Óskemende QR Táýelsizdigi kúni qarsańynda halyqaralyq  Óskemen áýejaıynyń jańa termınaly ashyldy. Ushyp kelgen jolaýshylarǵa arnalǵan termınal saǵatyna 200 adamdy ótkizýge qabiletti dep habarlaıdy Qamshy.kz aqparat agenttigi. 

Termınaldyń ashylý saltanatyna qatysqan oblys ákimi Danıal Ahmetov áýejaı ujymyn merekemen quttyqtady.

– Sizderdi kele jatqan Táýelsizdik merekesimen shyn júrekten quttyqtaımyn. Shyǵys Qazaqstan kórshiles Reseımen, Qytaı Halyq Respýblıkasymen jáne Mońǵolıamen shekaralas aımaq bolǵandyqtan, áýejaıdyń keńeıip, termınaldyń ashylǵany halyqaralyq qatynasqa jańa serpin beredi. Jylyna áýejaı 300 myńnan astam jolaýshy qabyldasa, aldaǵy ýaqytta bul kórsetkishtiń ósetinine kámil senimdimin, – dedi Danıal Ahmetov.

Keden baqylaýynyń jańa tehnologıalarymen jáne zamanaýı qurylǵylarmen jabdyqtalǵan termınalda sondaı-aq ana men balaǵa arnalǵan bólme de qarastyrylǵan.

Keler jyly halyqaralyq áýejaıda budan bólek taǵy da basqa ózgerister bolmaq. Jospar boıynsha ushý alańy, júk termınaly, avtoturaq jáne júk qoımasy jóndeýden ótip, halyqaralyq standarttarǵa saı jańartylady.

         Aıta ketý kerek, kóbine el ishindegi iri qalalar men Reseı Federasıasy arasynda jolaýshylar qatynaǵan áýejaı ótken jyly 2 729 áýe reısin qabyldaǵan.