«Tansholpan» - «Qazaqstan» Ulttyq arnasynyń eń uzaq merzimdi jobasy jáne qazaq televızıasy tarıhyndaǵy alǵashqy tańerteńgilik baǵdarlama. Biregeı teleónimniń negizin qalaýshy Qazaqstannyń halyq jazýshysy - Sherhan Murtaza 1992 jyly 14 jeltoqsan kúni alǵash ret bul týyndyny efırge shyǵardy. Júrgizýshi tizginin televızıa salasynyń sheberleri Imanbaı Jubaı men Laýra Júsipjanova ustady. Táýelsizdik alǵan jas memlekettiń qatardaǵy turǵyny úshin dál sol qarapaıym dúısenbiniń araıly tańy esten ketpegeni sózsiz. Kórermender nazaryna «Araı», «Jańa kún», «Tańsári», «Oıan, qazaq», «Kóńilashar», «Qaıyrly tań, Qazaqstan!», «Assalaýmaǵaleıkým, aǵaıyn!» ataýlarymen de tanymal bolǵan, al 2010 jyly joba qaıtadan «Tańsholpan» degen alǵashqy ataýyna ıe boldy.
Ár jyldary avtorlyq quram ózgergenimen, Sherhan Murtazanyń mejelegen belesteri tek sharyqtaı tústi. Qazaqstandyqtardyń tańy túrli-tústi boıaýlarǵa tolyp, baǵdarlamanyń reıtıńi kúnnen-kúnge artyp keledi. 25 jyl boıy «Tańsholpan» súıikti kórermenderine kóterińki kóńil-kúı syılap keledi.
Áserli áńgime, áýezdi án, qyzyqty derek, tanymdyq sújet, álemdik aqparat, jaǵymdy jańalyq – munyń bári «Tańsholpanda».Aqparattyq-sazdy baǵdarlama tikeleı efırde dúısenbi-juma kúnderi saǵat 7.00-den 10.00-ǵa deıin jáne jeksenbi kúni 8.15-ten 11.15-te san alýan taqyrypty qamtyp, ulanǵaıyr qazaq dalasynyń túkpir-túkpirine án men jyrdan shashý shashady. Alǵashqy efırler tizginin Lázzat Tanysbaı, Gúlmıra Daırabaeva, Hadısha Jámekova, Laýra Júsipjanova, Arhat Sadyqov, Rýgına Lodjý, Jasqylyq Shúıtenov basqarǵan. Qazirgi kezde tikeleı efırde óz isiniń sheberleri Janserik Berikqazyuly, Irına Ten, Nazerke Nurtas, Danıar Esen, Gúlnur Orazymbetova jáne Baıan Baqkeldi úsh saǵat boıy kórermender úshin jumys isteıdi.
«Tańsholpan» telejobasy jan-jaqtylyǵymen erekshelenedi. Máselen, áleýmettik jaǵynan az qamtylǵan jandardy qýanyshqa bóleý maqsatynda «Meıirim» rýbrıkasy jaryqqa shyǵady. Elimizdegi jáne shet memleketterdegi ózge ult ókilderiniń dástúrin dáripteıtin «Ózge ult», úı dızaıny men baspanany sándeýge keńes berer «Interior», qarjy jáne zań salalary jaıly taptyrmas joba «Keńes», ótken jyldarǵa sholý jasaıtyn «Retro» jáne basqa da qyzyqty rýbrıkalarmen kórermen kóńilinen shyǵyp keledi.
Búgin «Tańsholpan» jobasynyń jıyrma bes jyldyǵyna oraı, aǵa býynnan Imanbaı Jubaı men Lázzat Tanysbaı jáne Janserik Berikqazyuly men Irına Ten birlesip tikeleı efırge shyqty.
