Almatyda qala bıligi egeýquıryqtardy joıý sharasyn júrgizip jatyr.

Qoǵam densaýlyǵyn qorǵaý departamentiniń habarlaýynsha, asa qaterli ınfeksıa taratatyn egeýquıryqtardy ýlaý jylyna eki ret - kúz jáne kóktem aýsymynda júrgiziledi.

«Daratızasıa (ýlaý) qala boıynsha 47 myń 330 gektar aýmaqta júrgiziledi.  Negizinen, egeýquıryqtar kóp bolatyn ózen jaǵalary, saıajaılar, skverler, aryq jelileri men qoǵamdyq kólik aıaldamalary, konteınerler alańynda ýlaý jumystary júredi. Ýlaý jumystaryn júrgizý úshin 2017 jyly ákimdik tarapynan 86 mln teńge bólindi», - delingen habarlamada.

Quzyrly mekemeniń málimetine súıensek, ýlaý jumystaryn qalalyq ákimdikpen qatar qaladaǵy uıymdar men mekemeler, bazarlar men saýda oryndary, komýnaldyq, óndiris nysandary óz erkimen júrgizip keledi.

«Almatyda kemirgishterdi ýlaýmen aınalysatyn 40 fırma tirkelgen. Atalǵan nysandarda óz qarajattarymen egeýquıryqtar men tyshqandardy de ýlap jatqandar bar. Sonymen qatar, biz «Egeýquıryqtar nesimen qaýipti?» taqyrybymen qala dúkenderinde sanıtarlyq-epıdemıologıalyq normalardyń saqtalýyn nasıhattaıtyn aksıa ótkizip, qalanyń jeke sektory turǵyndaryna túsindirý jumystaryn júrgizemiz», - dedi departamenttegiler.

Eske sala keteıik, atjalmandar adam ómirine qaýipti ıersınıoz, lısterıoz, pasterellez, leptospıroz dertterin taratady.