13 jeltoqsan Ulttyq akademıalyq kitaphanada Tańjaryqtaný ǵylymynyń negizin salǵan belgili ádebıettanýshy ǵalym, jazýshy jáne folklorshy Orazanbaı Egeýbaevtiń Bes tomdyq shyǵarmalar jınaǵynyń tusaýkeseri ótti. 

Shyǵys Túrkistandaǵy qazaq ádebıetiniń jaryq juldyzy Tańjaryq Joldyulynyń ómiri men shyǵarmalaryn zertteýge ómirin arnaǵan Orazanbaı Egeýbaev elimizge qazaq folklorynyń jınaýshy hám zertteýshisi retinde de jaqsy tanys. Azat rýhtyń aldaspanyndaı bolǵan Tańjaryq aqynnyń el arasyndaǵy murasyn jınap-terip, tuńǵysh tolyq jınaǵyn shyǵarǵan  da ǵalym Orazanbaı Egeýbaev bolatyn. Keıinnen jaryq kórgen barlyq jınaqtar osy akademıalyq jınaqtyń negizinde qurastyrylyp júr.

Shyǵys Túrkistan qazaqtarynyń asyl muralaryn qazaqtyń baı mádenı muralarynyń qataryna qosyp, ulttyń rýh baılyǵyn túgendeý de kezek kúttirmeıtin mindet. Álemde teńdesi joq joba «Babalar sózi» júz tomdyǵyna  on bes tomdyq mura Shyǵys Túrkistan qazaqtary folkloryn ákep qosqan, sol tomdardyń redaktorlyq qyzmetin de qosa atqardy. Bir ınıstıtýttyń atqarýǵa tıisti mindetin ózi atqarǵan  ǵalymnyń qazaq mádenıetine qosqan úlesi ólsheýsiz.

Sonymen birge Orazanbaı Egeýbaev jazýshy retinde de birneshe romandar men hıkaıattardyń avtory. Onyń prozalyq shyǵarmalary da oqyrmandy beıjaı qaldyrmaı, erekshe tolǵandyrǵan sátti týyndylar qataryna jatady. Ǵalymnyń bul bes tomdyǵy áke amanatyna adal urpaǵy Aıdyn Orazanbaıuly men Aınur Orazanbaıqyzynyń muryndyq bolýymen jáne Orazanbaı Egeýbaevtiń dosy, jazýshy Sálı Sádýaqasulynyń qurastyrýymen oqyrmanǵa qaýyshyp otyr.

Bes tomdyqtyń tanystyrylymyna qazaq ádebıetiniń belgili ókilderi aqyn, memlekettik syılyqtyń ıegeri Nesipbek Aıtuly, tarıh ǵylymdarynyń doktory, profesor, jazýshy Tursynhan Zákenuly qatarly tulǵalarmen qatar oqyrman qaýym men buqaralyq aqparat quraldarynyń ókilderi qatysty. Keshti alashtanýshy ǵalym, profesor Tursyn Jurtbaı júrgizdi.

Sanaly ǵumyryn qazaq mádenıeti men ádebıetin zertteý men nasıhattaýǵa arnaǵan qajyrly ǵalymnyń shyǵarmalarynyń oqyrman kóppen qaýyshýy ult mádenıeti úshin súıinshili jańalyq.

Erbol Alshynbaı