Keýdesine tergeýshiniń aty-jónin oıyp jazǵan Baýyrjan Ýnerzak Qylmystyq kodekstiń «Buzaqylyq» baby boıynsha aıypty dep tanyldy. Ol jazasyn shartty túrde óteıdi, dep Qamshy.kz aqparat agenttigi QazAqparatqa súıene otyryp jazady. 

«Aqtóbe qalasyndaǵy túngi klýbtardyń birinde tóbeles bolyp, sol topty ajyratý úshin bardym» degen Baýyrjan Ýnerzak tergeý qapasynda otyryp, prokýrorlardyń kómek suraǵan bolatyn. Aqtóbe oblystyq prokýratýrasy tergeý kezinde zańsyzdyqtarǵa jol berilgenin anyqtap, sot sheshimimen aıyptalýshy úıqamaqqa jiberildi.

№2 Aqtóbe qalalyq soty qylmystyq iske úkim shyǵardy. Baýyrjan Ýnerzak Qylmystyq kodekstiń «Buzaqylyq» baby boıynsha aıypty dep tanylyp, 3 jylǵa shartty túrde bas bostandyǵynan shettetildi. Sonymen qatar, ol jergilikti atqarýshy organnyń nusqaýymen 100 saǵat jumys isteýi tıis. B.Ýnerzak 306 myń teńge sot shyǵynyn óteıdi. İs materıalyna súıensek, B.Ýnerzak 25 maýsym kúni dostarymen túngi klýbqa barady. Sol kezde taǵy bir top qydyryp júrgen.

Tóbeles túngi klýbqa kireberiste bolyp, B.Ýnerzak birneshe adamdy urady. Sol kezde klýb janyna kólik kelip, tóbelesken topty taratady. Osy sátti paıdalanǵan jábirlenýshiler oqıǵa ornynan qashyp ketken. Aıyptalýshy Baýyrjan Ýnerzak ózine taǵylǵan aıyppen kelisken joq. Ol túngi klýbqa jalǵyz ózi barǵanyn, janyndaǵy adamdardy tanymaıtynyn, dalaǵa shyqqan kezde tóbelesip jatqan topty kórip, jas jigitterge arasha túskenin aıtty.