Almatydaǵy aýrýhanalar qyzmeti elektrondyq júıege aýysyp jatyr. Osy kúni naýqasty tirkeý, esepke alý syndy jumystar jeńildetilgen. Emhanaǵa kelgen adam ol jumystardy bir tetiksheni basý arqyly tyndyrady. Sonymen qatar, smart tehnologıalar da dárigerlerdiń jumysyn ońtaılandyrǵan.
Almatydaǵy №7-shi klınıkalyq aýrýhanada «Trıaj» júıesi óz jumysyn bastady. Atalǵan jańashyldyq irikteý degendi bildiredi. Iaǵnı, medısınalyq qyzmet sapasyn jaqsartýǵa baǵyttalǵan joba. Qabyldaý bólimine kelip túsken naýqastar úsh topqa bólinedi. Olardy esik aldynda menedjerler kútip alady. Jaǵdaıynyń aýyrlyǵyna qaraı sary, jasyl, qyzyl tústi bilezikter qarastyrylǵan. Qyzyl bilezik - shuǵyl túrde medısınalyq kómek kórsetilý kerek degendi bildiredi. Al, sary - jaǵdaıy ortasha, jasyl tús - jaraqattyń jeńil ekenin kórsetedi.
«Myna kelgen naýqastardy bólý kerek. Birinshi – qaı naýqasty reanımasıonnyıǵa aparý kerek. Qaı naýqaspen birden dáriger aınalysý kerek. Qaı naýqas jarty saǵattaı kúte alady ol naýqaspen orta býyn mamandar aınalysady. Sony biz túsinýimiz kerek. «Trıaj» sol úshin», - dedi Almaty qalasy №7 qalalyq klınıkalyq aýrýhanasynyń bas dárigeri Marat Abdýllaev.
Mundaǵy tyń tehnologıalar naýqastarǵa sapaly qyzmet jasaýǵa múmkindik beredi. Sondaı-aq, turǵyndardyń san alýan suraqtaryna jaýap beretin «Kol ortalyq» paıdasyn tıgizýde. Dıspecherler tańǵy segizden keshki segizge deıin qońyraý qabyldaıdy. Al, túnde saýaldar avtomatty túrde jazylady.
Dárigerlerdiń sózinshe, jańadan engizilgen júıe qabyldaý bólimindegi kezektiń sanyn azaıtady. Naýqastardyń ýaqytyn únemdeýge septigin tıgizedi. Sonymen qatar, medıkterdiń jumysyn ońtaılandyrady. Bolashaqta atalǵan jańashyldyq qalanyń barlyq aýrýhanalaryna ornatylmaq.
Medısınalyq reforma munymen shektelgen joq. Qalanyń №16-shy emhanasy da sandyq qyzmetke kóshken. Munda dárigerlerge jazylý barysyn jedeldetýge múmkindik beretin elektrondyq tirkeý, esepke alý, qan tapsyrý bólimindegi elektrondyq kezek syndy jańashyldyqtar ornatylǵan. Endi, medısınalyq aqparat júıesin endirýdiń sońǵy kezeńi - elektrondy ambýlatorıalyq kartany qoldanysqa engizý qalypty.
«Eń sońǵy qazir engizilip jatqan bul ambýlatornaıa karta. 2018-shi jyldyń birinshi aıynan bastap bizde ol jumys isteıdi. Bul kádimgideı dárigerge de, naýqastyń ózine de óte paıdaly zattar», - dedi Almaty qalasy №16 emhanasy bas dárigeriniń orynbasary Ásel Hamıdolla.
Sonymen qatar, AQSH-ta qurastyrylǵan smart tehnıka jumys istep tur. Qurylǵy osydan 4 jyl buryn jetkizilgen eken. Ol, júrektegi aqaýdy anyqtaýǵa septigin tıgizedi. Iaǵnı, naýqastyń denesine elektrottar jabystyrylady, keıin adam aqyryn júre bastady. Al, dárigerge emdelýshiniń júrek qaǵysy san túrinde monıtordan kórinip turady. «Smart jabdyq jumysymyzdy ońtaılandyrdy», - deıdi medıkter.
«Almaty qalasynda bul zat kóp emhanada joq. Sondyqtan bizdiń emhanamyzǵa kardıo-standart ótkizý úshin kóp emhanalar naýqastaryn jiberedi», - dedi dedi Almaty qalasy №16 emhanasy bas dárigeriniń orynbasary.
Almatydaǵy emhanalarǵa álemdegi ozyq tehnıkalardy aldyrý birtindep júzege asa beredi. Al, medısına qyzmetkerleri de jyl saıyn shetelge baryp, biliktilikterin artyratyn bolady.
Aıta keteıik, turǵyndardy emhanalarǵa esepke alý jumysy «100 naqty qadam» Ult josparynda kórsetilgen MÁMS (mindetti áleýmettik medısınalyq saqtandyrý) aıasynda júrgizilýde.
