Almatydaǵy M.Áýezov atyndaǵy Qazaq memlekettik akademıalyq drama teatrynda memleket qaıratkeri, UOS ardageri, kórnekti aqyn, balalar ádebıetiniń negizin qalaýshy Muzafar Álimbaevty aqtyq saparǵa shyǵaryp salý rásimi ótti.
Qaraly jıynǵa qatysqan Almaty ákimi Baýyrjan Baıbek Memleket basshysynyń kóńil aıtý hatyn oqyp berdi.
«Keńestik kezeńde ol qazaq ádebıetiniń alyptarymen qanattasa júrip, Otan ıgiligi jolynda jemisti eńbek etti. Kóptegen jyr jınaqtary men án mátinderiniń avtory atandy. Otyz jylǵa jýyq balalardyń súıikti «Baldyrǵan» jýrnalynyń redaktory bolyp, ana tilimizdiń damýyna jáne búldirshinderimizdiń durys tálim-tárbıe alýyna laıyqty úles qosty. Muzafar Álimbaevtyń esimi men eńbegin halqymyz árdaıym jadynda saqtaıdy dep senemin», - delingen Elbasynyń hatynda.
Almaty ákimi atap ótkendeı, Muzafar Álimbaev bar ǵumyryn, shyǵarmashylyǵyn memleketke, Almatyǵa arnady. «Onyń artynda qalǵan jaqyndaryna jaqsylyq tileımin», - dedi ol.
Qazaqstan Jazýshylar odaǵy basqarmasynyń tóraǵasy Nurlan Orazalın marqumnyń qazaq ádebıeti men mádenıetine sińirgen eńbegi týraly tilge tıek etti.
«HH ǵasyrdan beri halqymen birge tynys alyp kele jatqan, sóz óneriniń asa kórnekti ókilderiniń biri, UOS ardager-jazýshylarynyń mańdaıaldy kóshin bastaǵan Muzafar Álimbaev ómirden ótti. 95 jasqa kelgen Muzaǵań balalar ádebıetiniń klasıkalyq úlgisin jasaǵan qazaqtyń arǵy-bergide ótken júırik sózin bir adamdaı bilgen sóz bilgiri, «Muzaǵań aıtty» deıtin júzdegen qanatty sóz ıesi bolǵan. Ultymyzdyń abzal aqsaqaldarynyń biri ómirden ótip otyr. Qazaq halqynyń orny tolmas aýyr qaıǵysyna kóńil aıtamyn», - dedi Nurlan Orazalın.
Qazaqtyń asa kórnekti aqyny, Qazaqstannyń Halyq jazýshysy, Abaı atyndaǵy Memlekettik syılyqtyń ıegeri Muzafar Álimbaev 95 jasqa qaraǵan shaǵynda ómirden ozdy.
Muzafar Álimbaev 1923 jyly 29 qazanda Pavlodar oblysy Sharbaqty aýdanyndaǵy Maraldy aýylynda dúnıege kelgen. QazMÝ-di támamdaǵan. Tyrnaqaldy óleńi on bes jasynda Pavlodar oblystyq «Qyzyl tý» gazetinde jaryq kórgen. Soǵys jyldarynda respýblıkalyq, oblystyq jáne maıdandyq gazetterde basylyp turdy.
1948 jyly Armıadan oralǵan soń, «Pıoner» jýrnalynda poezıa bólimin basqarady. 1956-1958 jyldary «Qazaq ádebıeti» gazetinde bólim meńgerýshisi, Bas redaktordyń orynbasary. 1958 jyly «Baldyrǵan» jýrnaly ashylǵan kúnnen 1986 jylǵa deıin jýrnaldyń Bas redaktory boldy.
Alǵashqy kitaby - «Qaraǵandy jyrlary» 1952 jyly basylyp shyqty. Sodan beri birneshe ondaǵan kitaby, birneshe dúrkin tańdamalylary, týysqan halyqtar tilinde kóptegen jınaǵy shyqty.
Júz seksen ánge óleń jazdy. 64 tól týma jáne aýdarma kitaptardyń avtory.
Shyǵarmalary 20 tilge aýdarylǵan. Sonyń ishinde orys tilinde 6 kitaby, túrikmen tilinde «Men - túrik meımany» (1963), qyrǵyz tilinde «Joldar. Oılar. Jyrlar» (1966) jınaqtary jaryq kórgen.
Kórkem aýdarma salasynda Saǵdıdyń «Bostanyn» («Jánnat» degen atpen), Petefı men Toqtaǵuldyń, Apollınerdiń tańdamaly óleńder jınaqtaryn, Iý.Fýchıktiń «Dar aldyndaǵy sózin», Orbelıanıdiń «Ǵıbratnamasyn» jáne Pýshkın, Lermontov, Maıakovskıı, Ǵ.Toqaı, M.Jálıl, Fırdoýsı, H.Álimjannyń óleń-jyrlaryn qazaq tiline aýdarǵan.
1982 jyly «Aspandaǵy ápke» jınaǵy úshin respýblıkalyq Abaı atyndaǵy Memlekettik syılyǵyna ıe boldy.
QR eńbek sińirgen mádenıet qyzmetkeri (1978), Qazaqstannyń Halyq jazýshysy, Jambyl atyndaǵy Halyqaralyq syılyqtyń ıegeri (1996). Qazaqstan Respýblıkasynyń Ánurany avtorlarynyń biri.
Otan soǵysynyń birinshi jáne ekinshi dárejeli ordenderimen, Qazaq SSR Joǵarǵy Keńesiniń Qurmet gramotasymen, «Otan» ordenimen marapattalǵan.
