«Rýh» halyqaralyq ádebı baıqaýy óz máresine jetip, 12 jeltoqsanda jeńimpazdary marapattaldy, dep jazady Qamshy.kz aqparat agenttigi.
Qarashanyń 17-sinen 5-ine deıin jalǵasqan ádebı dodaǵa el ishinen bólek sheteldik qalamgerler de qatysýǵa nıet bildirgen. Ádebı synda baǵymdy synaımyn degenderdiń jasyna, mamandyǵyna eshqandaı shekteý qoıylmady.
Dodanyń bir ereksheligi – shyǵarmalar qazaq, orys, aǵylshyn tilderinde qabyldanǵan. Nátıjesinde qazylar alqasynyń aldyna 8 atalym boıynsha myńnan asa eńbek túsken. Onyń 899-y baıqaý talaptaryna saı kelip, «Ádebıet» portalyna jarıalanǵan. Roman, poves, poezıa, poema, drama syndy túrli atalymdar boıynsha top ishinen ozyq shyqqandar saltanatty túrde marapattaldy. Birinshi oryn ıegerleri arnaıy dıplom men bir mıllıon teńge kóleminde aqshalaı syıaqyny enshilese, gran-prı júldegerleri eki mıllıon teńgeni ıelendi.
Baıqaýdyń «Proza: roman, poves» nomınasıasy boıynsha 1 oryn dıplomyn, arnaıy kádesyı jáne 1 mıllıon teńge syıaqyny «Jylqy atylǵan jaz» romany úshin Yrysbek Dábeı ıelense, Bas júlde men 2 mıllıon teńge aqshalaı qarajat «Rýhtar jerden ketedi» romany úshin Tynymbaı Nurmaǵambetovke berildi
«Proza: áńgime, esse» nomınasıasyndaǵy 1 oryndy «Daıaǵashshy» essesi úshin Ularbek Nurǵalym, Bas júldeni - «Taǵdyr» áńgimesiniń avtory Nesipbek Dáýtaıuly jeńip aldy.
«Poezıa: poema» nomınasıasyndaǵy 1 oryn «Jańǵyrý jyry» poemasy úshin Nesipbek Aıtulyna, Gran-prı - «Rýh jyry» týyndysy úshin Baqyt Bedelhanulyna tabys etildi.
«Poezıa: toptama óleńder» sanatynda 1 orynǵa «Rýbaı» óleńder toptamasy úshin tatarstandyq Raýza Hýzahmetova laıyq dep tanyldy. Bas júlde - «Qudaıǵa qaraıtyndaı qasqaıyp...» atty óleńder toptamasy úshin Yqylas Ojaıulyna berildi.
«Úzdik dramatýrgıa» nomınasıasynda 1 oryndy «Men, men eshkim de emespin» pesasy úshin Ardaq Nurǵazy jeńip aldy. Bas júlde - «Qazaqsha ashylyp saıraý» pesasy úshin Serik Asylbekovke tabystaldy.
«Úzdik ádebı syn» 1 oryn dıplomymen «Markestiń qara qolǵaby» maqalasy úshin jas synshy Bekzat Smadıar marapattaldy. Al bas júlde men 2 mıllıon teńge syıaqy «Turaqsyz álemniń sýretkeri» úshin Amangeldi Keńshilikulyna buıyrdy.
«Poezıa (balalarǵa arnalǵan óleńder)» boıynsha 1 oryndy «Balapanym, aýzyńdy ash» óleńder toptamasy úshin Qul-Kerim Elemes ıelense, «Qasıetti Qazaqstan» toptamasynyń avtory Serikbol Hasan bas júldeni jeńip aldy.
«Proza (balalarǵa arnalǵan prozalyq shyǵarmalar)» sanaty boıynsha 1 oryn men 1 mıllıon teńge «Zov Solnsa» shyǵarmasy úshin almatylyq Lılıa Kalaýsqa, bas júlde men 2 mıllıon teńge syıaqy - «Qurby qyzdar qupıasy» roman-fentezıi úshin Aısulý Almashqa berildi.
Qazylar alqasynyń tóraǵasy bolǵan jazýshy Tólen Ábdik shyǵarmalardyń kún-tún demeı oqylǵanyn aıtty.
«Bárin salystyrdyq. Odan keıin daýys berý degen másele bar. Daýys berý arqyly sheshtik. Osynyń bári bizdiń ádebıetimizdiń damýyna ıegi yqpal etedi dep esepteımin», - dedi jazýshy.
«Rýhanı jańǵyrý» baǵdarlamasynyń aıasynda alǵash ret ótkizilgen halyqaralyq ádebı baıqaýdy endi dástúrli túrde uıymdastyryp turý josparlanyp otyr.
