózenimen jalǵasyp jatyr. Al Túrkmenstan men Aýǵanstannyń ortasy shól dalamen bólingen.
Túrkmenstan jáne Ózbekstannyń qorǵanys kúshi Aýǵanstandaǵy jaǵdaıdy jiti nazaryna alǵan. Soltústik Aýǵanstan men Kabýldaǵy bılik baqylamaıtyn aýdandardy sodyrlardyń basyp alý qaýpi joǵary.
- Soltústik Aýǵanstan DAISH úshin ashyq alańǵa aınaldy. Sondyqtan Tashkent pen Ashhabad anterrorıstik qyzmetin kúsheıtti. Bastapqy kezde-aq DAISH qatarynda Orta Azıa týmalary kóp ekeni belgili bolǵan. Qazaqstannyń ulttyq qaýipsizdik komıtetiniń málimetinshe, Sırıada 300-ge jýyq qazaqstandyq soǵysqan. DAISH-tyqtar Qazaqstannyń keıbir jerlerin basyp alýǵa qaýqary jetpeıdi desek te, terakti jasaýy múmkin, - deıdi sarapshy.
Saıasattanýshy sońǵy eki jylda Qazaqstannyń keıbir oblystarynda quqyq qorǵaý organdary qyzmetkerlerine shabýyl jasalǵanyn da atap ótti. Úkimet terorıstik toptardyń jolyn kesý úshin baryn salýda jáne Jaqyn Shyǵystan kelgen sodyrlardy jiti baqylaýda ustaıdy. Astana ońtústiktegi kórshimizdegi jaǵdaıdy qadaǵalap otyr. Olar soqqyny alǵashqylardyń biri bolyp qabyldaýy múmkin. Qazaqstan olarǵa kómektesedi. Terrorısterdi toqtatý úshin kúshterdi biriktirý qajet.
