Búgin QR Premer-Mınıstri Baqytjan Saǵyntaev QR ASHM ujymyna jańa mınıstri Ómirzaq Shókeevti tanystyrdy  dep habarlaıdy Qamshy.kz aqparat agenttigi Qazaqstan Respýblıkasynyń Premer-Mınıstriniń baspasóz qyzmetine silteme jasaı otyryp.

Baqytjan Saǵyntaev Asqar Myrzahmetovke birlesip atqarǵan nátıjeli jumysy úshin alǵys bildirip, elimizdiń aýyl sharýashylyǵy salasyn damytýǵa qosqan eleýli úlesin atap ótti.

«Mınıstrliktiń aldynda Agroónerkásiptik keshendi damytýdyń memlekettik baǵdarlamasyn iske asyrý sekildi óte mańyzdy mindetter tur», - dedi Premer-Mınıstr Ómirzaq Shókeevti tanystyra otyryp. -Memleket basshysy Qazaqstan halqyna Joldaýynda agrarlyq sektor ekonomıkanyń jańa qozǵaýshy kúshine aınalýy tıis ekenin aıtyp ótti. Prezıdent aýyl sharýashylyǵy ónimderin óńdeý, túsimdi arttyrý, eńbek ónimdiligin ulǵaıtý jáne salanyń eksporttyq múmkindikterin damytýdy qamtamasyz etýge erekshe nazar aýdarýdy tapsyrdy. Aýyl sharýashylyǵy mınıstrligi jumys qarqynyn kúsheıtip, jedeldetýi kerek. Negizgi basymdyq - joǵary sapaly jáne básekege qabiletti ónim óndirý».

B.Saǵyntaev jańa mınıstrge jáne mınıstrlik ujymyna tabys tilep, alǵa qoıylǵan mindetterdi iske asyrýǵa belsene aralasyp, barynsha kúsh jumyldyrý qajettigin aıtty.