Almatyda Nursultan Nazarbaev dańǵylynda alǵashqy jol nusqaýlyqtary paıda boldy. Jol nusqaýlyqtary Fýrmanov kóshesin aýystyrǵan kúnniń ertesinde birden qoıylyp otyr.
Fýrmanov kóshesi 30 qarasha kúni máslıhat depýtattarynyń sheshimimen Nursultan Nazarbaev dańǵylyna aýystyrylǵan bolatyn.
Almaty qalasy ákimdiginiń baspasóz qyzmeti júzege asyrylyp jatqan «Almaty Smart City» tujyrymdamasynyń jańa nusqaýlyqtarǵa qala búdjetinen bir teńge de jumsalmaǵanyn jetkizdi.
Aıta keteıik, tujyrymdama «Billboard Video Digital Broadcast» kompanıasynyń ıntellektýaldy-aqparattyq navıgasıalyq kólik júıesi jobasyna tıesili. Joba joǵary sapaly LED-dıspleımen, bort kompúterlermen, jol apatyn bildiretin, aýa raıyn, kýrs baǵamyn habarlaıtyn navıgasıalyq habarlaǵyshtarmen qamtylǵan jol boıyndaǵy mettaloqurylǵylardyń aqparattyq-tehnıkalyq kesheninen turady.
Qazirgi ýaqytta Almatyda dál osyndaı 44 medıabord jáne jańa alańda bir «Jumbo» megabordy jumys istep tur. Sondaı-aq, Medeý aýdandyq Halyqqa qyzmet kórsetý ortalyǵynda «aqyldy HQO» pılottyq jobasy iske qosyldy.
Kompanıa aldaǵy ýaqytta «aqyldy qala» jobasyn Astana men Aqtaý qalalarynda, Almatydaǵy jaıaý júrginshiler, avtoturaq aımaqtary men Saýda ortalyqtarynda jáne Qazaqstannyń ózge qalalaryndaǵy HQO-nyń In-door júılerine engizbek. Aıta keterligi, qazaqstandyq «Smart-City» eko-júıesin atalǵan kompanıa Qytaı, Sıngapýr, BAÁ, Reseıge engizý týraly kelisimshartqa qol jetkizgen.
Aıta keter bolsaq, qala ákimi Baýyrjan Baıbek onomastıkalyq komısıaǵa Almatydaǵy qaıtalanatyn 112 kósheniń attaryn ózgertý týraly usynys engizilgennen keıin qala turǵyndary, zıaly qaýym men úkimettik emes uıymdardyń ókilderi, ásirese jastar Fýrmanov kóshesine Elbasy atyn berýdi usynǵan bolatyn.
Almatydaǵy eń iri kósheniń birine Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaevtyń esimin berý týraly megapolıstegi kóptegen turǵynnyń usynystary qalalyq jáne Úkimet janyndaǵy respýblıkalyq onomastıkalyq komısıa tarapynan qoldaý tapqan.
"Nursultan Nazarbaev – álemdik deńgeıde áldeqashan moıyndalǵan tulǵa. Keshegi Alash arystarynyń armanyn júzege asyrǵan jańa turpatty, táýelsiz qazaq eliniń negizin qalaǵan adam dep ábden aıtýǵa bolady. Sondyqtan bul kisiniń eńbegi ulanǵaıyr. Menińshe, bul qurmet Elbasyǵa ǵana emes, elimizge, táýelsizdikke kórsetilgen qurmet dep esepteımin", - dep aıtyp ótken bolatyn qalalyq máslıhattyń depýtaty Qalı Sársenbaı.
"Tek jastardan 10 myńnan astam úndeý kelip tústi. Oǵan deıin sońǵy birneshe jylda 20-dan astam úkimettik emes uıymdar men jekelegen azamattardan naqty usynystar berilgen. Bar ǵumyryn eline qyzmet etýge arnaǵan Elbasy tulǵasyna kelgende bul – óte zańdy qubylys. Ár dáýirdiń óz tulǵasy bar. Al Prezıdent Nursultan Nazarbaevtyń orny bólek. Kósheniń atyn Elbasyǵa berý eldiktiń, Prezıdenttiń el aldynda atqarǵan ólsheýsiz eńbegin qurmetteýi", - dep atap ótti Almaty qalasynyń ákimi Baýyrjan Baıbek.
